Matay 28 - Bibili 1927 (Omyene)

¹ Soṉo pyagaṉa pa, gw’ayenji ôwenja wi ntyugu nônga yi soṉo, agèndi Marya yi Magdala ni Marya mori gô jeṉ’ôrôngiṉô.

² Na vôna, arweṉ’isugyazugya si ntye sipôlô; konde yenjèl ya Rerè y’azum̃iṉi avila g’ôrôṽa, aṽya gô kavaly’idô avila g’ôrôngiṉô, alwaṉa baru gô nyô.

³ Edidi zè z’avegagi g’ibam̃iṉa si njalitôṽa, n’ ingoy sè s’avegagi pupu pôlô.

⁴ N’aratam̃iṉi mongi pengiṉa n’itya agalwa ga bende.

⁵ Ndô yenjèl awiṉizi, awuliny’antô inè: Aryaṉi, konde my’avôrô inè, aṉwè bute Yesu y’aṽanyô gô krosi.

⁶ E zele vèṉo; atôngwi ga nt’awulyi yè. Yôgôṉi, ko jeṉaṉi, mbôra y’apegage Rerè dèwa pa,

⁷ ko kèndaṉi nèganèga gô buliny’iṉèngi yè inè, atôngwi avila gw’ijuwa. Na vônaṉi, e kènda gô bôsô yaṉi gô Galile: gôgô be jeṉa ṉwè yè. Vônaṉi, my’abulinya ṉwè.

⁸ Alubwi antô mè nèganèga avila g’ôrôngiṉô, n’itya ni mbya mpôlô, n’avali waô mangô gô bunguṉe ntyangô gôr’iṉèngi.

⁹ Na vôna, Yesu alataṉi na waô, awulya inè: Mbôlôaṉi! N’aṽyeṉi antô, agôt’agôlô mè, azaviṉè.

¹⁰ Vovo Yesu awulinyi waô inè: Aryaṉi, gèndagaṉi ko bulinyaṉi awareri yam̃ inè, wi ga gènde gô Galile; gôgô be jeṉa waô myè.

¹¹ Gw’agèndagi waô gô mpoṉo, vôna, awèwo gôre mongi pengiṉa w’aṽyeṉi gô nkala, arakily’imiṉisè impôlô isam̃u yôdu y’arweṉi.

¹² Na gw’alataṉi waô n’aṉèro w’awôndi môndo, av’isozè sika nyenge, awulya inè:

¹³ Wulyaṉi nè: Iṉèngi yè y’aby’ôgwèra gô jufè, gw’adèwaga zwè.

¹⁴ Na ja guvèrnèr ajogw’igamba, gambèṉè azwè be poṉizè, alwaṉiza ṉwè njuke fo.

¹⁵ Yeṉo awong’isozè sika, alenda ga nt’aṉènjyô waô. N’igamba nyiṉo ny’arakilyô gôr’Iju, kwanga na ṉèṉo wiṉo.

¹⁶ Agèndi igôm̃i ny’iṉèngi n’ôṉèngi ôm̃ori gô Galile, gô nômba y’arevyô waô ne Yesu.

¹⁷ Na gw’ayeṉi waô yè, w’azaviṉi yè. Ndô awèwo w’alôṽi mpaga.

¹⁸ N’aṽyeṉi Yesu agamba na waô, awulya inè: Ngulu yôdu g’ôrôṽa na gô ntye yi re pô pa myè.

¹⁹ Sambô, gèndagaṉi, ko nènjaṉ’aṉongo môdu, aṽatiza waô gw’ina nya Rerè, na ny’Ômwaṉa, na ny’Iṉiṉ’Iṽya,

²⁰ nènjaga waô gô bandam̃iṉ’isam̃u yôdu y’azômbyi myè ṉwè. Na vônaṉi, my’are na ṉwè egômbe zôdu, kwanga gô be suke ntye yiṉo.