Matay 10 - Bibili 1927 (Omyene)

¹ Aweyi yè igôm̃i nyi rôm̃i ni rôm̃i ṽaṉi, ava waô ngulu gô tômb’aṉiṉa m’isèkè, na gô jinge nkany’edu ni ndèliny’edu.

² Na miṉo ne ana m’igôm̃i nyi rôm̃i ni rôm̃i ṽaṉi. Ôlônga ne Simôn, aweyôgô inè Pyère, n’Andru, ya mwô’ngi yè; Yakobu, y’ômwaṉa wi Zebeday, ni Yôan, ya mwô’ngi yè;

³ Filipi ni Bartelemi; Tôma ni Matay, yi publikan; Yakobu, y’ômwaṉa w’Alifas, ni Lebyus, y’aweyôgô kè inè, Tadyus;

⁴ Simôn, ya mwô’Kanaan, ni Yudas Iskaryot, y’agondi Yesu.

⁵ Mongi siṉo igôm̃i n’aṽaṉi w’arôm̃yô ne Yesu, ayè sômbya pa waô inè: Agèndaṉi gôr’aṉongo, ge jingiṉa gw’inkala sa mongi Samarya;

⁶ ndô gèndaṉi gôr’adombè mi re pera pa mi nagô y’Israèl.

⁷ Na gô kènda ṉwè, gambiṉaṉi awulya inè: Iṉongo ny’ôrôṽa ny’atweṉi pyèrè.

⁸ Rôlizaṉ’ibèli, rôngunyaṉi bende, yombunyaṉi mongi wi re n’inkaṉi sa gelô, rômbaṉ’aṉiṉ’ambe. Aṉwè avenyô mpagaga, vaṉi kè mpagaga.

⁹ Awongaṉi sika ya teṉateṉa, ge ya pupu, ge nyènyè gw’itumbi yaṉi;

¹⁰ ge ngoṽè g’ôgèndo, ge ngoy mbaṉi, ge intyôzô s’atanga, ge ntôngô; konde ôma wi janja are n’inyanga ny’inyi sè.

¹¹ Gô nkaly’edu mpôlô ge nyangô yi be jingiṉô ṉwè, ṽambyaṉi ôma re n’inyanga vovo, ko dwaṉaṉi vovo gôre yè kaô aṉw’ adubwa.

¹² Na gô jingiṉa ṉwè gô nagô, zanguṉaṉi yô;

¹³ na ja nagô y’adwaṉa n’inyanga, am̃ènjè maṉi mi ga ṽye gô yô, ndô ja yi zele n’inyanga, am̃ènjè maṉi mi ga winye gôre ṉwè.

¹⁴ Ndô jog’ôm’edu awonga ṉwè, ge jogw’agambi maṉi, gogwaṉi avila gô nagô mè, ntyo gô nkala mè, ko palaṉi ntyèngè avila gw’agôlô maṉi.

¹⁵ Giligili mi bulinya ṉwè inè: Ntye yi Sôdoma na yi Gômora yi be dwaṉa n’azingô ma kwè gô ntyugu y’ijèkèlya vyagaṉô ni nkala mèyoṉo.

¹⁶ Vônaṉi, mi tôm̃a ṉwè g’adombè gô garegare y’injègo. Sambô lwaṉaṉi ôkeli g’im̃amba, ni nkèngo g’abembe.

¹⁷ Ndô ṽandam̃iṉaṉi gôr’aṉaga; konde wi be noza ṉwè gw’ivagô, aziṽa ṉwè gw’inagô saô si soṉo;

¹⁸ aṉwè be bagô gôr’iguvèrnèr na gôr’aga, g’ômwanji wam̃, gô dwaṉ’ iyeṉi gôre waô na gôr’aṉongo.

¹⁹ Ndô gô be noza waô ṉwè, alwaṉaṉi n’añandi nte be kamba ṉwè, ge ande zi be bulyô ṉwè; konde aṉwè be pô nte be kamba ṉwè gw’igwèra mè;

²⁰ konde arang’aṉwè be kamba, ndô Iṉiṉa nya Reri yaṉi nyô be kamba gô gare yaṉi.

²¹ Mwô’ngwè e be piṉa mwô’ngi yè gô juwa, ni rerè kè ômwaṉa; n’awaṉa wi be kum̃aṉa azir’izombi yaô, ayôṉiza waô.

²² Aṉwè be numbô n’aṉaga waôdu g’ômwanja w’ini nyam̃; ndô ayè yi be kongwa kwanga gô ntyay ayè be sungiṉô.

²³ Ndô gô be kombiza waô ṉwè gô nkala yiṉo, wangaṉi gô nkala mori. Giligili mi bulinya ṉwè inè, aṉwè am̃aze inkala s’Israèl, Ômwaṉa w’ôma ṽyagaga ro.

²⁴ Ôṉèngi azele vyagaṉô n’ôṉènji wè, ge nyôngô vyagaṉô na reri yè.

²⁵ Are kwèkwè gôr’ôṉèngi gô dendiṉô g’ôṉènji wè, ni nyôngô ga reri yè. Gambô rerè yi nagô aweyô ne waô inè, Beèlzebul, ko pôrô mongi wi nagô yè.

²⁶ Sambô aryaṉi waô; konde e zel’ezom̃a jumbuṉô pa zi re z’awôm̃unyô, ge ôsam̃u wi ntyorya wi re w’amyô.

²⁷ Ôsam̃u wi bulinya myè ṉwè gô mpiri, gambaṉi wô g’ôzange; n’ôsam̃u wi bulinya myè ṉwè g’ôrôy, gambiṉaṉi wô gw’imyanjamyanja y’inagô.

²⁸ Aryaṉi waô wi jôṉ’ ôkuṽa, ndô wi re jolye jôṉ’ iṉiṉa; ndô rô tyeṉi yè are ko jiliz’ iṉiṉa n’ ôkuṽa ta gw’elôngô z’ôgôṉi.

²⁹ Nkène mbaṉi si pa kôlô ni vintè? Ndô mori gô sô y’avôswe gô ntye kaô reri yaṉi ajivira.

³⁰ Vangaṉe itwe si wônjô yaṉi si re tangô pa.

³¹ Sambô aryaṉi aṉw’are njôni vyagaṉô n’inkène sinyenge.

³² Sambô ôm’edu e be mèma myè gw’azô m’aṉaga, ayè be mèmô myè kè g’ôzô wa Reri yam̃ yi re g’ôrôṽa;

³³ ndô ôm’edu e be danda myè gw’azô m’aṉaga, ayè be dandô myè kè g’ôzô wa Reri yam̃ yi re g’ôrôṽa.

³⁴ Avikilyaṉi nè, my’aṽyeṉi gô piṉ’am̃ènjè gô ntye; mi re bye gô piṉ’am̃ènjè, ndô ôkwara w’iwora.

³⁵ Konde my’aṽyeṉi gô pang’ôma ndôṽa na reri yè, n’ômwamwantô ni ngi yè, n’ômwantô ni ngwè y’ôṉôm̃u wè;

³⁶ n’ilôvalôvi y’ôma yi be dwaṉe mongi wi nagô yèmè.

³⁷ Ayè yi tonde rerè ge ngwè vyagaṉô na myè e ze n’inyanga gôre myè; n’ayè yi tonda mw’ôṉôm̃e ge mwa’mwantô vyagaṉô na myè e ze n’inyanga gôre myè;

³⁸ n’ôm’ edu are awonge krosi yè, azônga myè, e ze n’inyanga gôre myè.

³⁹ Ayè yi be penjavenj’em̃èṉo zè, e be periza zô; n’ayè yi be periz’em̃èṉo zè g’ômwanji wam̃, e be dènga zô.

⁴⁰ Ayè yi bonga ṉwè e bonga myè, n’ayè yi bonga myè e bong’ayè y’arôm̃i myè.

⁴¹ Ayè yi bong’ôvogisi gw’ina ny’ôvogisi e be bong’ipa s’ôvogisi, n’ayè yi bong’ôma w’ôgôre gw’ina ny’ôma w’ôgôre, e be bong’ipa s’ôma w’ôgôre.

⁴² N’ôm’ edu e be jonj’ôm̃ori gôr’ awangô wiṉo elasi z’aṉingô mi nkèy dadyè, konde ayè ôṉèngi wam̃, giligili mi bulinya ṉwè inè, averiṉô n’ipi sè.