Malaki 3 - Bibili 1927 (Omyene)

¹ Vôna, mi be tôm̃’igende nyam̃; e be kekize mpoṉo gô bôsô yam̃. Ni Rerè yi butô ṉwè e be jingiṉa gô nagô yè v’igamba ny’agwaṉa; n’igende nyi njeka nyi belô ṉwè, vônaṉi, e bya, bulye Yeôva y’imbèli.

² Mande ko kum̃aṉa gô ntyugu y’ibyi sè? mande be kum̃aṉa gôre gô be byè? konde e be dwaṉa ga ôgôṉi w’ôma wi janginya, ga pôtase yi jômbwiza.

³ E be dwaṉa baru g’ôma wi kanjuna ayômbwize sika ya pupu; e be jômbwiz’awaṉa wi Levi, e be jômbwiza waô pupu ga sika ya teṉateṉa na ya pupu, ko waô p’impagaga gôre Yeôva n’ôgôre.

⁴ Gambèṉè mpagaga yi Yuda na yi Yerusalèm yi be dwaṉe mbya gôre Yeôva, ga gw’intyugw’inônga, na gw’impum̃’ilungu.

⁵ Mi be sèvya pyèrè na ṉwè’gw’ijèkèlya, na mi be sunge takilya gô sir’aganga w’imbwiri n’ibelaṉi, gô sire waô wi tang’irangô y’inôka, wi simby’ipa s’ôma wi janja, wi bangaty’ ôtika ni nyam̃uṉa, wi janjiṉ’ôgènda mbe, ko w’arya myè du, bulye Yeôva y’imbèli.

⁶ Konde myè ne Yeôva, mi pa kalwa; n’aṉwè, awaṉa wi Yakob, aṉwè pa jilizô.

⁷ Avila gw’egômbe z’ireri saṉi, aṉw’are jèrwa pa avila gw’isômbyi sam̃, aṉwè pa denda sô. Winyaṉi gôre myè, ko mi fwinya gôre ṉwè, bulye Yeôva y’imbèli. N’aṉwè bulya inè: Azwè ko fwinya ni mpoṉo nde?

⁸ Ôma ko temiz’ Anyambyè? Konde aṉwè temiza myè, ko ṉwè bulya inè: Azw’are wè temiza pa ni mpoṉo nde? gw’imbèy s’agôm̃i na gw’intyagô si mpagaga.

⁹ Aṉw’are bôlô pa n’ôzavô, n’aṉwè temiza myè, iṉongo nyôdudu!

¹⁰ Ṽagaṉi gô nagô y’igumba imbèy s’agôm̃i sôdu, ko inya dwaṉa gô nagô yam̃; gèṉizaṉi myè yeṉo, bulye Yeôva y’imbèli. N’aṉwè be jeṉa ja mi pa nunguṉ’asangala m’ôrôṽa, ja mi pa jiriṉa ṉwè ôzaviṉ’ômwenge.

¹¹ Mi be sèmb’ôyilisi gôre ṉwè, ko yè ayiliz’ilônda yi ntye, n’ôgoli wi re bèṉô pa g’ôrôve wi be jaṉ’ilônda, bulye Yeôva y’imbèli.

¹² Aṉongo môdu mi be bulinya ṉwè inè, ôzaviṉô, konde aṉwè be dwaṉe ntye y’ambya, bulye Yeôva y’imbèli.

¹³ Agambi maṉi mi r’ayoli gôre myè, bulye Yeôva. N’aṉwè bulya inè: Azw’abulyi sè gô sirô?

¹⁴ Aṉw’abulyi nè: Anyambyè e janjiṉô gô nyawènyawè; ôba nde wi re zwè dènga pa n’ipenjavenj’ampangi mè, na gô kangaṉa n’ekèṽa g’ôzô wi Yeôva y’imbèli?

¹⁵ Sambô vèṉo azwè bonge kale mbyambye; èñ, aṉag’aṽe wi kènda mbyambye; èñ, wi kèṉiz’Anyambyè, na wi re sungiṉô pa!

¹⁶ Vovo waô wi tye Yeôva w’agambagi ôm̃ori gôr’ôm̃ori; n’avôganyô Yeôva, ayogw’agambi maô; n’arèndyô ezangô z’ijônginya g’ôzô wè gôre waô wi tye Yeôva na wi dub’ini nyè.

¹⁷ Wi be dwaṉ’iwam̃, bulye Yeôva y’imbèli, wi be dwaṉ’iwam̃, gô ntyugu yi be kekiza myè yô; mi be pôgiṉa waô, ga nte pôgiṉ’ôma ômwaṉi wè wi janjiṉè.

¹⁸ N’aṉwè be tô jeṉ’ibangwaṉa ntyo agôre n’arègo, ntyo ôma wi janjiṉ’ Anyambyè n’ôma wi re wi pa janjiṉè.