Matay 6 - Bibili 1927 (Omyene)

¹ Ṽandam̃iṉaṉi ko alendaṉi ômbyi waṉi gw’azô m’ aṉaga, gô jeṉô ne waô; ja yeṉo, aṉwè azele n’ ipa gôre Reri yaṉi yi re g’ôrôṽa.

² Sambô gô po mpagagi yo, arônge mpunji gô bôsô yo, ga nte dend’ imbyagwaṉa gw’ inagô si soṉo na gw’agala inè, wi ga zum̃inyô n’aṉaga. Rèti mi bulinya nya ṉwè inè, wi re bonga p’ipi saô.

³ Ndô gô po mpagagi yo, ôgo wo ônyantwè w’amya nte dend’ôgo wo ôṉôm̃yè,

⁴ ko mpagagi yo dwaṉa gw’iyumbuṉô; ni Reri yo yi jeṉa gw’iyumbuṉô e be po gô bwe.

⁵ Gô kambiṉa ṉwè Anyambyè alwaṉaṉi g’imbyagwaṉa, konde wi tonda gô kambiṉa kum̃aṉa pa gw’inagô si soṉo na gw’am̃èrakaṉô m’agala, inè, wi ga yeṉô n’aṉaga. Rèti mi bulinya ṉwè inè, wi re bonga p’ipi saô.

⁶ Ndô awè, gô kambiṉo Anyambyè, yingiṉa gô bèdi yo, n’awè nunja p’iguge nyo, ko kambiṉa gôre Reri yo yi re gw’iyumbuṉô, ni Reri yo yi jeṉa gw’iyumbuṉô e be po gô bwe.

⁷ Gw’ikambiṉa agambaṉi egambanyambyè, ga nte dend’aṉongo, konde wi pikilya inè, wi be pôganyô g’ômwanja w’ibuṉa s’agambi maô.

⁸ Sambô alwaṉaṉi ga waô, konde Reri yaṉi avôrô yom̃a yi re na ṉwè isolo aṉwè ṽambyegè ro.

⁹ Sambô gambiṉaṉi yeṉo inè: Reri yazô yi re g’ôrôṽa! Ini nyo nyi ga lwaṉ’ôrunda;

¹⁰ ipangiṉi so si ga ṽye; ntondiṉi yo yi ga lendô gô ntye ga nte dendô yô g’ôrôṽa.

¹¹ Va zwè inya si re na zwè kwèkwè ṉèṉo wiṉo;

¹² ko nyeza zwè ifwem̃i sazô, ga nte nyeza zwè mongi wi fwem̃iṉa zwè;

¹³ agèndya zwè gw’isoryô, ndô rômba zwè avila gw’ibe. [Konde ipangiṉa, ni ngulu, n’ivenda inyo egômbe zôdu. Amèn.]

¹⁴ Konde j’aṉw’anyez’aṉaga ifwem̃i saô, gambèṉè Reri yaṉi y’ôrôṽa anyeza ṉwè kè;

¹⁵ ndô j’aṉw’anyez’aṉaga ifwem̃i saô, gambèṉè Reri yaṉi kè anyeze ṉwè ifwem̃i saṉi.

¹⁶ Na gô penga ṉwè esônge, alwaṉaṉi n’azô m’ekèṽa, g’imbyagwaṉa, yi fweviz’azô maô gô jeṉô n’aṉaga inè, wi peng’esônge. Rèti mi bulinya ṉwè inè, wi re bonga p’ipi saô.

¹⁷ Ndô awè, gô pengo esônge, guz’ewônjô zo agali, ko jôvuṉ’ôzô wo,

¹⁸ ko w’ayeṉô n’aṉaga inè, ô peng’esônge, ndô kaô Reri yo yi re gw’iyumbuṉô, ni Reri yo yi jeṉa gw’iyumbuṉô e be po gô bwe.

¹⁹ Agenjiṉaṉ’ ikuṽi yaṉi igumba gô ntye yiṉo, gôre intyèlèlè ni nyanga yi bundakaṉa, na gôr’ifwe yi pôduṉa ayufa;

²⁰ ndô genjiṉaṉ’ ikuṽi yaṉi igumba g’ôrôṽa, mbôra yi re yi zele intyèlèlè ni nyanga yi bundakaṉa, ge ifwe yi pôduṉa ayufa.

²¹ Konde mbôra yi r’igumbi nyo, vovo be dwaṉ’ ôrèm̃i wo kè.

²² Intyo ne ôjô w’ôkuṽa. Sambô j’intyo nyo ny’adwaṉa mbyambye, gambèṉè ôkuṽi wo wôdu w’adwaṉa ralye n’ôzange;

²³ ndô j’intyo nyo ny’adwaṉ’iṽe, gambèṉè ôkuṽi wo wôdu w’adwaṉa ralye ni mpiri. Sambô j’ôzange wi re gôre wè w’adwaṉe mpiri, mpiri mpôlô nde mèyo!

²⁴ E zel’ôma re ko janjiṉe rerè mbaṉi. Konde e be numbe mori ko yè tonde mori, ntyo e be dwaṉa ni mori ko yè pèdye mori. Aṉw’ayolye janjiṉ’Anyambyè ni Mamon ta.

²⁵ Yeṉo mi bulinya ṉwè inè: Alwaṉaṉi n’añandi g’ômwaṉja wi m̃èṉo yaṉi inè, ande zi be nyô ṉwè ge ande zi be jongô ṉwè, ge g’ômwanja w’ikuṽi yaṉi inè, ande zi be borô ṉwè. Em̃èṉo zi zele vyagaṉô n’inya, n’ôkuṽa vyagaṉô ni yom̃a yi borô?

²⁶ Vônaṉ’inyoṉi s’igôṉô, si pa bèṉa ge teṉa, ge kenja gw’inagô; ndô Reri yaṉi y’ôrôṽa e nyeza sô. Aṉwè aze vyagaṉô na sô?

²⁷ Na mande gôre ṉwè are ko jolye kunda mwezom̃a gw’elaviṉi zè n’añandi?

²⁸ Ntiṉa nde kè yi jeṉa ṉwè añandi g’ômwanja wi yom̃a yi borô? Vikilyaṉi alanga m’ôrôve nte fwelya mô; mi pa janja ge pèṉ’igoli;

²⁹ ndô mi bulinya ṉwè inè, vangaṉe Salômôn gw’ ivendi nyè nyôdu e re pegege bora pa egolaṉi g’ im̃ori gô mô.

³⁰ J’Anyambyè abory’am̃aṉi m’ôrôve nkèmbo yiṉo, mi dwaṉa ṉèṉo, ko mèṉè mô pikô gw’ inu, aworye ṉwè vyagaṉô, aṉwè y’ibekely’ijangô?

³¹ Sambô ayeṉaṉi añandi gô bulya inè: Ezom̃a nde zi be nyô zwè? ge ezom̃a nde zi be jongô zwè? ge ezom̃a nde zi be borô zwè?

³² Konde yom̃a yiṉo yôdu yi butô n’aṉongo. Ndô Reri yaṉi y’ôrôṽa avôrô inè, aṉw’are n’isolo ni yom̃a yiṉo.

³³ Ndô lônge buteṉ’iṉongo ny’Anyambyè n’ôgôre wè, gambèṉè yom̃a yiṉo yôdu yi be kundô gôre ṉwè.

³⁴ Sambô ayeṉaṉi añandi g’ômwanja wi mèṉè; konde mèṉè e be pikilye yom̃i yèmè. Ambe mi ntyugu mi re kwèkwè gô yô.