Luk 20 - Bibili 1927 (Omyene)

¹ Arweṉi nè, ntyugu mori gw’aṉènjagi Yesu aṉaga gô nagô y’Anyambyè awunguṉe ntyangô mbya, imiṉisè impôlô n’irèndisi, n’aṉèro w’aṽyeṉi gôre yè awulinyè inè:

² Wulinya zwè, ô dend’isam̃u yiṉo n’inyanga nde, ge mande aveṉi wè inyanga nyiṉo?

³ Awiṉizi waô inè: Mi be bambya ṉwè kè igamb’im̃ori.

⁴ Wulinyaṉi myè, ibatiza zi Yôan s’avili g’ôrôṽa mbè gôr’aṉaga?

⁵ Ndô w’agambagi waô na waô inè: J’azw’ajivira inè, s’avili g’ôrôṽa, gambèṉè e be bulya inè: Ntiṉa nde yi re ṉwè e pa bekelye yè?

⁶ Ndô j’azw’ajivira inè, s’avili gôr’aṉaga, gambèṉè aṉaga waôdu wi be punga zwè adô, konde w’aṽekelyi nè, Yôan ôvogisi.

⁷ N’awiṉizi waô inè, azwè pa mye nkôṽa y’avili sô.

⁸ N’awulinyô waô ne Yesu inè: Myè kè my’awulinye ṉwè n’inyanga nde nyi denda myè isam̃u yiṉo.

⁹ Avakilyi yè gô kôviṉ’aṉaga nkôgô yiṉo inè: Ôma aṽèṉi ntyaga y’igoli, ariga yô gôr’aṉaga gô penjavenjô, n’agèndi yè gô ntye nyèṉè ôling’ôla.

¹⁰ Gw’egômbe z’ilônda, arôm̃i yè nyôngô gôr’aṉaga mè, inè, wi ga ve yè mbèy y’ilônda yi ntyaga y’igoli. Ndô aṉaga mè w’awôli yè, awiṉizè ôrevô.

¹¹ N’arô tôm̃i yè nyôngô nyèṉè, n’awôli waô yè, aroṽè, awiṉizè kè ôrevô.

¹² N’arô tôm̃i yè yi ntyarô; n’awonji waô yè vôra, azugè avila gô ntyaga.

¹³ N’awulyi ôṉivi wi ntyaga inè: Mi be denda sèṉi? Mi be tôm̃’ômwaṉi wam̃ wi tondô myè, vendetwa gô be jeṉa waô yè wi be dubè.

¹⁴ Ndô gw’ayenyô yè ne mongi wi penjavenje ntyaga, w’awulyaṉi nè: Wiṉo n’ôyigisi, azwè ga yôṉeṉi yè, ko ijiga dwaṉ’isazô.

¹⁵ N’arômbi waô yè avila gô ntyaga y’igoli, ayôṉè. Sambô ôṉivi wi ntyaga e be dendiṉ’aṉaga mè sèni?

¹⁶ E be bya gô jôṉ aṉ ga mèwoṉo, ave ntyaga y’igoli gôr’aṉag’awèṉè. Gw’ayogyô waô yeṉo, w’awulyi nè: Alwaṉe yeṉo!

¹⁷ Ndô Yesu azindiṉi waô ngolongolo, awulya inè: Sambô igamba nyi re sèṉi nyi re tèndô pa inè: Idô ny’aṽikyô n’iṉôgisi ny’atweṉi gw’ewônjô zi ntulungu?

¹⁸ Ôm’edu e be pôswa gw’idô nyiṉo e be jarwayarwa simbèy, ndô ôm’edu e be pôsunyô ne nyô nyi be nyigè ga ntyèngè.

¹⁹ Imiṉisè impôlô n’irèndisi w’awutagi gô kôtè igwèra mènyoṉo, ndô w’aryeṉi aṉaga. W’agôtizi nè, Yesu agôvi nkôgô mèyoṉo gô sira waô.

²⁰ Aṽèmbagi waô Yesu, n’arôm̃i waô aṉaga w’avondagi nè, waô aṉag’aṽya, gô sotè mbelaga gô kôt’agambi mè, avè gô ngulu na gw’inyanga nyi guvèrnèr.

²¹ N’aṽambyô yè n’aṉaga mèwoṉo kotè yiṉo inè: Ôṉènji, azw’avôrô inè, ô kamba aṉènja kè nt’are kwèkwè, na inè, ô ze n’ôma wa sim̃osim̃o, ndô ô nènje mpoṉo y’Anyambyè nt’are rèti.

²² Are kwèkwè gôre zwè gô pe mpagô gôre Sezar, mbè azwè ga rig’ava?

²³ Yesu amyeṉi avôṉô maô, n’awiṉizi yè waô inè:

²⁴ Revaṉi myè fura. Yi re n’ôzô wa mande n’irèndo kè ya mande? Awiṉizi waô inè, yi Sezar.

²⁵ N’awulinyi yè waô inè: Sambô, vaṉi Sezar yom̃a yi Sezar, n’Anyambyè yom̃a y’Anyambyè.

²⁶ Yeṉo wi pa jolya gô kôt’agambi mè gw’azô m’aṉaga, ndô w’am̃ami g’ômwanja wi njiviri yè, n’alwaṉi waô dodo.

²⁷ Awèwo w’isadusi wi bulya nè, e zel’itôngwa, w’aṽyeṉi gôre Yesu, aṽambyè kotè yiṉo inè:

²⁸ Ôṉènji, vôna nt’arèndinyô zwè ne Môsès inè: Ja mwô’ gwè w’ôma ajuwa, arig’ômwantô wè, ndô e pa tig’awaṉa, gambèṉè mwô’ngi yè e ga yômb’ômwantô mè, ko yè jaṉ’awaṉa gôre mwô’rgi yè.

²⁹ Avegagi ngwè mori y’aṉôm̃e ôrwageṉô. Ayômbi ôlônga ômwantô, n’ayuwi yè awaṉa fo.

³⁰ Yeṉo kè w’aṽaṉi na w’ararô w’ayômbi ôtika;

³¹ egolaṉi mèmô kè waô ôrwageṉô w’ayômbi yè, ayuwa kè awaṉa fo. Gô num̃uṉa ayuwi kè ômwantô.

³² Sambô gw’itôngunyô e be dwaṉ’ômwantô wa mande gôre waô?

³³ Konde waô ôrwageṉô w’ayômbi yè.

³⁴ N’awiṉizô waô ne Yesu inè: Awaṉa wi ntye yiṉo wi jômba ayômbizô kè;

³⁵ ndô waô wi be jeṉô n’inyanga nyi dènge mbôra gô ntye mèyo yi bya na gw’itôngunyô avila gw’ijuwa w’ayômbe ge jômbizô.

³⁶ Konde w’arô jolye juwe nyèṉè, konde wi be dwaṉa ga iyenjèl, ko waô dwaṉa kè awaṉa w’Anyambyè, n’awaṉa w’itôngunyô.

³⁷ Ndô inè, mongi wi re juwa pa wi tôngunyô, vangaṉe Môsès e myeza g’ômwanja wa mw’erere, gô fweyè Rerè inè, Anyambyè y’Abraam, n’Anyambyè y’Izaak, n’Anyambyè yi Yakob.

³⁸ Anyambyè arang’ Anyambyè ya mongi wi re juwa pa, ndô ya mongi wi re bo; konde waôdu wi dwaṉa bo vo yè.

³⁹ N’awèwo w’irèndisi w’awiṉizi awulya inè: Ôṉènji, ô re kamba pa mbyambye.

⁴⁰ Na wi re tô jolye nyèṉè gô bambyè kotè.

⁴¹ N’awulinyô waô ne Yesu inè: Wi bulya nè, Krist ômwaṉa wi David sèṉi?

⁴² David ayèmè e bulya gw’ezangô z’Ijembô inè: Rerè awulinyi Reri yam̃ inè: Lwaṉa baru g’ôgo wam̃ ôṉôm̃yè,

⁴³ kaô my’apang’ilôvalôvi yo iyariṉô ny’agôlô mo.

⁴⁴ Sambô David e fweyè inè, Rerè; ayè ko dwaṉ’ômwaṉi wè sèṉi?

⁴⁵ Gw’avôganyôgô yè n’aṉaga waôdu awulinyi iṉèngi yè inè:

⁴⁶ Gelimaṉi gôr’irèndisi, yi tonde kangaṉa n’irôgôsambala, na gô sanguṉô gw’agôliṉô; na gô dwaṉa gô bôngô y’ayôgô gw’inagô si soṉo, na gw’alwaṉô mi njôni gw’igeṽe;

⁴⁷ wi ny’inagô s’itika, agambiṉ’ikambiṉ’ida mpondyaga. Wiṉo wi be p’ôgara vyagaṉô.