Luk 4 - Bibili 1927 (Omyene)

¹ Awinyi Yesu avila gô Yoridan, jônya pa ralye n’Iṉiṉ’Iṽya, n’agèndizô n’Iṉiṉa gw’itôve;

² alwaṉi vovo agôm̃i m’intyugu anay nsoryôgô ne Satan. Gw’intyugu mèsoṉo e pa ny’ezom̃a, na gw’amaṉi sô, ayogyô yè njaṉa.

³ N’awulinyô yè ne Satan inè: J’awè ômwaṉa w’Anyambyè, zômby’idô nyiṉo inè, nyi ga galwe mpèmba.

⁴ N’awiṉizô yè ne Yesu inè: Are tèndô pa inè: ’Môṉaga alwaṉa bo kaô ni mpèmba dadyè.

⁵ Agèndyô yè ne Satan, arum̃inyè aṉongo mi ntye môdu v’igamba ny’agwaṉa.

⁶ N’awulinyô yè ne Satan inè: Mi be po inyanga nyiṉo nyôdu, n’ivenda ny’aṉongo miṉo; konde nyi re pô pa myè, na mi be pa nyô gôr’ôma wi tondô myè.

⁷ Sambô j’aw’asaviṉa myè, nyi be dwaṉ’inyo.

⁸ N’awiṉizô yè ne Yesu inè: Are tèndô pa inè: Zaviṉe Rerè, Anyambyè yo, ko janjiṉè dadyè.

⁹ Arô kèndyô yè ne Satan gô Yerusalèm, alôṽyè g’ômwanja wi nagô y’Anyambyè, awulinyè inè: j’awè ômwaṉa w’Anyambyè, vôsuny’ôkuṽi wo gô ntye;

¹⁰ konde re tèndô pa inè: E be sômbya iyenjèl sè g’ômwanji wo, ko sô bandam̃iṉo;

¹¹ na inè, si be twaṉo gw’ago maô, awè vende duke ntyôzô yo gw’idô.

¹² N’awiṉizô yè ne Yesu inè: Are bulyô pa inè: Alembe Rerè, Anyambyè yo.

¹³ Gw’aliwô Satan amaz’isorya sôdu, alubwi avila gôre yè v’egômbe.

¹⁴ Awinyi Yesu ni ngulu y’Iṉiṉa gô Galile; n’ayagayag’elum̃i zè gô ntye yôdu vingôvingô.

¹⁵ N’aṉènji yè gw’inagô saô s’isoṉo, n’azum̃inyô yè n’aṉaga waôdu.

¹⁶ Aṽyeṉi yè gô Nazarèt, nkala y’avôm̃izô yè, n’ayingiṉi yè gô nagô y’Anyambyè gô ntyugu yi soṉo, ga nt’avegagi ntyale yè. N’agum̃aṉi yè aranguṉa.

¹⁷ N’avenyô yè ezangô z’ôvogisi Yezaya. N’aṉunguṉi yè ezangô, alènge mbôra yi re tèndô pa inè:

¹⁸ Iṉiṉa nya Rerè nyi re gôre myè, konde are sagya pa myè gô bunguṉe ntyangô mbya gôr’ikuge; are tôm̃a pa myè [gô jinga waô wi re n’irèm̃a tukyô pa,]

¹⁹ gô myez’ikôte inè, yi be tigô yangayanga, n’apoku inè, mi be tô jeṉa, na gô tiga yanga waô wi re bangatyô pa, gô kambiṉ’ômpum̃’ômbya wa Rerè.

²⁰ N’aṉunji yè ezangô, ava zô gôr’ôma wi pengiṉa, n’alwaṉi yè baru. Na waôdu w’avegagi gô nagô yi soṉo w’azindiṉi yè ngolongolo.

²¹ N’avakilyi yè gô bulinya waô inè: Ṉèṉo wiṉo agamba miṉo m’irèndo mi re ṉwè jogo pa m’atweṉi rèti.

²² Na waôdu w’arakilyi g’ômwanji wè, am̃ama g’ômwanja w’agamba m’ikèsi m’agogwi avila g’ôgwaṉi wè, n’awulyi waô inè: Wiṉo arang’ômwaṉa wi Yôsèf?

²³ N’awulinyô waô ne Yesu inè: E zele mpaga, aṉwè be kôviṉa myè nkôgô yiṉo inè: Ôganga, ying’ôkuṽi womè; n’aṉwè be bulinya myè inè: Ôsam̃u edu wi re zwè jogo pa inè, w’alendi wô gô Kapernaum, lenda wô kè vèṉo gô ntye yomè.

²⁴ Ndô arô bulyi nè: Rèti, mi bulinya ṉwè inè, e zel’ôvogisi wi bongô gô ntye yèmè.

²⁵ Giligili mi bulinya ṉwè inè: Gw’intyugu s’Eliya avegag’itika gw’Israèl, gw’aṉunjyô ôrôṽa impum̃’irarô n’agwèli ôrôṽa, ko njaṉa mpôlô dwaṉa gô ntye yôdu;

²⁶ ndô Eliya e pa tôm̃ô du gôre waô, ndô arôm̃yô gô Sarepta, gô ntye yi Sidôn, gôr’ôtika.

²⁷ Avegagi kè aṉag’awenge w’avegagi n’inkaṉi sa gelô gw’Israèl, gw’intyugu s’Elisa y’ôvogisi; ndô gôre waô e pa jing’ôma, ayingyô kaô Naaman ya mwô’Sirya.

²⁸ Gw’ayogyô waô isam̃u yiṉo, waôdu w’avegagi gô nagô yi soṉo w’ayônyi n’eguṉu.

²⁹ N’agum̃aṉi waô, azugè avila gô nkala, agèndyè kwanga gw’esôsôlô zi nômba, y’avegagi nôgô pe nkali yaô, gô bele pungè ôlôlôṽa g’ôlonga.

³⁰ Ndô Yesu avyagaṉi gô garegare yaô, nkombizag’ ôgèndo wè.

³¹ N’azum̃iṉi yè gô Kapèrnaum, nkala yi Galile, n’aṉènjagi yè waô gô ntyugu yi soṉo.

³² Am̃ami waô inènji sè, konde agambagi n’inyanga.

³³ Gô nagô yi soṉo avegag’ôma w’avegagi n’iṉiṉ’iṽe ny’isèkè, n’arôngi yè n’inyôy ivôlô inè:

³⁴ Ezom̃a nde zi re zwè na wè, awè Yesu yi Nazarèt? Ô re bya pa gô jiliza zwè. My’avôrô wè, awè Ôma wi nkèrè w’Anyambyè.

³⁵ N’azèmbyô nyô ne Yesu, awulya inè: Lwaṉa dodo, ko kogwa avila gôr’ôma mèwoṉo. N’iṉiṉ’iṽe ny’avôsunyi ôma mè gô garegare y’aṉaga, agogwa avila gôre yè, ndô nyi pa jeṉize yè nkaza.

³⁶ N’am̃ami waôdu pôlômè, awulyaṉa inè: Igamba nde nyiṉo? Konde e sômbya n’inyanga ni ngulu aṉiṉa m’isèkè, ko mô kogwa!

³⁷ N’ayagayagi elum̃i zè gô mbôry’edu gô ntye mèyoṉo vingôvingô.

³⁸ Agogwi yè avila gô nagô yi soṉo, ayingiṉa gô nagô yi Simôn. Ôgoy ômwantô wi Simôn ayogogô ijôrô sipôlô, n’agweni waô yè inkolo g’ômwanji wè.

³⁹ Agum̃aṉi yè gôre yè, azèmb’ijôrô, n’alubw’ijôrô avila gôre yè. N’agum̃aṉi ômwantô pelè ayanjiṉa waô.

⁴⁰ Gw’agèndi nkômbe, waôdu w’ayogiṉôgô ne mongi yaô nkany’edu, w’aṽagi waô gôre yè. N’aralyi yè ago mè gôr’ôm’edu gôre waô, ayinga waô.

⁴¹ Aṉiṉ’ambe kè m’agogwi avila gôr’awenge ntôngaga inè: Awèn’Ômwaṉa w’Anyambyè. Ndô azèmbi mô ko ayivira mô kamba, konde m’amyeṉi nè, ayè ne Krist.

⁴² Gw’ayenj’ôwenja, agogwi yè agènda gô mbôra ya kendekende. N’awutyô yè n’aṉaga, aṽyeṉi waô gôre yè; w’aṽeli gô simbyè inè, alubwa avila gôre waô.

⁴³ Ndô awulinyi yè waô inè: Mi ga gambiṉe ntyangô mbya y’iṉongo ny’Anyambyè gw’inkal’im̃ori kè; konde my’arôm̃yô gô ntiṉa yiṉo.

⁴⁴ N’agambiṉi yè gw’inagô si soṉo si Galile.