Mark 8 - Bibili 1927 (Omyene)

¹ Gw’intyugu mèsoṉo, gw’arô buṉi aṉag’awenge, ko w’alwaṉa n’ezom̃a zi nya, Yesu awey’ iṉèngi yè awulinya waô inè:

² Mi jen’aṉaga wiṉo ekèṽa, konde wi re dwaṉa pa na myè ntyugu ntyarô, ko w’anya ezom̃a.

³ Ja my’afwiṉiza waô ni njaṉa gw’inagô saô, gambèṉè wi be kènd’intyèla gô mpoṉo, konde awenge gôre waô w’avili bô.

⁴ N’awiṉizyô yè n’iṉèngi yè inè: Ôma ko jolye jôriza mongi siṉo n’inya vèṉo gw’itôve sè?

⁵ N’aṽambyô waô ne Yesu inè: Amunga myaṉi mi mpèmba mi re na ṉwè? Awiṉizi waô inè, ôrwageṉô.

⁶ N’azômbyi yè aṉaga gô dwaṉa baru gô ntye, n’awongi yè amunga mi mpèmba ôrwageṉô, n’ayè pa p’akeṽa, amoguṉi mô, ava mô gôr’iṉèngi yè gô keriza mô; n’agerizi waô mô gôr’aṉaga.

⁷ W’avegagi kè ni yom̃’intyuè sa kwè, ni Yesu pa p’akeṽa azômbyi nè, gerizaṉi waô sô kè.

⁸ Anyeṉi waô ayôra, n’awonginyi waô nkizi y’arigaṉi itôndô ôrwageṉô.

⁹ Waô w’anyeṉi w’avegagi pyèrè n’intozèny s’aṉaga nay. Avila vovo awizi yè waô.

¹⁰ Azunge kweṉi yè n’iṉèngi yè gw’elende, aṽya gô ntye yi Dalmanuta.

¹¹ N’aṽyeṉ ifarisi, avakilya gô dôṽe mpaga ni Yesu, mbutag’elemba gôre yè avila g’ôrôṽa ndembègè.

¹² Azèkum̃i Yesu g’ôrèm̃i wè awulya inè: Ntiṉa nde yi but’ivôm̃a nyiṉo elemba? Giligili mi bulinya ṉwè inè, ivôm̃a nyiṉo nyi ze pô elemba.

¹³ Arigi yè waô, arô kweṉa gw’elende, alalya gô ntye mori.

¹⁴ Aleṽaṉ’iṉèngi gô bong’inya; w’avegagi kaô n’imung’im̃ori gw’elende.

¹⁵ N’azômbyô waô ne Yesu inè: Gelimaṉi gô levèn y’ifarisi, na gô levèn y’Erod.

¹⁶ N’agambaṉagi waô, awulya inè: konde azw’azele n’inya.

¹⁷ N’amyeṉi Yesu, awulinya waô inè: Ntiṉa nde yi kambaṉa ṉwè, konde aṉw’azele n’inya? Aṉwè p’are ikôtiza fo, aṉwè pa kôtiza? Irèm̃i yaṉi yi re jola pa?

¹⁸ Aṉw’are n’antyo, ko ṉwè ayeṉa? Aṉw’are n’arôy, ko ṉwè ayogo? Aṉwè zele kè n’ijônginya?

¹⁹ Gw’amoguṉi myè amung’ataṉè mi mpèmba gôr’intozèny ôtaṉè s’aṉaga, aṉw’awonginy’itôndô myaṉi ralye ni nkizi? Awiṉizi waô yè inè: igôm̃i ni mbaṉi.

²⁰ Na gw’amoguṉi myè amung’ôrwageṉô mi mpèmba gôr’intozèny nay s’aṉaga, aṉw’awonginy’itôndô myaṉi ralye ni nkizi? Awiṉizi waô yè inè: ôrwageṉô.

²¹ N’awulinyi yè waô inè: Aṉwè pa kôtiza?

²² Aṽyeṉi waô gô Betsayda; n’aṽagi waô ipoku gôre Yesu, agwenè inkolo inè, e ga wate yè.

²³ Agôti yè g’ôgo, agogunyè avila gô nkala; avila vovo aweli yè igwaṉa gw’antyo mè, araly’ago mè gôre yè, n’aṽambyè yè inè: ô jeṉ’ezom̃a?

²⁴ N’avôni yè, awulya inè: Mi jeṉ’aṉaga, konde mi jeṉa waô ga rere yi kèndagènda.

²⁵ Vovo arô talyi Yesu ago mè gw’antyo mè, na gw’avôni ipoku mbyambye, arôli, ayeṉe yom̃a yôdu zange.

²⁶ N’awizô yè ne Yesu gô nagô yè, awulya inè: Ayingiṉa du gô nkala.

²⁷ Agèndi Yesu n’iṉèngi yè gw’inkala si Sezare yi Filipi, n’aṽambyi yè iṉèngi yè gô mpoṉo nè: Aṉaga wi bulya nè, myè mande?

²⁸ Awiṉizi waô inè: Yôan‐Batist; am̃ori nè: Eliya; am̃ori nè: ôm̃ori gôr’ivogisi.

²⁹ N’aṽambyi yè waô inè: ndô aṉwè inè, myè mande? Awiṉizi Pyère inè: Awè ne Krist.

³⁰ N’azômbyô waô ne Yesu inè, w’awuliny’ôma g’ômwanji wè.

³¹ Vovo avakilyi yè gô nènja waô inè, Ômwaṉa w’ôma e be sindiṉ’isam̃u imyenge, ko yè bikô n’aṉèro, n’imiṉisè impôlô, n’irèndisi, ko yè jôṉô, ndô ntyugu ntyarô pyagaṉa pa e be tô tôngwa.

³² Awulinyi yè waô isam̃u yiṉo buku. N’awongyô yè ne Pyère nkôṽa, avakilya gô sèmbè.

³³ Ndô Yesu, agegwi avôn’iṉèngi yè, azèmbe Pyère, awulya inè: Winya gô nyum̃i yam̃, Satan! Konde ô pa nak’isam̃u y’Anyambyè, ndô ô naka kaô isam̃u y’aṉaga.

³⁴ Ayè fweya p’aṉaga n’iṉèngi yè, awulinyi waô inè: Jog’ôm’edu abela gô bya gôre myè, e ga ṉim̃iṉ’ôkuṽi wè, ko yè tômbiṉe krosi yè, azônga myè.

³⁵ Konde ôm’edu e be bela gô sungiṉ’em̃èṉo zè e be periza zô, ndô ayè yi be periz’em̃èṉo zè g’ômwanji wam̃ na g’ômwanja wi ntyangô mbya e be sungiṉa zô.

³⁶ Konde ôba nde wi re n’ôma, j’anyeṉe ntye yôdu, ko yè periz’em̃èṉo zè?

³⁷ Ezom̃a nde zi r’ôma ko pa gw’avendè m’em̃èṉo zè?

³⁸ Konde ôm’edu e be jeṉa myè n’agambi mam̃ ntyoṉi gw’ivôm̃a nyiṉo ny’ôṽelaṉô n’ibe, Ômwaṉa w’ôm̃a e be jeṉè kè ntyoṉi gô be byè gw’ivenda nya Reri yè, ayè n’iyenjèl s’ôrunda.