Matay 16 - Bibili 1927 (Omyene)

¹ Aṽyeṉ’ifarisi n’isadusi gôre Yesu gô dembè, aṽambyè gô tum̃inya waô elemba avila g’ôrôṽa.

² Awiṉizô waô ne Yesu inè: Nkôlô, aṉwè bulya inè: E be dwaṉ’ôgwèr’ômbya, konde ôrôṽa wi re teṉateṉa;

³ n’ibanga inè: Ôwenj’ôṽe ṉèṉo, konde ôrôṽa wi re teṉateṉa ni bogubogu. Aṉwè imbyagwaṉa, aṉw’ avôrô gô kèlagèl’ôzô w’ôrôṽa, ndô aṉwè pa jolya gô kèlagèle lingilyô yi gômbe.

⁴ Ivôm̃’iṽe na ny’ôṽelaṉô nyi bamby’elemba, ndô ny’ avô elemb’ezèṉè kaô elemba zi Yôna. N’arigi yè waô agèndaga.

⁵ Gw’alali iṉèngi yè gô ntye mori, w’aleṽaṉi gô bonge mpèmba.

⁶ N’awulinyô waô ne Yesu inè: Ṽandam̃iṉaṉi ko kelim̃aṉi gô levèn y’ifarisi n’isadusi.

⁷ N’agambaṉagi waô awulya inè: E kamba yeṉo konde azwè pa bonge mpèmba.

⁸ N’amyeṉi Yesu, awulya inè: Aṉwè y’ibekely’ijangô, ntiṉa nde yi kambaṉa ṉwè inè, konde aṉwè pa bonge mpèmba?

⁹ Kwanga na ṉèṉo aṉwè pa kôtiza ge jônginya amunga mi mpèmba ataṉè gôr’intozèny s’aṉaga ôtaṉè, ni ntangô y’itôndô y’agum̃inyô ṉwè?

¹⁰ ge amunga mi mpèmba ôrwageṉô gôr’intozèny s’aṉaga nay, ni ntangô y’itôndô y’agum̃inyô ṉwè?

¹¹ Ezom̃a nde zi re aṉwè agôtiza inè, mi pa kamba na ṉwè g’ômwanja wi mpèmba, ndô inè, gelim̃aṉi gô levèn y’ifarisi n’isadusi?

¹² Vovo agôtizi waô inè, wi ga gelim̃e gô levèn yi mpèmba, ndô gw’ inènja s’ifarisi na s’isadusi.

¹³ Gw’aṽyeṉi Yesu gô ntye yi Sezare yi Filipi, aṽamby’iṉèngi yè inè: Myè Ômwaṉa w’ôma, aṉaga wi bulya nè, myè mande?

¹⁴ Awulyi waô inè: Awèwo inè, Yôan‐Batist; awèwo inè, Eliya; n’awèwo inè, Yeremya ge ôm̃ori gôr’ ivogisi.

¹⁵ Awulinyi yè waô inè: Ndô aṉwè bulya inè: Myè mande?

¹⁶ N’awiṉizi Simôn Pyère inè: Awè ne Krist, y’Ômwaṉa w’Anyambyè ya bo.

¹⁷ Awiṉizi Yesu awulinyè inè: Ôzaviṉô gôre wè, Simôn, y’ômwaṉa wi Yôna, konde ô pa myezô igamba nyiṉo ne ôzôṉe ni ntyiṉa, ndô w’amyezô nyô ne Reri yam̃ yi re g’ôrôṽa.

¹⁸ Mi bulinyo kè inè, awè ne Pyère, na gw’idô nyiṉo mi be nôge mandô yam̃, n’aguge m’ilômbô m’ageṽe yô.

¹⁹ Mi be po kè isape s’iṉongo ny’ôrôṽa: ôsam̃u edu wi be diryô wè gô ntye, wi be diryô g’ôrôṽa, n’ôsam̃u edu wi be puruṉô wè gô ntye, wi be puruṉô kè g’ôrôṽa.

²⁰ Vovo azômbyi yè iṉèngi yè inè, w’amyez’ôm’edu inè, ayè ne Krist.

²¹ Avila gw’egômbe mè avakilyi Yesu gô myez’iṉèngi yè inè, ar’isolo gôre yè gô kènda gô Yerusalèm, ko yè sindiṉ’isam̃u imyenge gôr’aṉèro, na gôr’ imiṉisè impôlô, na gôr’irèndisi, ko yè jôṉô, arôngunyô gô ntyugu yi ntyarô.

²² N’awongyô yè ne Pyère, avakilya gô sèmbè, awulya inè: Anyambyè e ga vôgiṉe wè, Rera! Igamba nyiṉo ny’alwaṉa gôre wè.

²³ Ndô Yesu agegwi, awulinye Pyère inè: Winya gô nyum̃i yam̃, Satan! awè ne ibaku gôre myè, konde ô pa nak’isam̃u y’Anyambyè, ndô isam̃u y’aṉaga.

²⁴ Vovo Yesu awuliny’iṉèngi yè inè: Jog’ôma abele sônga myè, e ga ṉim̃iṉ’ôkuṽi wèmè, ko yè tômbiṉe krosi yè, azônga myè.

²⁵ Konde ôm’edu e bele sungiṉ’em̃èṉo zè, e be periza zô, n’ôm’edu e be periz’em̃èṉo zè g’ômwanji wam̃ e be dènga zô.

²⁶ Konde ôba nde wi re n’ôma, ja anyeṉe ntye yôdu, averiz’iṉiṉi nyè? Ge ande yi r’ôma ko pa gw’avendè m’iṉiṉi nyè?

²⁷ Konde Ômwaṉa w’ôma e be bya gw’ivenda nya Reri yè, n’iyenjèl sè; egômbe mè e be p’ôm’ edu ga nt’ar’ijanji sè.

²⁸ Giligili mi bulinya ṉwè inè: Ar’awèwo gôre waô wi re vèṉo gôre, wi re w’ayuwe, kaô w’ajeṉ’Ômwaṉa w’ôma e bya gw’iṉongo nyè.