Mark 13 - Bibili 1927 (Omyene)

¹ Gw’agogwi Yesu avila gô nagô y’Anyambyè, ôm̃ori gôr’iṉèngi yè awulinyi yè inè: Ôṉènji, vôn’ôṉongo w’adô miṉo, n’ôṉongo wi nôgiṉi yiṉo!

² Awiṉizô yè ne Yesu inè: Ô jeṉ’inôgiṉ’impôlô siṉo? E ze tigaṉe idô gw’idô bata nyi re ny’avôsunyô.

³ Alwaṉi yè baru gô nômba yi yôlivi, swaswo ni nagô y’Anyambyè. N’aṽambyô yè ne Pyère, ni Yakobu, ni Yôan, n’Andru ntyorya inè:

⁴ Wulinya zwè, egômbe zeṉi zi be tw’isam̃u yiṉo? N’elingilyô nde zi be dwaṉa jog’isam̃u yiṉo yôdu y’atwa pyèrè gô bya?

⁵ N’avakilyi Yesu gô bulinya waô inè: Gelimaṉi aṉwè vende temizô n’ôma.

⁶ Konde awenge wi be bya gw’ini nyam̃, awulya inè: Myè ne yè, ko waô temiz’aṉag’awenge.

⁷ Na gô be jogo ṉwè g’ômwanja w’agoṽi n’intyangô s’agoṽi, azugyazugyôṉi, konde isam̃u yiṉo yi re n’isolo gô bya. Ndô ntyay yi pa twa.

⁸ Iṉongo nyi be kum̃aṉa gô nwa n’iṉongo, n’ivenda gô nwa n’iṉongo; e be dwaṉa kè isugyazugya si ntye gw’imbôra sinyenge; e be dwaṉa kè njaṉa.

⁹ Siṉo n’ipakilya s’azingô. Ndô ṽandam̃iṉaṉ’ikuṽi yaṉi. Konde wi be piṉa ṉwè gw’ilataṉô y’ijèkèlya, aṉwè be siṽô kè gw’inagô si soṉo; aṉwè be kum̃aṉa gw’azô m’ivangiṉi na gw’azô m’aga, g’ômwanji wam̃, ko yô dwaṉ’ôyeṉi gôre waô.

¹⁰ Ntyangô mbya yi ga lônge kambiṉô gôr’aṉongo môdu.

¹¹ Na gô be kèndya waô ṉwè gw’ijèkèlya, aviṉa ṉwè gôgô, ayeṉaṉi añandi nte be kamba ṉwè egômbe ṽyagaga ro, ndô wulyaṉi nte be pô ṉwè igwèra mè; konde arang’aṉwè be kamba, ndô Iṉiṉ’Iṽya.

¹² Mwô’ngwè e be kôtiza mwô’ngi yè gô juwa, ni rerè ômwaṉa; n’awaṉa wi be kum̃aṉa gô sir’izombi yaô, ayôṉiza waô.

¹³ Aṉwè be numbô n’aṉaga waôdu, g’ômwanja w’ini nyam̃, ndô ayè yi be sindiṉa kwanga gô ntyay e be sungiṉô.

¹⁴ Gô be jeṉa ṉwè ezom̃a z’isèkè z’ijiliza zi kum̃aṉa gô mbôra yi re zô ze n’inyanga nyi dwaṉa, — ayè yi tanguṉa e ga gôtize, — vovo waô wi re gô Yuda wi ga wange gw’inômba;

¹⁵ n’ayè yi be dwaṉa g’ômwanjamwanja wi nagô e ga rig’azum̃iṉa gô jingiṉa gô bong’ezom̃y’edu avila gô nagô yè;

¹⁶ n’ayè yi be dwaṉa gô ntyaga e ga rige arô fwinya ni nyum̃a gô bonge ngoy yè.

¹⁷ Azile gôr’antô wi be dwaṉa n’anyem̃e na gôre waô wi be jonj’awaṉa gw’intyugu mèsoṉo!

¹⁸ Gambiṉaṉi nè, isam̃u yiṉo y’alwaṉa gw’egômbe z’ifwe.

¹⁹ Konde gw’intyugu mèsoṉo e be dwaṉ’azingô, mi re mi pa dwaṉa ni mori avila gw’ipakilya si ntye, y’avangyô n’Anyambyè kwanga vèṉo, mô kè m’arô dwaṉe nyèṉè.

²⁰ N’arwe nè Rerè e pa tuṉiz’intyugu mèsoṉo, gavoṉo e zel’ôma wi be sungiṉô; ndô are tuṉiza pa sô g’ômwanja wa mongi wi re yè pinja pa.

²¹ J’aṉw’abuliny’ôma egômbe mèzoṉo inè: Vônaṉi, Krist are vèṉo, ge vônaṉi voṉo, ayiviraṉi yè.

²² Konde e be nongw’ikrist s’inôka n’ivogisi y’inôka, alend’isam̃u yi mamô ni lemba gô temiza mongi wi re pinjô pa, ja yô tô jolyô.

²³ Ndô ṽandam̃iṉaṉi; my’are bulinya pa ṉwè isam̃u yôdu yô ṽyagaga ro.

²⁴ Ndô gw’intyugu mèsoṉo, azingô mèmoṉo vya, nkômbe yi be jilangaṉa, n’ôgwèli wi ze bambize nyèṉè iṉangi nyè,

²⁵ n’igègèṉi yi be pôswa avila g’ôrôṽa, n’ingulu si re g’ôrôṽa si be sugyazugyô.

²⁶ N’egômbe mè wi be jeṉ’Ômwaṉa w’ôma e bya gô vindi ni ngulu mpôlô n’ivenda.

²⁷ Egômbe mèzoṉo e be tôm̃’iyenjèl sè, ko sô datize mongi wi re yè pinja pa avila gw’impung’inay, avila g’ôm̃ôndô wi ntye kwanga g’ôm̃ôndô w’ôrôṽa.

²⁸ Ṉèngaṉi nkôgô avila gw’erere zi figi. J’ivari nya zô ny’atweṉi dèla, awel’ijavi, aṉwè mya inè, nanga y’atweṉi pyèrè.

²⁹ Yeṉo kè, gô be jeṉa ṉwè isam̃u yiṉo y’atwa, myaṉi nè, Ômwaṉa w’ôma atweṉi pyèrè, vangaṉe g’ômpômbala.

³⁰ Giligili mi bulinya ṉwè inè, ivôm̃a nyiṉo nyi ze pyagaṉe kaô isam̃u yiṉo yôdu y’atwa.

³¹ Ôrôṽa ni ntye yi be pyagaṉa, ndô agambi mam̃ m’avyagaṉe du.

³² G’ômwanja wi ntyugu mè ge igwèra mè, e zel’ôma wi mya nyô, vangaṉe iyenjèl si re g’ôrôṽa, ge Ômwaṉa, ndô kaô Rerè dadyè.

³³ Ṽandam̃iṉaṉi, ṽèmbagaṉi ko kambiṉaṉi, konde aṉwè pa mya gô be bya egômbe mè.

³⁴ Yi be dwaṉa ga nt’ar’ôma wi kenj’ôgèndo gô kènda gô ntye nyèṉè, e tige nagô yè, av’inyôngô sè inyanga, gôr’ôm’edu eṽilô zè, ko yè sômbya ôma wi pengiṉ’ômpômbala inè, e ga ṽèmbege.

³⁵ Sambô ṽèmbagaṉi, konde aṉwè pa mya egômbe zi be by’ôma w’aṉivi nagô, twa pe nkôlô, ntyo ôgwèra ṉengeṉenge, ntyo njogoṉi nônga, ntyo ibanga;

³⁶ e vende bya ndumbaga, aliṽinya ṉwè gw’antyôviṉô.

³⁷ Nte bulinya myè ṉwè, yeṉo bulinya myè kè waôdu inè: Ṽèmbagaṉi.