Matay 14 - Bibili 1927 (Omyene)

¹ Gw’egômbe mèzoṉo ayogyô Erod yi Tetrark elum̃i zi Yesu.

² N’awulinyi yè inyôngô sè inè: Wiṉo ne Yôan‐Batist! Atôngwi avil gw’ijuwa; yeṉ lemba yiṉo yi dendô yè.

³ Konde Erod aliwô akôti Yôan, agôrè, awelè gô ntyôgô g’ômwanja w’Erôdyas, y’ômwantô wi Filipi, ya mwô’ngi yè,

⁴ konde Yôan awulinyi yè inè, e zele kwèkwè gô jômbè.

⁵ N’aṽelagi yè gô jôṉè, ndô aryeṉ’aṉaga, konde w’awongi Yôan g’ôvogisi.

⁶ Ndô gw’arweṉi ôgeṽe wi ntyugu y’ayanyô Erod, ’mwamwantô w’Erôdyas, ayiṉagi gô garegare yaô, arondye Erod;

⁷ yeṉo arangiṉi yè n’ôrangô gô pè ezom̃’edu zi be bambyè yè.

⁸ N’ayè soryô pa ne ngi yè, awulyi nè: Va myè vèṉo ewônjô zi Yôan‐Batist gw’epèlè.

⁹ Ôga ayeṉ’ekèṽa, ndô g’ômwanja w’irangô yè na g’ômwanja wa waô w’avegagi baru na yè, azômbyi nè, zi ga vô yè,

¹⁰ n’arôm̃i yè, areṉe Yôan ômpele gô nagô yi ntyôgô.

¹¹ N’aṽagyô ewônjô zè gw’epèlè avô gôr’ômwaṉ’ômwantô, n’arwaṉi yè zô gôre ngi yè.

¹² N’aṽyeṉ’iṉèngi yi Yôan gô bong’ebende gô bèṉa zô. N’agèndi waô gô myeze Yesu.

¹³ Gw’ayogyô Yesu ntyangô yiṉo alubwi avila vovo n’elende, agènda gô mbôra y’ôrôve waô anka; na gw’amyeṉi aṉaga yeṉo, w’azôngi yè ni ntye avila gw’inkala.

¹⁴ Na gw’aralwi yè ayeṉ’aṉag’awenge, n’avôgiṉi yè waô aying’inkaṉi saô.

¹⁵ Nkôlô, aṽyeṉ’iṉèngi yè gôre yè, awulya inè: Yiṉo mbôra y’ôrôve, n’ôwenja w’ajili; wiṉiz’aṉaga, ko waô kènda gw’inkala, agôl’inyi saômè.

¹⁶ Ndô Yesu awulinyi waô inè: Wi zele n’isolo nyi kènda; vaṉi waô inya aṉwèmè.

¹⁷ Ndô w’awulinyi yè inè: Azwè aze n’inya vèṉo, kaô amunga mi mpèmba ataṉè, n’intyuè mbaṉi.

¹⁸ N’awulyi yè inè: Ṽagaṉi sô guṉu gôre myè.

¹⁹ N’alwaṉizi yè aṉaga baru gw’am̃aṉi, n’awongi yè amunga mi mpèmba ataṉè n’intyuè mbaṉi, avôna g’ôrôṽa, av’akeṽa. Avila vovo am̃oguṉi yè mpèmba, ava yô gôr’iṉèngi, n’agerizi waô yô gôr’aṉaga.

²⁰ N’anyeṉi waôdu, ayôra, n’agum̃inyi waô nkizi y’arigaṉi, igôm̃i ny’itôndô n’itôndô imbaṉi ralye.

²¹ Na waô w’anyeṉi w’avegagi pyèrè n’intozèny s’aṉôm̃e ôtaṉè, tômbare pa antô n’awaṉa.

²² Azômbyi yè iṉèngi yè gô kweṉa pelè gw’ elende, alalya gô bôsô yè gô ntye mori, gô be fwiṉizè aṉaga.

²³ Ayè fwiṉiza p’aṉaga, avandi gô nômba gô kambiṉa ayè anka; na gw’ayili ôwenja avegagi gôgô ayè dadyè.

²⁴ Ndô elende z’aliwô z’atweṉi gô mbegare y’eliṽa, mbôlangaṉaga n’ikeṽa, konde ômpunga w’avegagi apekwa na waô.

²⁵ Ayenjiṉa, aṽyeṉi Yesu gôre waô, njaraga gw’eliṽa.

²⁶ Na gw’ayenyô yè n’iṉèngi e jar’eliṽa, w’ayègèryi, awulya inè: Nyiṉo ibambô! N’awôgiṉi waô n’itya.

²⁷ Ndô Yesu azunge kambi na waô awulya inè: Zindyaṉ’irèm̃a, ne myè, aryaṉi!

²⁸ N’awiṉizô yè ne Pyère inè: Rera, jogo ne wè, zômbya nè, mi ga ṽye gôre wè njaraga gw’ aṉingô.

²⁹ N’awulyi yè inè: Yôgô! N’azum̃iṉi Pyère avila gw’elende, ayara gw’aṉingô gô kènda gôre Yesu.

³⁰ Ndô gw’ayeṉi yè ômpung’ômpôlô aryeṉi; na gw’avakilyi yè gô dom̃iṉa, arôngi nè: Rera, zungiṉa myè.

³¹ N’azunge daṽiṉi Yesu ôgo, agôtè, awulinyè inè: Awè y’ibekely’ijangô, ntiṉa nde y’adôṽo mpaga?

³² N’agweṉi waô gw’elende, n’ayèki ômpunga.

³³ Na waô w’avegagi gw’elende w’azaviṉi Yesu, awulya inè: Giligili awè n’Ômwaṉa w’Anyambyè.

³⁴ Waô dalya p’eliṽa w’aṽyeṉi gô ntye yi Genezarèt.

³⁵ Aṉaga wi mbôra mè gw’amyeṉi waô Yesu, w’arôm̃’agende gô ntye yôdu vingôvingô, aṽagi waô gôre yè aṉaga waôdu w’avegagi n’inkaṉi.

³⁶ N’agweni waô yè inkolo inè, wi ga gôte vangaṉe ôgômbiṉô wi ngoy yè. Na waôdu w’agôti wô w’arôli.