Luk 24 - Bibili 1927 (Omyene)

¹ Gô ntyugu nônga yi wiki, ayenjiṉa, antô mè w’aṽyeṉi g’ôrôngiṉô, ni yom̃a yi nkangô y’agekizyô waô.

² N’ayeṉi waô idô tômbô pa avila g’ôrôngiṉô;

³ n’ayingiṉi antô, ndô wi pa diṽiny’ôkuṽa wa Rerè Yesu.

⁴ Arweṉi gw’avegagi waô ni mpaga g’ômwanja wi ndaga yiṉo, vôna, aṉôm̃e aṽaṉi w’awôm̃unyi n’ingoy injombwi pyèrè na waô.

⁵ Aryeṉi waô, avur’azô maô mbè gô ntye; ndô aṉaga mè w’awulinyi waô inè: Ntiṉa nde yi buta ṉwè ôma wi re bo gôre mongi wi re juwa pa?

⁶ E zele vèṉo, ndô atôngwi. Yônginyareṉi nt’agambi yè na ṉwè ayè p’are gô Galile, inè:

⁷ Ômwaṉa w’ôma e ga vô gw’ago m’aṉag’aṽe, ko yè banyô gô krosi, arô tôngwa gô ntyugu yi ntyarô.

⁸ N’ayônginyi waô agamba mi Yesu.

⁹ Awinyi waô avila g’ôrôngiṉô, awuly’isam̃u yiṉo yôdu gôr’igôm̃i n’ôm̃ori, na gôre mongi mori waôdu.

¹⁰ Waô w’awuly’isam̃u yiṉo gôre rôm̃i w’avegagi wa Marya yi Magdala, na wa Yôana, na wa Marya, yi ngwè yi Yakobu, n’antô am̃ori w’avegagi na waô.

¹¹ N’ayeṉi waô agambi maô g’ewulyanyambyè, ko w’aṽekely’antô wiṉo.

¹² Ndô Pyère agum̃aṉi, avale mangô g’ôrôngiṉô. N’alèmbi yè mbè, avôna ayeṉ’iṉamba y’ivèla dimbiṉô pa mbôra ni yaô; n’awinyi yè gô nagô yè, mamag’isam̃u y’arweṉi.

¹³ Na vôna, ntyugu mèmô, iṉèngi mbaṉi y’agèndi gô nkala yi fweyô inè, Emaus, y’avegagi avila gô Yerusalèm ôgèndo w’agwèr’ararô;

¹⁴ n’agambagi waô g’ômwanja w’isam̃u yiṉo yôdu y’arweṉi.

¹⁵ N’arweṉi gw’agambagi waô alôṽaṉage mpaga, Yesu ayèmè azusi pyèrè, agènda na waô.

¹⁶ Ndô antyo maô m’azimbyô inè, w’amyè.

¹⁷ Awulinyi yè waô inè: Agamba nde miṉo mi kambô ṉwè, gô kènda ṉwè, ko ṉwè dwaṉa n’azô m’ekèṽa?

¹⁸ Ôm̃ori gôre waô, ini nyè ne, Kleôpas, awiṉizi yè inè: Gôre waô wi dwaṉa gô Yerusalèm, awè dadyè awè re ô pa my’isam̃u yi re twa pa gôgô intyugu siṉo?

¹⁹ Awiṉizi yè waô inè: Isam̃u nde? N’awulinyi waô yè inè: Isam̃u yi re twa pa g’ômwanja wi Yesu, ya mwô’Nazarèt, avegagi ôvogisi wi ngulu gw’ijanja na gw’igamba g’ôzô w’Anyambyè na gw’azô m’aṉaga waôdu,

²⁰ ni nt’avenyô yè ôgara wi juwa na gô banyô gô krosi ne imiṉisè impôlô n’ivangiṉi yi pangiṉa zwè.

²¹ Azw’avegagi n’igum̃u nè, ayè ne yè yi be danduṉ’Israèl; ndô vyagaṉô n’isam̃u yiṉo yôdu, ṉèṉo wiṉo ne ntyugu yi ntyarô isam̃u yiṉo ga dwaṉe.

²² N’antô awèwo wi nkumbi yazô w’am̃amiza zwè, konde gw’akènda waô ibanga sôdu g’ôrôngiṉô,

²³ ko w’alèng’ôkuṽi wè, w’abya, awulya inè, w’ajeṉ’iyenjèl s’abôm̃unya gôre waô, awulya inè, are bo.

²⁴ N’awèwo gôre waô w’apegaga na zwè, w’akènda g’ôrôngiṉô, aliṽiny’isam̃u ga nt’abulya antô; ndô ayè wi pa jeṉe yè.

²⁵ N’awulinyô waô ne Yesu inè: Èñ, aṉaga wi r’ikôtiza fo, n’irèm̃’iyoli gô bekely’isam̃u yôdu y’awulyô n’ivogisi!

²⁶ E re pegeg’isolo inè, Krist e ga zindiṉ’isam̃u yiṉo, ko yè jingiṉa gw’ivendi nyè?

²⁷ N’avakilyi yè ni Môsès n’ivogisi yôdu, aṽènguṉa waô gw’Irèndo yôdu isam̃u yi re g’ômwanja w’ôkuṽi wèmè.

²⁸ Gw’arweṉi waô pyèrè ni nkala y’akèndyô waô, alendi mpaṉi ga e bele pyagaṉa.

²⁹ Ndô w’azimbyi yè, awulya inè: Lwaṉa na zwè, konde nkôlô y’atweṉi pyèrè, n’ôwenja w’akèndi pôlô. N’ayingiṉi yè gô dwaṉa na waô.

³⁰ N’arweṉi gw’avegagi yè baru na waô gw’inya, awongi mpèmba, n’ayè pa p’akeṽa, amoguṉi yô, ava yô gôre waô.

³¹ Vovo aṉungwi antyo maô n’amyeṉi waô yè; ndô aṉiṉi avila gw’antyo maô.

³² N’awulyaṉi waô inè: Irèm̃i yazô yi pa pya gô gare ntye yazô, gw’akambègè na zwè gô mpoṉo aṽènguṉa zwè Irèndo?

³³ Agum̃aṉi waô igwèra mè, awinya gô Yerusalèm, n’aliṽinyi waô igôm̃i n’ôm̃ori, na waô w’avegagi na waô dataṉa pa, n’awulyi waô inè:

³⁴ Rèti, Rerè are tôngwa pa, abôm̃unyi gôre Simôn.

³⁵ N’arakilyi waô isam̃u y’arweṉi gôre waô gô mpoṉo, ni nt’amyeṉi waô yè gw’egômbe z’am̃oguṉi yè mpèmba.

³⁶ Gw’agambagi waô isam̃u yiṉo, Yesu ayèmè awôm̃unyi gô garegare yaô, awulinya waô inè: Am̃ènjè gôre ṉwè!

³⁷ Ndô w’agôtyô n’ererya, arya, avikilya nè, w’ajeṉ’ibambô.

³⁸ Ndô awulinyi waô inè: Ntiṉa nde yi sugyazugya ṉwè, ni ntiṉa nde yi bya ipikilya ôṉongo mè gw’irèm̃i yaṉi?

³⁹ Vônaṉi ago mam̃ n’intyôzô sam̃, inè, ne myè rèti; ko kôtareṉi myè ayeṉa: konde ibambô nyi zele n’izôṉe ni pa, ga nte jeṉa ṉwè yô na myè.

⁴⁰ Gw’awulyagi yè yeṉo, arum̃inyi waô ago mè n’intyôzô sè.

⁴¹ Na gw’arweṉi waô wi pa bekelya, gô mbya y’ayenyô waô, am̃amaga, Yesu aṽambyi waô inè: aṉw’are vèṉo n’ezom̃a zi nya?

⁴² Aveṉi waô yè ntyuè yi njangaga n’ekulu z’ôṉèmbè.

⁴³ N’awongi yè yô, anya gw’azô maô.

⁴⁴ N’awulinyi yè waô inè: Miṉo n’agamba m’awulinyi myè ṉwè gw’avegagi myè na ṉwè, inè, isam̃u yôdu yi re tèndô pa gw’ivanga nyi Môsès, na gw’ivogisi, na gw’ijembô g’ômwanji wam̃ yi ga rwe rèti.

⁴⁵ Vovo aṉunguṉi yè waô wônjô yaô, inè, wi ga gôtiz’Irèndo y’Anyambyè.

⁴⁶ N’awulinyi yè waô inè: Yeṉo re tèndô pa inè, Krist e ga zindiṉ’ijuwa, ko yè tôngwa avila gw’ijuwa gô ntyugu yi ntyarô,

⁴⁷ na inè, iniga si nkôndi n’inyeza s’ibe kambiṉô gw’ini nyam̃ gw’aṉongo môdu, mpakilyaga gô Yerusalèm.

⁴⁸ Aṉwè ne iyeṉi y’isam̃u yiṉo.

⁴⁹ Na vônaṉi, mi be tôm̃a gôre ṉwè ômpangaṉô w’avangaṉô ne Reri yam̃; ndô aṉwè, lwaṉaṉi gô nkala yiṉo, kaô aṉwè aboryô ni ngulu avila gw’igôṉô.

⁵⁰ N’agèndi waô kwanga gô Betani, n’arômbiṉi yè ago mè, azaviṉa waô.

⁵¹ N’arweṉi gw’azaviṉagi yè waô, aṽangwaṉi na waô, awongô g’ôrôṽa.

⁵² Waô saviṉè pa, w’awinyi gô Yerusalèm ni mbya mpôlô;

⁵³ n’alwaṉagi waô egômbe zôdu gô nagô y’Anyambyè, nsum̃inyaga ni nsaviṉag’Anyambyè.