Matay 26 - Bibili 1927 (Omyene)

¹ Arweṉi gw’am̃azi Yesu agamba miṉo môdu, awulinyi yè iṉèngi yè inè:

² Aṉw’avôrô inè, ntyugu mbaṉi vyagaṉô, gambèṉè Paki y’adwaṉa, n’Ômwaṉa w’ôma e be piṉô gô banyô gô krosi.

³ Vovo alataṉ’ imiṉisè impôlô n’aṉèro w’aṉaga, gw’ evungu zi miṉisè mpôlô, y’aweyôgô inè, Kayifa;

⁴ n’awôndi waô môndo gô kôte Yesu n’avôṉô gô jôṉè.

⁵ Ndô w’awulyi nè: Aranga gw’egômbe zi fèti, aṉaga wi vende kwez’edungu.

⁶ Gw’avegagi Yesu gô Betani, gô nagô yi Simôn y’avegagi ni nkaṉi ya gelô,

⁷ aṽyeṉ’ômwantô gôre yè, n’eva z’agali mi nkangô m’avegagi ni njôni mpôlô; na gw’avegagi Yesu gô tavulu y’inya, ômwantô ayiri mô gw’ ewônjô zè.

⁸ Ndô gw’ayeṉ’iṉèngi igamba mè, w’aṽendi awulya inè: Mbundakaṉi yiṉo yi re ntiṉa nde?

⁹ Konde agali miṉo m’arô kôlyô n’igumb’inyenge, ko nyô pô gôr’ikuge.

¹⁰ Ndô gw’amyeṉi Yesu, awulinyi waô inè: Ntiṉa nde yi jeṉiza ṉwè ômwantô wiṉo ekèṽa? Are denda p’ igamb’iṽya gôre myè;

¹¹ konde aṉw’are n’ikuge egômbe zôdu, ndô myè zele na ṉwè egômbe zôdu.

¹² Gw’ajirè agali miṉo g’ôkuṽi wam̃, are denda pa yeṉo gw’ibèṉô sam̃.

¹³ Rèti mi bulinya ṉwè inè, mbôry’edu yi be kambiṉô ntyangô mbya yiṉo, gô ntye yôdu, igamba nyiṉo kè nyi be takilyô gô jônginy’ ômwantô wiṉo ga nt’are yè denda pa.

¹⁴ Egômbe mè ôm̃ori w’igôm̃i n’aṽaṉi, aweyôgô inè, Yudas Iskaryot, agèndi gôr’imiṉisè impôlô awulya inè:

¹⁵ Aṉwè be pa myè sè, ko mi nozè gôre ṉwè? N’aveṉi waô yè agôm̃i m’idolè s’imyanga ararô.

¹⁶ N’avila gw’egômbe mè, Yudas awutag’egômb’eṽya gô kôtize Yesu.

¹⁷ Gô ntyugu nônga yi mpèmba yi re levèn fo, aṽyeṉ’iṉèngi gôre Yesu, awulya inè: Ô bela zwè gô kekiza gôre wè gô nye Paki na gweṉi?

¹⁸ N’awiṉizi yè inè: Gèndaṉi gô nkala gôre rekadyè, ko bulinyaṉi yè inè: Rerè e bulya inè: Egômbe zam̃ z’atweṉi pyèrè, mi be pange Paki n’iṉèngi yam̃ gô nagô yo.

¹⁹ N’alend’ iṉèngi ga nt’azômbyô waô ne Yesu, n’agekizi waô Paki.

²⁰ Nkôlô alwaṉi yè gw’inya ayè n’igôm̃i ny’iṉèngi n’iṉèngi mbaṉi.

²¹ Gw’anyeṉagi waô, awulyi nè: Rèti mi bulinya ṉwè inè, ôm̃ori gôre ṉwè e be kôtiza myè.

²² N’ayeṉi waô ekèṽ’evôlô, n’avakilyi ôm’edu gô bulinyè inè: Myè Rera?

²³ N’awiṉizi yè inè: Ayè y’aduṽy’ôgo na myè gô ntyèngè, ayè mèmô be kôtiza myè.

²⁴ Ômwaṉa w’ôma e kènda ga nt’are tèndô pa g’ômwanji wè. Ndô azile gôr’ôma mè e kôtiz’Ômwaṉa w’ôma! Arô dwaṉi mbya gôr’ôma mè inè, e pa jaṉô.

²⁵ Awiṉizi Yudas y’agôtizè inè: Myè, Rera? Awiṉizyô yè ne Yesu inè: Èñ, nt’abulyo.

²⁶ Gw’anyeṉagi waô, Yesu awongi mpèmba, n’ayè pa p’akeṽa, am̃oguṉi yô, ava yô gôr’iṉèngi, awulya inè: Wongaṉi ko nyaṉi, wiṉo n’ôkuṽi wam̃.

²⁷ N’awongi yè imogi, n’ayè pa p’akeṽa, aveṉi nyô gôre waô, awulya inè: Yongaṉi gô nyô, aṉwèdu;

²⁸ konde nyiṉo ne ntyiṉi yam̃, ntyiṉa yi njeka, yi pôvizô g’ômwanja w’awenge, gw’inyeza s’ibe.

²⁹ Mi bulinya ṉwè inè, my’ayonge nyèṉè ilônda yiṉo y’ôgoli, kaô gô ntyugu mè yi be jonga myè yô imyoṉa na ṉwè gw’iṉongo nya Reri yam̃.

³⁰ Waô jemba p’ôwembô w’agogwi agènda gô nômba yi yôlivi.

³¹ Vovo awulinyô waô ne Yesu inè: Aṉwè du aṉwè be sogizô g’ômwanji wam̃ ôgwèra wiṉo; konde re tèndô pa inè: Mi be bôl’ôvenjavenji w’dombè, ko adombè m’ôlemba pazangaṉô.

³² Ndô myè tôngwa pa, mi be kènda gô bôsô yaṉi gô Galile.

³³ N’awiṉizi Pyère awulinyè inè: Ja waôdu w’asogizô g’ômwanji wo, my’azogizô du.

³⁴ Awulinyô yè ne Yesu inè: Rèti, mi bulinyo inè: Ôgwèra wiṉo, njogoṉi gôgaga ro, ô be danda myè nyongo ntyarô.

³⁵ Pyère awulinyi yè inè: Vangane my’ajuwa na wè, my’alande wè. Yeṉo kè awuly’iṉèngi yôdu.

³⁶ Vovo aṽyeṉi Yesu na waô gô mbôra yi fweyô inè, Gètsemane, n’awulinyi yè iṉèngi yè inè: Lwaṉaṉi baru vèṉo gô be kènda myè gô kambiṉa.

³⁷ N’awongi yè Pyère n’awaṉ’aṽaṉi wi Zebeday, avakilya gô jeṉ’ekèṽa n’añandi.

³⁸ Vovo awulinyi yè waô inè: Iṉiṉi nyam̃ nyi jeṉ’ ekèṽ’evôlô kwanga gô juwa; rigaṉaṉi vèṉo, ko bèmbagaṉi na myè.

³⁹ N’agèndi yè gô bôsô kwè, avôsuny’ôzô wè gô ntye, agambiṉa inè: Reri yam̃, ja ny’ajolyô, imogi nyiṉo nyi ga vyagaṉe avila gôre myè. Ndô arange nte bela myè, ndô nte belo.

⁴⁰ N’aṽyeṉi yè gôr’iṉèngi, aliṽinya waô gw’antyôviṉô, n’awulinyi yè Pyère inè: Sambô, aṉw’ayolye bèmbe na myè igwèr’im̃ori?

⁴¹ Ṽèmbagaṉi ko kambiṉaṉi, ko ṉw’agweṉa gw’isoryô; iṉiṉa nyi re keka pa, ndô ôzôṉe wi re dèla.

⁴² N’arô kèndi yè nyongo yi mbaṉi, agambiṉa inè: Reri yam̃, j’imogi nyiṉo ny’ayolye pyagaṉe, kaô my’ajonga nyô, ntondiṉi yo yi ga lendô!

⁴³ N’arô byeṉi yè, aliṽinya waô gw’antyôviṉô, konde antyo maô m’avegagi dira.

⁴⁴ N’arigi yè waô, arô kènda, agambiṉe nyongo yi ntyarô, nkambag’agamba mèmô.

⁴⁵ Vovo aṽyeṉi yè gôr’iṉèngi yè, awulinya waô inè: Aṉwè dèwa vèṉo, ayowa! Vônaṉi, igwèra ny’atweṉi, n’Ômwaṉa w’ôma aṉozyô gw’ago m’aṉag’aṽe.

⁴⁶ Gum̃aṉaṉi, gèndôṉi; vônaṉi, ayè yi kôtiza myè atweṉi pyèrè.

⁴⁷ Gw’agambagi yè, vôna, Yudas, ôm̃ori w’igôm̃i n’aṽaṉi, aṽyeṉi n’aṉag’awenge na yè n’ikwara ni viso, avila gôr’imiṉisè impôlô n’aṉèro w’aṉaga.

⁴⁸ N’ayè y’agôtizi yè aliwô apeṉi waô elingilyô inè: Ayè yi be sombô myè, ne yè; gôtaṉi yè ngwasi.

⁴⁹ N’aṽyeṉi yè pelè gôre Yesu, awulinyè inè: Mbôlô, Rera! N’azombyè yè.

⁵⁰ N’awulinyô yè ne Yesu inè: Ndeg’wam̃! ntiṉa nde y’abyo vèṉo? Vovo aṽyeṉi aṉaga mèwoṉo, araly’ago gôre Yesu, agôtè.

⁵¹ Na vôna, ôm̃ori avila gôre waô w’avegagi ni Yesu, alam̃iṉ’ôgo wè, agoguny’ôkwari wè; n’agwèri yè nyôngô yi miṉisè mpôlô, areṉ’ôrôy wè nkwe.

⁵² Vovo awulinyô yè ne Yesu inè: Wiz’ôkwari wo gw’egôrô; konde waôdu wi kôt’ôkwara wi be jôṉô n’ôkwara.

⁵³ Ô pikilya nè, my’ayolye bambye Reri yam̃, ko yè pe myè gôtèvèṉo vyagaṉô n’igôm̃i ny’inkumba ni nkumba mbaṉi s’iyenjèl?

⁵⁴ Ndô irèndo yô ko twa rèti sè inè, ga lwaṉe yeṉo?

⁵⁵ Gw’egômbe mèzoṉo, Yesu awulinyi aṉaga inè: Aṉw’abya n’ikwara n’iviso gô kôta myè egolaṉi gôr’ekuya. Ntyugw’edu my’avegagi dwaṉa pa baru na ṉwè, nènjaga gô nagô y’Anyambyè, ko ṉw’agôta myè.

⁵⁶ Ndô isam̃u yiṉo yôdu yi twa inè, irèndo y’ivogisi yi ga rwe rèti. Vovo iṉèngi yôdu y’arigi yè, awanga.

⁵⁷ Waô w’agôti Yesu w’aviṉi yè gôre Kayifa, yi miṉisè mpôlô, mbôra y’avegag’irèndisi n’aṉèro dataṉa pa.

⁵⁸ Ndô Pyère azôngi yè davadavye kwanga gw’evungu zi nagô yi miṉisè mpôlô, n’ayingiṉi yè gôgô, alwaṉa baru na mongi w’agôti Yesu gô jeṉa nte be twa.

⁵⁹ Imiṉisè impôlô n’ôvagô wôdu w’awutag’iyeṉi y’inôka yi sire Yesu, gô jôṉè.

⁶⁰ Ndô vangaṉe gw’aṽyeṉ’iyeṉ’imyenge y’inôka, wi re dènge.

⁶¹ Avila vovo aṽyeṉ’iyeṉi y’inôka imbaṉi, awulya inè: Ôma wiṉo awulyi nè, myè ko saze nagô y’Anyambyè, arô nôga yô ni ntyugu ntyarô.

⁶² N’agum̃aṉi miṉisè mpôlô awulinyè inè: Ô re fwiṉiz’igamba gw’isam̃u yiṉo yi takilyô ne mongi siṉo g’ômwanji wo sè?

⁶³ Ndô Yesu alwaṉi dodo. N’awulinyô yè ne miṉisè mpôlô inè: Mi sômbyo, gw’ina ny’Anyambyè ya bo, inè, wulinya zwè j’awè ne Krist, y’Ômwaṉa w’Anyambyè.

⁶⁴ Yesu awulinyi yè inè: Èñ, nte bulyo. Ndô mi bulinya ṉwè kè inè: Avila vèṉo aṉwè be jeṉ’Ômwaṉa w’ôma baru g’ôgo ôṉôm̃yè w’Anyambyè yi ngulu; aṉwè be jeṉè kè e bya gô vindi y’ôrôṽa.

⁶⁵ Vovo ayôkuṉi miṉisè mpôlô ingoy sè, awulya inè: Are pèdya p’Anyambyè! Azw’are n’isolo nde ny’iyeṉi? Vônaṉi vèṉo, aṉw’ajogyô ipèdya si pèdyô Anyambyè.

⁶⁶ Aṉwè tanga sè? Awiṉizi waô inè: Are n’inyanga nyi juwa.

⁶⁷ Vovo arônyi waô yè igwaṉa g’ôzô, awôlè, n’am̃ori w’awôli yè asapôga, awulya inè:

⁶⁸ Krist, voga; abôlo mande?

⁶⁹ Alwaṉi Pyère gw’igala gw’evungu. N’aṽyeṉi nyôngô nyantô, y’ayandam̃iṉag’iguge, gôre yè, awulya inè: Awè kè w’avegagi ni Yesu ya mwô’Galile.

⁷⁰ Ndô alandi gw’azô m’aṉaga waôdu, awulya inè: My’amye nt’akambo.

⁷¹ Na gw’agogwi yè g’ômpômbala, ayenyô ne nyôngô nyantô nyèṉè, n’awulinyi yè waô w’avegagi vovo inè: Ôma wiṉo kè avegagi ni Yesu yi Nazarèt.

⁷² N’arô dandi yè n’ôrangô inè: Mi pa my’ôma mèwoṉo.

⁷³ Mw’ôlingô vyagaṉô, waô w’avegagi gôre w’aṽyeṉi, awulinye Pyère inè: Rèti giligili awè kè ôm̃ori gôre waô, konde nkambiṉi yo yi pango myô.

⁷⁴ Vovo avakilyi yè gô tang’irangô nè: Mi pa my’ôma mèwoṉo. N’agôgi njogoṉi pelè.

⁷⁵ N’ayônginyi Pyère igamba ny’awulinyô yè ne Yesu inè: Njogoṉi gôgaga ro, ô be danda myè nyongo ntyarô. N’agogwi yè gw’igala aleṉa n’ekèṽ’evôlômè.