Matay 27 - Bibili 1927 (Omyene)

¹ Gw’ayenj’ôwenja, imiṉisè impôlô sôdu n’aṉèro w’aṉaga w’am̃og’erungu g’ômwanja wi Yesu, gô jôṉè.

² Waô kôrè pa, w’aviṉi yè aṉozè gôre Pontu Pilatu, yi guvèrnèr.

³ Vovo Yudas, y’agôtizi yè, gw’ayeṉi yè inè, apenyô ôgara, aṉigi nkôndi, awiṉiz’ agôm̃i m’idolè s’imyanga ararô gôr’imiṉisè impôlô na gôr’ aṉèro, awulya inè:

⁴ My’ayanji mbe gô kôtize ntyiṉa yi r’ôgara fo. Awiṉizi waô inè: Mèzo ande gôre zwè? Mèyo ndagi yomè.

⁵ N’awali Yudas idolè s’imyanga gô nagô y’Anyambyè, agogwa, n’agèndi yè gô bany’ôkuṽi wèmè gw’igôṉô.

⁶ N’imiṉisè impôlô s’awong’idolè mè, awulya inè: E zele kwèkwè gô fwela sô gw’egara z’ôrunda, konde sô ne igôlô nyi ntyiṉa.

⁷ Waô bônda pe môndo, w’agôl’idolè mè ni mbôra y’ôma w’avangi vagô y’ambôṉô, ko yô dwaṉ’ ibenga gôr’agènda.

⁸ Yeṉo mbôra mè aweyô inè, mbôra yi ntyiṉa, kwanga na ṉèṉo wiṉo.

⁹ Vovo arweṉ’igamba nyi Yeremya y’ôvogisi nyi bulya inè: W’awongi agôm̃i m’idolè s’imyanga ararô, igôlô ny’ôma w’avikilyô igôlô, avikilyô ne awaṉa w’Israèl;

¹⁰ ko waô pa sô gô kôle mbôra y’ôma wi pange vagô y’ambôṉô, ga nt’azômbyô myè ne Rerè.

¹¹ Agum̃aṉi Yesu gôre g’ôzô wi guvèrnèr, n’aṽambyô yè ne guvèrnèr inè: Awè n’ôga w’Iju? N’awiṉizô yè ne Yesu inè: Èñ, nte bulyo.

¹² Ndô e pa fwiṉiz’igamba gw’azozizyô yè ne imiṉisè impôlô n’aṉèro.

¹³ Vovo awulinyô yè ne Pilatu inè: Ô pa jogw’isam̃u imyenge yi soziza waô wè?

¹⁴ Ndô Yesu e pa fwiṉize yè igamba; yeṉo am̃ami guvèrnèr pôlô.

¹⁵ Gô fèty’edu, guvèrnèr avegagi ni ntyale gô tigiṉa waô ôkôt’ôm̃ori dyè, w’aṽambyô n’aṉaga.

¹⁶ N’egômbe mè w’avegagi n’ôkôte w’elum̃i, ini nyè ne Barabas.

¹⁷ Gw’avegagi waô dataṉa pa, Pilatu awulinyi waô inè: Aṉwè bela myè tigiṉa ṉwè mande dyè? Barabas mbè Yesu e fweyô inè, Krist?

¹⁸ Konde aliwô myeṉi nè, w’agôtizi Yesu ni ñandi.

¹⁹ Gw’avegagi yè baru gw’eka z’ijèkèlya, ômwantô wè amyezi yè inè: Alwaṉa ni ndaga n’ôma w’ôgôre mèwoṉo, konde ṉèṉo wiṉo my’ajeṉe njuke mpôlô gô nyinô g’ômwanji wè.

²⁰ Ndô imiṉisè impôlô n’aṉèro w’azoryi aṉaga gô bambye Barabas, ayôṉize Yesu.

²¹ Awiṉizi guvèrnèr, awulinya waô inè: Gôre waô aṽaṉi aṉwè bela myè tigiṉa ṉwè mande dyè? Awulyi waô inè: Barabas.

²² Awulinyô waô ne Pilatu inè: Sambô, mi be dendiṉe Yesu, e fweyô inè, Krist, ande? Awiṉizi waôdu inè: E ga ṽanyô gô krosi?

²³ N’awulyi guvèrnèr inè: Ndô mbe nde yi re yè denda pa? N’arô tôngi waô vyagaṉô inè: E ga ṽanyô gô krosi!

²⁴ Gw’ayeṉi Pilatu inè, e pa dende mpongo, ndô e tô pendiz’edungu, awong’aṉingô ayôvuṉ’ago mè gw’azô m’aṉaga, awulya inè: My’ar’ôgara fo avila gô ntyiṉa y’ôma w’ôgôre wiṉo. Gèlagèlaṉi ndaga aṉwèmè.

²⁵ N’awiṉizi aṉaga waôdu, awulya inè: Ntyiṉi yè yi ga lwaṉe gôre zwè na gôr’awaṉi wazô!

²⁶ Vovo Pilatu arigaṉi waô Barabas dyè; n’ayè siṽa pe Yesu, aveṉi yè gô banyô gô krosi.

²⁷ Vovo isozè si guvèrnèr s’agèndizi Yesu gô ñanja, n’alatizi waô isozè sôdu ta gôre yè.

²⁸ N’azoduṉi waô ingoy sè, aworizè ôrôgôsambala wa teṉateṉa.

²⁹ N’aṉôgi waô kôrôṽa y’arèndè, awela yô gw’ewônjô zè, n’agôtizi waô yè ntôngô yi nkuṉe g’ôgo wè ôṉôm̃yè; n’alôṽi waô akotolo g’ôzô wè, azèlyè, awulya inè: Mbôlô, ôga w’Iju!

³⁰ N’arônyi waô yè igwaṉa, awonge ntôngô yi nkuṉe, awôlè gw’ ewônjô.

³¹ Na waô sèlyè pa, w’azoduṉi ôrôgôsambala, aworizè ingoy sèmè, n’agèndizi waô yè gô banyô gô krosi.

³² Gw’agogwi waô, w’alataṉi n’ôṉôm̃e wi Kirèni, ini nyè ne Simôn, n’aṽangatyi waô yè gô kumbe krosi yi Yesu.

³³ Gw’aṽyeṉi waô gô mbôra yi fweyô inè, Golgôta, nyi pivya nè, mbôra yi nkèli,

³⁴ w’ayonji yè ivè bunduṉô pa ni yom̃a yi nôṉe; ndô gw’alembi yè nyô, e re jivire gô jonga.

³⁵ Waô banyè pa gô krosi, w’avungi ezôga gô ker’ ingoy sè, ko igamba ny’ôvogisi twa rèti nyi bulya inè: W’ager’ingoy sam̃, avung’ezôga g’ômwanja wi kôtô yam̃.

³⁶ N’alwaṉi waô baru, avônègè vovo.

³⁷ Gô teve ntiṉa y’ôgari wè, w’arèndi gw’igôṉô ny’ ewônjô zè, inè: Wiṉo ne Yesu, y’ôga w’Iju.

³⁸ Aṽanyô kè na yè gô krosi kuya ṽaṉi, em̃ori g’ôgo wè ôṉôm̃yè, n’em̃ori g’ôgo wè ônyantwè.

³⁹ Na waô w’avyagaṉagi w’aroṽi yè, awizawize wônjô yaô, awulya inè:

⁴⁰ Awè yi saze nagô y’Anyambyè, arô nôga yô ni ntyugu ntyarô, zungiṉ’ôkuṽi wom̃è! J’awè Ômwaṉa w’Anyambyè, zum̃iṉa avila gô krosi!

⁴¹ Imiṉisè impôlô, n’irèndisi n’aṉèro w’azèlyi yè kè, awulya inè:

⁴² Azungiṉ’aṉag’am̃ori, ayolye sungiṉ’ôkuṽi wèmè! J’ayè n’ôga w’Israèl, e ga zum̃iṉe avila gô krosi, gambèṉè azwè be bekelyè.

⁴³ Aṽekelyi Anyambyè, sambô Anyambyè e ga zungiṉe yè, j’atondè. Konde awulyi nè: Myè ’mwaṉa w’Anyambyè.

⁴⁴ Kuya kè y’aṽanyô na yè gô krosi, y’aroṽi yè kè egolaṉi mèmô.

⁴⁵ Arweṉi mpiri gô ntye yôdu avila gw’igwèra ny’ ôrôṽa kwanga gw’igwèra ny’eṉôgôm̃i.

⁴⁶ Na gw’igwèra ny’eṉôgôm̃i arôngi Yesu n’inyôy ivôlô inè: Eli, Eli, lama sabaktaṉi? mi pivya inè: Anyambyè yam̃, Anyambyè yam̃, ntiṉa nde yi re wè fala pa myè?

⁴⁷ Awèwo gôre waô w’avegagi vovo gôre, gw’ayogyô waô, w’awulyi nè: Ôma wiṉo e fwey’Eliya.

⁴⁸ N’ôm̃ori gôre waô azunge pali mangô, awong’eponzi, ayônya yô ni vinègre, awela yô gô ntôngô, ayonjè.

⁴⁹ Ndô am̃ori w’awulyi nè: Riga, azwè ga yeṉeṉi twa pa Eliya e be bya gô sungiṉè.

⁵⁰ N’arô tôngi Yesu n’inyôy ivôlô, n’azuli yè ômwèy.

⁵¹ Na vôna, ôṉamba w’avegagi diviṉô pa gô mbôra y’ôrund’ômpôlômè, w’ayarwi mbèy mbaṉi avila gw’igôṉô kwanga gô ntye, n’azugyazugyi ntye, n’adô m’ayarwayarwi,

⁵² n’aṉungw’irôngiṉô, n’ikuṽ’imyenge y’aṉag’aṽya w’avegagi juwa pa y’arôngwi.

⁵³ W’agogwi avila gw’irôngiṉô, Yesu tôngwa pa, ayingiṉa gô nkala y’ôrunda, awôm̃unya gôr’ awenge.

⁵⁴ N’ôma w’avegagi gw’ewônjô z’isozè, na waô w’avegagi na yè gô bèmbe Yesu, gw’ayeṉi waô isugyazugya si ntye n’isam̃u y’arweṉi, w’aryeṉi pôlô, awulya inè: Giligili, wiṉo Ômwaṉa w’Anyambyè.

⁵⁵ Vovo avegagi antô awenge mpônaga davadavye, w’azôngi Yesu avila gô Galile, gô janjiṉè.

⁵⁶ Gôre waô avegagi wa Marya yi Magdala, na wa Marya, yi ngwè yi Yakobu ni Yôsès, ni ngwè y’awaṉa wi Zebeday.

⁵⁷ Nkôlô aṽyeṉ’eṉam̃i z’ôma w’Arimate, ini nyè ne Yôsèf; ayèmè kè avegagi ôṉèngi wi Yesu.

⁵⁸ N’ayingiṉi yè gôre Pilatu, aṽamby’ôkuṽa wi Yesu. N’azômbyi Pilatu inè, wi ga vô yè.

⁵⁹ N’awongi Yôsèf ebende, avinga zô n’ivèla nya pupu,

⁶⁰ alimbiṉa zô g’ôrôngiṉô wèmè ômwoṉa w’arôkyô yè gw’idô. N’agaṽalyi yè idw’ivôlô g’ômpômbala w’ôrôngiṉô, n’agèndi yè.

⁶¹ Marya yi Magdala, ni Marya mori w’avegagi vovo dwaṉa pa baru swaswo n’ôrôngiṉô.

⁶² Bunya, ntyugu y’ikekiza vyagaṉô, alataṉ’imiṉisè impôlô n’ ifarisi gôre Pilatu, awulya inè:

⁶³ Rera, azw’ajônginyi nè, ôremisi wiṉo gw’avegagi yè bo awulyi nè, ntyugu ntyarô vyagaṉô, mi be tôngwa.

⁶⁴ Sambô zômbya inè, ôrôngiṉô wi ga venjavenjô kwanga gô ntyugu yi ntyarô, ko iṉèngi yè y’aṽya gô juf’ebende, awuliny’aṉaga inè: Atôngwi avila gw’ijuwa. Ifwem̃’iṉum̃uṉa siṉo sô ko dwaṉ’ibe vyagaṉô n’ idônga.

⁶⁵ Pilatu awulinyi waô inè: Aṉw’are n’iṽèmbisi; gèndaṉi, ko bèmbaṉi wô, ga nte bela ṉwè.

⁶⁶ N’agèndi waô, ayoliz’ôrôngiṉô, aziny’ elingilyô gw’ idô, alôṽy’ aṉaga gô bèmba.