Mark 10 - Bibili 1927 (Omyene)

¹ Alubwi Yesu avila vovo, aṽya gô ntye yi Yuda, gô ntye mori yi Yoridan. N’arô bengaṉi aṉaga gôre yè, n’arô pakilyi gô nènja waô, nt’avegagi ntyale yè.

² Aṽyeṉ’ifarisi gôre yè, na gô dembè aṽambyi waô yè twa pa are kwèkwè gôr’ôṉôm̃e gô tômb’ômwantô wè.

³ N’awiṉizi yè waô inè: Môsès azômbyi ṉwè sèṉi?

⁴ Awulyi waô inè: Môsès ayiviri ôṉôm̃e gô tènd’ezangô z’itômba, arômb’ômwantô.

⁵ Ndô Yesu awulinyi waô inè: G’ômwanja wi njoliṉi y’irèm̃i yaṉi avenyô ṉwè Môsès ivanga mè.

⁶ Ndô avila gw’ipakilya s’ipangô si ntye, Anyambyè avangi ôṉôm̃e n’ômwantô;

⁷ yeṉo ôṉôm̃e e ga rige reri yè ni ngi yè, ayôngô gôr’ômwantô wè,

⁸ ko waô aṽaṉi dwaṉ’ôzôṉ’ômô. Yeṉo wi zele aṽaṉi nyèṉè, ndô ôzôṉ’ômô.

⁹ Sambô ezom̃a zi re jôngô pa n’Anyambyè z’aṽangunyô n’ôma.

¹⁰ Gw’avegagi waô gô nagô, iṉèngi yè y’arô bambyi yè g’ômwanja w’igamba mè.

¹¹ Awulinyi yè waô inè: Ôm’edu e tômb’ômwantô wè ayômb’ômwèṉè, gambèṉè e dèwa na wi ngaṉi,

¹² na j’ômwantô adubwa avila gôr’ôṉôm̃u wè, ayômb’ômwèṉè, gambèṉè e dèwa na wi ngaṉi.

¹³ Aṽagi waô awaṉ’arumbe gôre yè, inè, e ga wate waô. Ndô iṉèngi y’alegi mongi w’aṽagi awaṉa.

¹⁴ Ndô gw’ayeṉi Yesu yeṉo, aṽendi, awulinya waô inè: Yiviraṉi awaṉa gô bya gôre myè, ko alegaṉi waô, konde iṉongo ny’Anyambyè nyi re gôre mongi wi dwaṉa ga waô.

¹⁵ Rèti mi bulinya ṉwè inè, ôm’edu are awong’iṉongo ny’Anyambyè g’ômwaṉ’erumbe, ayingiṉe du gô nyô.

¹⁶ N’avari yè waô, azaviṉa waô, ntalyaga waô ago mè.

¹⁷ Gw’agèndagi Yesu gô mpoṉo aṽyeṉ’ôma ni mangô gôre yè, alôṽiṉè akotolo, aṽambyè inè: Ôṉènji ômbya, mi ga lende ande gô niv’em̃èṉo z’egômbe zôdu?

¹⁸ Awulinyô yè ne Yesu inè: Ntiṉa nde yi fweyo myè ômbya? E zel’ôm’ombya kaô ôm̃ori, ayè ne Anyambyè.

¹⁹ W’avôrô ampanga: alèwa na wi ngaṉi; ayôṉa; ayufa; aṽèrinya; avita; lube reri yo ni ngi yo.

²⁰ Awiṉizè yè inè: Ôṉènji agamba miṉo môdu my’are mô penjavenja pa avila gw’erumbe zam̃.

²¹ Avônô yè ne Yesu, arondè, awulinyè inè: Atigaṉi gôre wè igamb’im̃ori; gènda, ko kôle yom̃a yôdu yi re na wè, ko wè pa yô gôr’agèlè, gambèṉè ô be dwaṉa n’igumba g’ôrôṽa. Avila vovo ko bya, azônga myè.

²² Ndô arweṉi gèṽagèṽa n’igamba mè, agèndaga n’ekèṽa; konde avegagi n’igumb’inyenge.

²³ N’avôni Yesu vingôvingô, awuliny’iṉèngi yè inè: Ijola nde gôre waô wi re n’igumb’inyenge gô jingiṉa gw’iṉongo ny’Anyambyè!

²⁴ Am̃am’iṉèngi agamba mi Yesu. Ndô Yesu awiṉizi awulinya waô inè: Awam̃, ijola nde gôre waô wi bekely’igumba, gô jingiṉa gw’iṉongo ny’Anyambyè!

²⁵ Are dèla gôre kamèli gô sôlya gw’igola nyi ntômbô, vyagaṉô na gôr’eṉam̃i gô jingiṉa gw’iṉongo ny’Anyambyè.

²⁶ N’arô mam’iṉèngi pôlômè, awulyaṉi waô inè: Sambô mande be jolye sungiṉô?

²⁷ N’avônô waô ne Yesu, awulya inè: Igamba nyiṉo gôr’aṉaga ny’ayolyô, ndô aranga gôr’Anyambyè; konde isam̃u yôdu ko jolyô n’Anyambyè.

²⁸ Avakilyi Pyère gô bulinyè inè: Vôna, azw’are tiga pe yom̃a yôdu, ko zwè sôngo.

²⁹ N’awiṉizi Yesu inè: Rèti, mi bulinya ṉwè inè: e zel’ôma re tiga pe nagô yè, ge awareri yè aṉôm̃e, ge yombi yè, ge reri yè, ge ngi yè, ge awaṉi wè, ge intyagi sè, g’ômwanji wam̃ na g’ômwanja wi ntyangô mbya,

³⁰ are awonge nkam̃a y’inyongo vèṉo gw’egômbe ziṉo, inagô, n’awarerè aṉôm̃e, ni yombi, n’ingwè, n’awaṉa, n’intyaga, n’ikombizô ta, na gô ntye yi bya, em̃èṉo za koṉako.

³¹ Awenge wi re dônga pa wi be dwaṉ’aṉum̃uṉa, n’aṉum̃uṉa wi be dônga.

³² Avegagi waô gô mpoṉo mpandaga gô Yerusalèm, ndô Yesu agèndagi gô bôsô yaô. N’am̃am’iṉèngi, azôngè n’itya. N’arô bongi Yesu igôm̃i n’aṽaṉi, avakilya gô bulinya waô isam̃u yi be twa gôre yè inè:

³³ Vônaṉi azwè panda gô Yerusalèm, n’Ômwaṉa w’ôma e be pô gôr’imiṉisè impôlô na gôr’irèndisi. Waô wi be pè ôgara gô juwa, avè gôre mongi wi ntye,

³⁴ ko waô sèlyè, aziṽè, arônyè igwaṉa, ayôṉè; ni ntyugu ntyarô pyagaṉa pa e be tôngwa.

³⁵ Aṽyeṉi Yakobu ni Yôan, awaṉa wi Zebeday, gôre Yesu, awulinyè inè: Ôṉènji, azwè ko tonda nè, lendiṉa zwè ôsam̃u wi be bambya zwè wè.

³⁶ N’awulinyi yè waô inè: Aṉwè bela myè dendiṉa ṉwè ande?

³⁷ Awulinyi waô yè inè: Va zwè inè, gô be dwaṉo gw’ivendi nyo, azwè ga lwaṉe baru, ôm̃ori g’ôgo wo ôṉôm̃yè, n’ôm̃ori g’ôgo wo ônyantwè.

³⁸ Awiṉizô waô ne Yesu inè: Aṉwè pa mya ôsam̃u wi bambyô ṉwè. Aṉwè ko jolye jong’imogi nyi jongô myè, ge batizô n’ibatiza si be batizô myè? N’awulyi waô inè: Azwè ko jolya.

³⁹ N’awiṉizô waô ne Yesu inè: Rèti aṉwè be jong’imogi nyi jongô myè, aṽatizô n’ibatiza si be batizô myè;

⁴⁰ ndô gô dwaṉa baru g’ôgo wam̃ ôṉôm̃yè ge g’ôgo wam̃ ônyantwè, arang’iyam̃ gô pa, ndô yi be pô gôre waô w’arangiṉô yô.

⁴¹ Gw’ayogyô igôm̃i yeṉo, w’avakilyi gô bendiṉe Yakobu ni Yôan.

⁴² N’aweyô waô ne Yesu gôre yè, awulinya waô inè: Aṉw’avôrô inè, waô wi tangô inè, wi pangiṉ’aṉongo, wi pangiṉa mô ni ngulu, n’ampendi maô mi bong’inyanga gôre waô.

⁴³ Ndô e zele yeṉo gôre ṉwè. Ndô ôm’edu e bele dwaṉ’ômpôlô gôre ṉwè e be dwaṉe nyôngô yaṉi;

⁴⁴ n’ôm’edu e bele dwaṉ’ôlônga gôre ṉwè, e be dwaṉ’ôsaka wa waôdu.

⁴⁵ Konde Ômwaṉa w’ôma are bya pa aranga gô janjiṉô, ndô gô janjiṉa na gô p’em̃èṉo zè ôraṽô gôr’awenge.

⁴⁶ Aṽyeṉi waô gô Yerikô. Na gw’alubwi Yesu avila gô Yerikô, ayè n’iṉèngi yè ni nkumba mpôlô y’aṉaga, Bartime y’ipoku, y’ômwaṉa wi Time, avegagi baru gô mpoṉo nègiraga.

⁴⁷ Gw’ayogyô yè inè, ayè ne Yesu yi Nazarèt, avakilyi gô bôgiṉa inè: Yesu, y’ômwaṉa wi David, vôgiṉa myè!

⁴⁸ N’alegyô yè n’awenge inè, e ga lwaṉe dodo; ndô awôgiṉi pôlô vyagaṉô inè: awè Ômwaṉa wi David, vôgiṉa myè!

⁴⁹ Agum̃aṉi Yesu gôre, awulya inè: weyaṉi yè. N’aweyi waô ipoku, awulinyè inè: Zindy’ôrèm̃a, gum̃aṉa, e fweyo.

⁵⁰ Awal’ipoku ngoy yè, agum̃aṉa, aṽya gôre Yesu.

⁵¹ N’awiṉizi Yesu awulinyè inè: Ô bela nè, mi ga lendiṉe wè ande? Awiṉizô yè n’ipoku inè: Reri yam̃, mi ga yeṉe zange.

⁵² Awulinyô yè ne Yesu inè: Gèndaga, ibekelyi so si re wè sungiṉa pa. N’ayeṉi yè pelè, azônge Yesu gô mpoṉo.