Matay 5 - Bibili 1927 (Omyene)

¹ Gw’ayeṉi Yesu inkondo s’aṉaga, avandi gô nômba, na gw’alwaṉi yè baru iṉèngi yè y’aṽyeṉi gôre yè.

² N’aṉunguṉi yè ôgwaṉi wè, aṉènja waô inè:

³ Ôzaviṉô gôr’ ikuge g’ôrèm̃a, konde iṉongo ny’ôrôṽa inyaô!

⁴ Ôzaviṉô gôre waô wi jeṉ’ekèṽa, konde wi be sindyô irèm̃a!

⁵ Ôzaviṉô gôr’ikendekende, konde yi be jige ntye!

⁶ Ôzaviṉô gôre waô wi jeṉ’ôgôre njaṉa n’esôve, konde wi be jôra!

⁷ Ôzaviṉô gôre waô wi pôgiṉa, konde wi be pôgiṉô!

⁸ Ôzaviṉô gôre waô wi re n’irèm̃a yi nkèrè, konde wi be jeṉ’ Anyambyè!

⁹ Ôzaviṉô gôre waô wi pang’ am̃ènjè, konde wi be fweyô inè, awaṉa w’Anyambyè!

¹⁰ Ôzaviṉô gôre waô wi kombizô g’ômwanja w’ôgôre, konde iṉongo ny’ôrôṽa inyaô!

¹¹ Ôzaviṉô gôre ṉwè gô be toṽô ṉwè, agombizô aṽèrinyô igamby’edu iṽe g’ômwanji wam̃.

¹² Yeṉaṉi mbya n’igeṽ’ivôlô, konde ipi saṉi si be dwaṉa sipôlô g’ôrôṽa; konde yeṉo agombizagi waô ivogisi y’alônge dwaṉi na ṉwè.

¹³ Aṉwè n’ezanga zi ntye, ndô j’ezanga z’asambwa, zi be pang’ôṉigi n’ezom̃a nde? Zi zele n’isolo nyèṉè kaô gô falô gw’igala ayarô n’aṉaga.

¹⁴ Aṉwè n’ôzange wi ntye. Nkala nôgô pa gô nômba y’ayolye nimbaṉe.

¹⁵ Aṉaga wi re nunge lambi gô sôliza yô gw’egara, ndô wi dôṽya yô gô tavulu, ko yô bam̃iṉa gôre waôdu wi re gô nagô.

¹⁶ Yeṉo ôzange waṉi wi ga ṽambe gw’azô m’aṉaga, ko waô jeṉ’ ijanji saṉi ibya, azum̃inye Reri yaṉi yi re g’ôrôṽa.

¹⁷ Avikilyaṉi nè, my’aṽyeṉi gô tômb’ampanga ge ivogisi; mi re bye gô tômba, ndô gô dwaṉiza.

¹⁸ Konde, giligili, mi bulinya ṉwè inè, kaô ôrôṽa ni ntye y’apyagaṉa, ôrènd’ôm̃ori ge idodo im̃ori ny’ aṽyagaṉe avila gw’ampanga, kaô isam̃u yôdu y’adendô.

¹⁹ Sambô ayè yi be pav’ ôzômbyô ôm̃ori avila gw’isômby’ijangômè siṉo, aṉènj’aṉaga gô pava sô, e be fweyô inè, ômwangômè gw’iṉongo ny’ôrôṽa; ndô ayè yi be penjavenja sô, aṉènja sô gô penjavenjô, ayè be fweyô inè, ômpôlô gw’iṉongo ny’ôrôṽa.

²⁰ Konde, giligili, mi bulinya ṉwè inè, kaô ôgôre waṉi w’apyagaṉ’ôgôre w’irèndisi n’ifarisi, aṉwè ayingiṉe du gw’iṉongo ny’ôrôṽa.

²¹ Aṉw’are jogo pa inè, aṉag’alônga w’awulinyô inè: Ayôṉa; n’ayè yi jôṉa e ga zôny’ ôgôm̃a ne iyèkèli.

²² Ndô mi bulinya ṉwè inè, ôm’edu e bendiṉa mwô’ngi yè eguṉu e ga zôny’ôgôm̃a ne iyèkèli; n’ayè yi bulinya yè inè: Awè nkende! e ga zôny’ôgôm̃a ne ôvag’ômpôlô; n’ayè yi bulya inè: Awè edosu! e ga zôny’ôgôm̃a ne ôgôṉi w’elôngô z’ôgôṉi.

²³ Sambô j’aw’abage mpagagi yo gô mbôra yi jirô intyagô, ko wè jônginya vovo inè, mwô’ngi yo are na wè n’igamba,

²⁴ rige mpagagi yo vovo swaswo ni mbôra yi jirô intyagô ko kèndaga gô dônge mèpaṉa na mwô’ngi yo; avila vovo tô bya gô pe mpagagi yo.

²⁵ Zunge mèpaṉa n’ ôlôvalôvi wo gô p’are wè na yè gô mpoṉo; ôlôvalôvi e vende po gôr’ôyèkèli, ko ôyèkèli po gôre yôfisye, ko yè fwelo gô ntyôgô.

²⁶ Giligili mi bulinyo inè, w’agogwe vovo kaô w’ape vintè num̃uṉa.

²⁷ Aṉw’are jogo pa inè, awulyô inè: Alèwa na wi ngaṉi.

²⁸ Ndô mi bulinya ṉwè inè, ôm’edu e pôn’ômwantô gô deṽiṉè, gambèṉè adèwi na yè g’ôrèm̃i wè.

²⁹ Na j’intyo nyo iṉôm̃yè ny’asogizo, rôduṉa nyô ko fala nyô avila gôre wè; konde re mbya gôre wè inè, em̃ori gô nam̃i yo zi ga vere, n’aranga inè, ôkuṽi wo wôdu wi ga walô gw’elôngô z’ôgôṉi.

³⁰ Na j’ôgo wo ôṉôm̃yè w’asogizo, zèra wô nkwe, ko fala wô avila gôre wè; konde re mbya gôre wè inè, em̃ori gô nam̃i yo zi ga vere, n’aranga inè, ôkuṽi wo wôdu wi ga walô gw’elôngô z’ôgôṉi.

³¹ Awulyô kè inè: Ayè yi tômb’ômwantô wè, e ga ve yè ezangô z’itômbô.

³² Ndô myè, mi bulinya ṉwè inè, ôm’edu e tômb’ ômwantô wè, kaô gô ntiṉa y’ôṽelaṉô, e pangè gô dèwa na wi ngaṉi, n’ayè yi jômb’ômwantô are tômbô pa, e dèwa na wi ngaṉi.

³³ Aṉw’are jogo pa kè inè, aṉag’alônga w’awulinyô inè: Arang’ôrangô w’inôka, ndô lend’irangô yo gôre Rerè.

³⁴ Ndô mi bulinya ṉwè inè: Arangaṉi du ôrangô, arangaṉi ôrôṽa, konde wô n’eka z’Anyambyè;

³⁵ arangaṉi ntye yiṉo, konde yô n’iyariṉô ny’agôlô mè; arangaṉi Yerusalèm, konde yô ne nkala y’ôg’ômpôlô.

³⁶ Arang’ôrangô n’ewônjô zo, konde ô ze ni ngulu yi pang’ôrwe ôm̃ori pupu ge vyovyo.

³⁷ Ndô nkambiṉi yaṉi yi ga lwaṉe inè, èñ, èñ, nyawè, nyawè; n’ezom̃a zi pyagaṉ’agamba miṉo zi pila gw’ibe.

³⁸ Aṉw’are jogo pa inè, awulyô inè: Intyo gw’intyo, n’inô gw’inô.

³⁹ Ndô myè, mi bulinya ṉwè inè, aṉwaṉi n’ôm’ombe. Ndô ayè yi bôlo gw’iwugu nyo iṉôm̃yè, gegunyè im̃ori kè.

⁴⁰ N’ayè yi bele sozizo awongiṉô ngoy yo, vè kè ôrôgôsambali wo.

⁴¹ N’ayè yi be pango gô kènda na yè nanda mori, gènda na yè nanda mbaṉi.

⁴² Va gôre yè yi bambyo, n’ayè yi bele sungô gôre wè, agegwa avila gôre yè.

⁴³ Aṉw’are jogo pa inè, awulyô inè: Rond’ôrangaṉô wo, ko numb’ôlôvalôvi wo.

⁴⁴ Ndô mi bulinya ṉwè inè: Rondaṉ’ilôvalôvi yaṉi, zaviṉaṉi waô wi numba ṉwè, ko kambiṉaṉi g’ômwanja wa waô wi kombiza ṉwè,

⁴⁵ ko ṉwè dwaṉ’awaṉa wa Reri yaṉi yi re g’ôrôṽa; konde e tongunye nkômbe yè gôr’aṉag’aṽe na gôr’aṉag’aṽya, aṉogize ningô gôr’agôre na gôr’ arègo.

⁴⁶ J’aṉw’atonda mongi wi tonda ṉwè, ipa nde si re na ṉwè? Ipublikan kè si pa dend’egolaṉi mèmô?

⁴⁷ J’aṉw’ asanguṉ’awareri yaṉi dadyè, aṉwè dend’ande vyagaṉô n’am̃ori? Aṉongo kè mi pa dend’egolaṉi mèmô?

⁴⁸ Sambô lwaṉaṉi mèpa pa, ga nt’are Reri yaṉi yi re g’ôrôṽa mèpa pa.