Matay 13 - Bibili 1927 (Omyene)

¹ Gô ntyugu mèmô agogwi Yesu avila gô nagô, alwaṉa baru g’ôzamba w’eliṽa.

² N’alataṉi aṉag’awenge gôre yè, yeṉo agweṉi yè gw’elende, alwaṉa baru. N’agum̃aṉi aṉaga waôdu g’ôzègè.

³ N’agambiṉi yè waô isam̃u imyenge n’inkôgô, awulya inè:

⁴ Vônaṉi ônyènyisi agèndi gô nyènya. Na gw’anyènyagi yè, ilônd’imyèwo y’avôswi gô mpoṉo, n’aṽyeṉ’ inyoṉi anya yô.

⁵ N’imyèwo y’avôswi gw’imbôra s’adô si re si re pegege ni ntyèngè nyenge, n’azunge fwelyi yô, konde yi re pegege ni ntyèngè nyenge;

⁶ ndô gw’ arongwi nkômbe y’avezyô ayôm̃a, konde yi re pegege n’iramba.

⁷ N’imyèwo y’avôswi gw’arèndè: n’avôm̃i arèndè, araga yô.

⁸ N’imyèwo kè y’avôswi gô ntyèngè mbya: n’ayaṉi yô ilônda, intyw’ im̃ori nkam̃a, n’intyw’ im̃ori agôm̃i ôrôṽa, n’intyw’ im̃ori agôm̃i ararô.

⁹ Ayè yi re n’arôy gô jogo e ga yogo.

¹⁰ Aṽyeṉ’iṉèngi yè awulinyè inè: Ntiṉa nde yi kambo na waô n’inkôgô?

¹¹ Awiṉizô waô ne Yesu iṉè: Konde aṉw’ are pô pa gô my’ayumbuṉô m’iṉongo ny’ôrôṽa, ndô gôre waô e zele pô pa.

¹² Konde ayè yi re dènga pa e be pô, ko yè bunyô, ndô ayè yi re e zele, vangaṉ’ezom̃a zi re na yè zi be bongiṉô yè.

¹³ Gô ntiṉa yiṉo mi kôviṉa waô inkôgô, konde gô jeṉa waô wi pa jeṉa, na gô jogo waô wi pa jogo ge kôtiza.

¹⁴ Na gôre waô ipoga si Yezaya si twa rèti si bulya inè: Gw’ijogo aṉwè be jogo, ko ṉw’agôtiza; na gw’ipôna aṉwè be pôna, ko ṉw’ayeṉa.

¹⁵ Konde irèm̃a y’aṉaga wiṉo y’apom̃i; wi re joliza p’arôy maô, wi re nunja p’antyo maô, wi vende jena n’antyo maô, ayogo n’arôy maô, agôtiza n’irèm̃i yaô, agalwa, ko mi tôliza waô.

¹⁶ Ndô ôzaviṉô gw’antyo maṉi, konde mi jeṉa, na gw’arôy maṉi, konde mi jogo.

¹⁷ Giligili mi bulinya ṉwè inè, ivogis’imyenge n’aṉag’aṽya w’aṽelagi gô jeṉ’isam̃u yi jeṉô ṉwè, ko w’ayeṉa yô, na gô jogw’isam̃u yi jogo ṉwè, ko w’ayogo yô.

¹⁸ Sambô, yogoṉi nt’ar’ibènguṉa si nkôgô y’ônyènyisi.

¹⁹ Gô jog’ôm’edu igamba ny’iṉongo, ko agôtiza nyô, vovo by’ Iṉiṉ’iṽe azwa igamba nyi re nyènyô pa g’ôrèm̃i wè: wiṉo ne yè anyènyô gô mpoṉo.

²⁰ N’ayè y’anyènyô gw’imbôra s’adô, ne yè yi jogw’igamba, ko yè sunge bonga nyô ni mbya;

²¹ ndô e zele n’ôramba g’ôkuṽi wèmè, ndô are vo mw’ôlingô, na gô bye njuke ge ikombizô g’ômwanja w’igamba, e pôswa nèganèga.

²² N’ayè y’anyènyô gw’arèndè, ne yè yi jogw’igamba, ko inaka si ntye yiṉo, n’ikombiza s’aṉiva tag’igamba, ko nyô twe nkele.

²³ N’ayè y’anyènyô gô ntyèngè mbya, ne yè yi jogw’igam a, agôtiza nyô; e jaṉ’ilônda, intyw’im̃ori nkam̃a, n’intyw’ im̃ori agôm̃i ôrôṽa, n’ intyw’ im̃ori agôm̃i ararô.

²⁴ Agôviṉi yè waô nkôgô nyèṉè, awulya inè: Iṉongo ny’ôrôṽa nyi r’egolaṉi g’ôma w’anyèny’ ilônd’imbya gô ntyagi yè.

²⁵ Ndô gw’alèwagi aṉagi wè, aṽyeṉi ôlôvalôvi wè, anyèny’ ilônd’imbe gô gare y’imbya, agèndaga.

²⁶ Ndô gw’awely’ijavi, ayaṉ’ilônda, vovo ayeṉaṉ’ilônd’imbe kè.

²⁷ N’aṽyeṉ’inyôngô s’ôma w’aṉivi ntyaga awulinyè inè: Rera, ô pa nyèny’ilônd’imbya gô ntyagi yo? Ndô y’adèng’ilônd’imbe na gweṉi?

²⁸ N’awiṉizi yè waô inè: Ôlôvalôvi ayè are denda pe ndaga yiṉo. N’awulinyô yè n’inyôngô mè inè: Ô bela nè azwè ga ge tôduṉe yô?

²⁹ N’awulinyi yè waô inè: Nyawè; gô tôduṉa ṉwè ilônd’imbe, aṉwè vende tôduṉ’ilônd’imbya kè na yô.

³⁰ Rigaṉi yô imbaṉi pôm̃a ta kwanga gw’egômbe z’idula; gw’egômbe z’idula, gambèṉè mi be bulinye mongi wi dula inè: Lônge duleṉ’ilônd’imbe, ko kôraṉi yô n’ata gô peza yô, ndô ṽagaṉ’ilônd’imbya gô nagô yam̃.

³¹ Agôviṉi yè waô nkôgô nyèṉè inè: Iṉongo ny’ôrôṽa nyi r’egolaṉi g’intyo nyi mutardi ny’awongyô n’ ôma, aṽèṉa nyô gô ntyagi yè.

³² Nyi re rèti inyangômè vyagaṉô n’ilônda yôdu; ndô ja ny’apôm̃a, nyi r’ivôlô vyagaṉô n’ôwongw’edu, agalw’erere, ko inyoṉi s’igôṉô bya gô dwaṉa gw’ampari ma zô.

³³ Agôviṉi yè waô nkôgô nyèṉè inè: Iṉongo ny’ôrôṽa nyi r’egolaṉi ga levèn y’awongyô n’ômwantô, awela yô gô gèṉizô yi farinya rarô, gô pange mpèmba yôdu gô panda.

³⁴ Yesu agambiṉ’aṉaga isam̃u yiṉo yôdu n’inkôgô, e pa kamba na waô nkôgô fo,

³⁵ ko igamba ny’agambyô n’ôvogisi twa rèti inè: Mi be nunguṉ’ôgwaṉi wam̃ n’inkôgô, mi be takily’isam̃u y’ayumbuṉô avila gw’ipangô si ntye.

³⁶ Vovo Yesu awiz’aṉaga, n’ ayingiṉi yè gô nagô. N’aṽyeṉ’iṉèngi yè gôre yè, awulya inè: Vènguṉa zwè nkôgô y’ilônd’imbe yi ntyaga.

³⁷ Awiṉizi yè inè: Ayè y’anyèny’ilônd’imbya ne Ômwaṉa w’ôma.

³⁸ Ntyaga ne ntye yiṉo; ilônd’imbya ne awaṉa w’iṉongo; ilônd’imbe ne awaṉa w’ôm’ombe;

³⁹ ôlôvalôvi anyènyi yô ne Satan; egômbe z’idula ne ntyay yi ntye; mongi wi dula ne iyenjèl.

⁴⁰ Sambô ga nte dulô ilônd’imbe ko yô pezô g’ôgôṉi, yeṉo be dwaṉa kè gô ntyay yi ntye.

⁴¹ Ômwaṉa w’ôma e be tôm̃’iyenjèl sè ko sô tômba avila gw’iṉongo nyè abaku môdu, na waô wi janj’ibe,

⁴² awala waô gw’elôngô z’ôgôṉi; gôgô be dwaṉ’edingô ni nkègèrè y’anô.

⁴³ Vovo aṉag’aṽya wi be bamba ga nkômbe gw’ iṉongo nya Reri yaô. Ayè yi re n’arôy gô jogo e ga yogo.

⁴⁴ Iṉongo ny’ôrôṽa kè nyi r’egolaṉi g’igumba nyi re jumbuṉô pa gô ntyaga. Nyi re gô dèngô nyô n’ôma e jumbuṉa nyô; ndô vo mbya ya nyô, e kènda, agôle yom̃a yôdu yi re na yè, ko yè kôle ntyaga mè.

⁴⁵ Iṉongo ny’ôrôṽa kè nyi r’egolaṉi g’ôma wi kôla, e but’adô ambya.

⁴⁶ Are gô dèngè idw’im̃ori nyi njôni mpôlô, e kènda agôle yom̃a yôdu yi re na yè, ko yè kôla nyô.

⁴⁷ Iṉongo ny’ôrôṽa kè nyi r’egolaṉi g’elôṽa pungô pa gô mbeṉe, ko zô datiz’ôṉongw’edu w’intyuè.

⁴⁸ Zi re gô jônya zô, wi dura zô gô ntye, ko waô dwaṉa baru agenj’intyuè imbya gw’ilômbô, ndô imbe wi fala sô.

⁴⁹ Yeṉo be dwaṉa kè gô ntyay yi ntye. Iyenjèl si be bya, aṽanguny’aṉag’aṽe avila gôr’aṉag’ aṽya,

⁵⁰ awala waô gw’elôngô z’ôgôṉi; gôgô be dwaṉ’edingô ni nkègèrè y’anô.

⁵¹ Yesu awulinyi waô inè: Aṉw’akôtiz’isam̃u yiṉo yôdu? Ayiviri waô inè: Èñ, Rera.

⁵² N’awulinyi yè waô inè: Ôrèndisy’edu, sambô, ar nènga p’isam̃u y’iṉongo ny’ôrôṽa, ar’egolaṉi g’ôm’aṉivi nagô, e koguny’avila gw’ igumbi nyè yom̃a yoṉa ni yom̃a lungu.

⁵³ Arweṉi gw’am̃azi Yesu inkôgô siṉo, alubwi avila vovo.

⁵⁴ N’aṽyeṉi yè gô ntye yèmè, aṉènja waô gô nagô yaô yi soṉo, n’am̃ami waô w’ayogyô yè, awulya inè: Imya siṉo ni lemba yiṉo yi re n’ôma wiṉo yi pila na gweṉi?

⁵⁵ Wiṉo arang’ômwaṉa w’ôkèngèkèngè? Ngi yè e pa fweyô inè, Marya? N’awôngi yè aṉôm̃e aranga wa Yakobu, wa Yôsèf, wa Simôn, wa Yudi?

⁵⁶ Ni yombi yè yôdu yi zele gôre zwè? Sambô isam̃u yôdu yi re n’ôma wiṉo yi pila na gweṉi?

⁵⁷ N’aṽendyô waô g’ômwanji wè. Ndô Yesu awulinyi waô inè: Ôvogisi e pèdyô kaô gô ntye yèmè na gô nagô yèmè.

⁵⁸ Yeṉo e pa dende lemba yenge gô mbôra mè g’ômwanja w’itwaṽekelyi saô.