Matay 25 - Bibili 1927 (Omyene)

¹ Egômbe mè iṉongo ny’ôrôṽa nyi be kolaṉô n’igôm̃i ny’azali, m’awong’ ilambi saô agènda gô dataṉa n’ôṉôm̃e jômba.

² Ataṉè gôre waô w’avegag’item̃u, n’ataṉè kè ikeli.

³ Item̃u, gw’awongi waô ilambi saô wi pa bong’agali na sô;

⁴ ndô waô w’ikeli w’awong’agali gw’imbute saô n’ ilambi saô ta.

⁵ Na gw’alingagi ôṉôm̃e jômba, waôdu w’am̃ègi alèw’ antyôviṉô.

⁶ Ndô ôgwèra ṉengeṉenge arweṉi mbôgiṉa inè: Vônaṉi, ôṉôm̃e jômba e bya, gèndaṉi gô dataṉa na yè!

⁷ Vovo aṉongwi azali mèmoṉo môdu, avang’ ilambi saô.

⁸ N’item̃u w’awulinyi m’ikeli inè: Vaṉi zwè agali avila gw’agali maṉi, konde ilambi sazô s’aṉim̃i.

⁹ Ndô m’ikeli m’awiṉizi nè: Nyawè, mi vende dwaṉa m’ageka na zwè na ṉwè; rô kèndeṉi gôre mongi kôla, ko kôlaṉ’im̃aṉi.

¹⁰ Na gw’ agèndi waô gô kôla, aṽyeṉi ôṉôm̃e jômba; na waô w’avegagi keka pa w’ayingiṉi na yè gô ñanja y’ijômbaṉa, n’aṉunjyô iguge.

¹¹ Avila vovo, aṽyeṉi kè azali am̃ori, awulya inè: Rera, Rera, ṉunguṉa zwè iguge.

¹² Ndô awiṉizi nè: Giligili mi bulinya ṉwè inè: My’amye ṉwè.

¹³ Sambô ṽèmbagaṉi, konde aṉwè pa mye ntyugu ge igwèra.

¹⁴ Yi be dwaṉa g’ôma e kènd’ôgèndo gô ntye nyèṉè, e fwey’inyôngô sè, ava sô igumbi nyè.

¹⁵ N’aveṉi yè ôm̃ori talènt’ôtaṉè, n’ôm̃ori mbaṉi, n’ôm̃ori mori, gôr’ôm’edu ga nt’avegagi ngulu yè, n’agèndi yè pelè.

¹⁶ N’agèndi yè y’avenyô talènt’ôtaṉè agôl’ôkita na sô, n’alèngi yè italènti sinyèṉè ôtaṉè.

¹⁷ Egolaṉi mèmô kè ayè y’avenyô talènti mbaṉi alèngi sinyèṉè kè mbaṉi.

¹⁸ Ndô ayè y’avenyô mori, agèndi arumba gô ntye, ayumbuṉe sika ya reri yè.

¹⁹ Ôling’ôla vyagaṉô, aṽyeṉi rerè y’inyôngô mè, aṽambya waô ntangô.

²⁰ N’aṽyeṉi ôm’avenyô talènt’ôtaṉè, aṽag’italènti sinyèṉè ôtaṉè, awulya inè: Rera, w’aveṉi myè talènt’ôtaṉè, vôna, my’are dènga p’italènti sinyèṉè kè ôtaṉè.

²¹ Reri yè awulinyi yè inè: Mbyambye, awè nyôngô mbya na y’ibekelyô; ô re dwaṉa p’ôma w’ibekelyô gô yom̃a yèwo, mi be dôṽyo ewônjô zi yom̃a yenge; gweṉa gô mbya ya reri yo.

²² N’aṽyeṉi yè kè y’avenyô talènti mbaṉi, awulya inè: Rera, w’aveṉi myè talènti mbaṉi, vôna, my’are dènga p’italènti sinyèṉè kè mbaṉi.

²³ Reri yè awulinyi yè inè: Mbyambye, awè nyôngô mbya na y’ibekelyô; ô re dwaṉa p’ôma w’ibekelyô gô yom̃a yèwo, mi be dôṽyo ewônjô zi yom̃a yenge; gweṉa gô mbya ya reri yo.

²⁴ N’aṽyeṉi yè kè y’avenyô talènti mori, awulya inè: Rera, my’amyeṉi nè, awè ôm’ôyoli, ô teṉe mbôra yi re wè pa bèṉa, agum̃inya kè avila gô mbôra yi re wè pa pazangaṉa;

²⁵ n’aryeṉi myè, agènda, ayumbuṉe talènti yo gô ntye; vôna, wong’ezom̃i zo.

²⁶ Ndô reri yè awiṉizi yè inè: Awè, nyôngô mbe n’ôgera, w’amyeṉi nè, mi teṉe mbôra yi re myè pa bèṉa, agum̃inya avila gô mbôra yi re myè pa pazangaṉa;

²⁷ sambô arô dwaṉi kwèkwè gôre wè gô fwele siki yam̃ gôre mongi pendakaṉ’idolè, gambèṉè gw’ibyi sam̃ my’atô dèngi yam̃im̃è n’ôba ta.

²⁸ Sambô wongiṉaṉi yè talènti mè, ko paṉi yô gôr’ôma re n’igôm̃i ny’italènti.

²⁹ Konde ayè yi re dènga pa e be pô, ko yè bunyô, ndô ayè yi re e zele dènga pa, vangaṉ’ezom̃a zi re na yè, zi be bongiṉô yè.

³⁰ Walaṉi kè nyôngô y’isolo fo mèyo gô mpiri ya doṽadoṽa; gôgô be dwaṉ’edingô ni nkègèrè y’anô.

³¹ Ndô gô be by’Ômwaṉa w’ôma gw’ivendi nyè, n’iyenjèl sôdu na yè, vovo e be dwaṉa baru gw’eka z’ivendi nyè.

³² N’aṉongo môdu mi be datizô g’ôzô wè, ko yè kera waô ga nte ker’ôvenjavenji w’adombè ager’adombè avila gw’imbôṉi;

³³ e be dôṽy’ adombè g’ôgo wè ôṉôm̃yè, n’imbôṉi g’ôgo wè ônyantwè.

³⁴ Vovo ôga e be bulinya waô wi re g’ôgo wè ôṉôm̃yè inè: Yôgôṉi, aṉwè yi re saviṉô pa ne Reri yam̃; ko nivaṉ’iṉongo ny’agekizyô ṉwè avila gw’idôṽyô si ntye.

³⁵ Konde my’ayogyô njaṉa, ko ṉwè pa myè inya; my’agôtyô n’esôve, ko ṉwè jonja myè; my’ avegag’ ôgènda, ko ṉwè jinginya myè;

³⁶ my’avegagi tele, ko ṉwè nwanya myè; my’ayogyô nkaṉi, ko ṉwè bala myè; my’avegagi gô ntyôgô, ko ṉwè bya gô jeṉa myè.

³⁷ Vovo agôre wi be fwiṉizè inè: Rera, egômbe ze z’ayeṉi zwè wè ni njaṉa, ko zwè nyezo? ge kôtô pa n’esôve, ko zwè jonjo?

³⁸ Egômbe ze z’ayeṉi zwè wè ôgènda, ko zwè jinginyo; ge tele, ko zwè nwanyo?

³⁹ Egômbe ze z’ayeṉi zwè wè ni nkaṉi, ge gô ntyôgô, ko zwè byagaga gôre wè?

⁴⁰ Ndô ôga e be fwiṉiza waô inè: Giligili mi bulinya ṉwè inè, nyongw’edu y’alendyô ṉwè isam̃u yiṉo gôr’ôm̃ori avila gôr’ awareri yam̃ wiṉo awangô mè, aṉw’alendi yô gôre myè.

⁴¹ Avila vovo e be bulinya waô wi re g’ôgo wè ônyantwè inè: Lubwaṉi avila gôre myè, aṉwè yi re savô pa; gèndaṉi g’ôgôṉi w’egômbe zôdu w’agekizyô gôre Satan n’iyenjèl sè.

⁴² Konde my’ayogyô njaṉa, ko ṉw’ava myè inya; my’ agôtyô n’esôve, ko ṉw’ayonja myè;

⁴³ my’avegag’ôgènda, ko ṉw’ayinginya myè; my’avegagi tele, ko ṉw’aṉwanya myè; my’avegagi ni nkaṉi na gô ntyôgô, ko ṉwè aṽala myè.

⁴⁴ Vovo wi be fwiṉiza kè inè: Egômbe ze z’ayeṉi zwè wè ni njaṉa, ge n’esôve, ge ôgènda, ge tele, ge ni nkaṉi, ge gô ntyôgô ko zwè aṉunguṉo?

⁴⁵ Ndô e be fwiṉiza waô inè: Giligili mi bulinya ṉwè inè, nyongw’edu yi re ṉwè e pa dend’isam̃u yiṉo gôr’ ôm̃ori avila gôr’awareri yam̃ wiṉo awangômè, aṉwè pa dende yô kè gôre myè.

⁴⁶ Wiṉo wi be kènda gw’azingô m’egômbe zôdu, ndô agôre gw’em̃èṉo z’egômbe zôdu.