Luk 2 - Bibili 1927 (Omyene)

¹ Arweṉi gw’intyugu mèsoṉo inè, ivanga ny’avili gôre Sezar Auguste inè, ntye yôdu yi ga rèndô gw’ezangô.

² Ntèndiṉi nônga yiṉo y’avangyô gw’avegagi Kwirinus ôvangiṉi wi Sirya.

³ N’agèndi waôdu gô tèndô, ôm’edu gô nkali yè.

⁴ Avandi Yôsèf kè avila gô Galile, avila gô nkala yi fweyô inè, Nazarèt, gô kènda gô Yuda, gô nkala yi David yi fweyô inè, Betelèm, konde avegagi gô nagô na gô mbuṽe yi David,

⁵ gô tèndô ayè ni Marya, y’arom̃yô yè, avegagi kè n’inyem̃e.

⁶ Arweṉi nè, gw’alwaṉi waô gôgô, egômbe z’aziṽi gôre Marya gô jaṉa.

⁷ N’ayaṉi yè njalyè yè nôm̃e. N’avingyè yè n’iṉam̃ba, alèwinyè gô mbôra yi ny’inyare, konde re pegege mbôra gôre waô gô nagô yi simbô n’agènda.

⁸ Avegagi gô ntye mè ivenjavenji y’adombè y’alwaṉagi g’ôrôve mbandam̃iṉag’ôlembi waô ôgwèra.

⁹ N’awôm̃unyi yenjèl ya Rèrè gôre waô, n’ônjèlènjèlè wa Rerè w’aṽambi gôre waô vingôvingô. N’agôtyô waô n’itya sipôlô.

¹⁰ Ndô yenjèl y’awulinyi waô inè: Aryaṉi, konde vônaṉi mi bunguṉa ṉwè ntyangô mbya, y’igeṽ’ivôlô, yi be dwaṉa gôr’aṉaga waôdu;

¹¹ konde ṉèṉo wiṉo, gô nkala yi David, aṉw’are jaṉiṉô p’Ôzungè, ayè ne Krist ya Rerè.

¹² N’elingilyô zi be mya ṉwè na yè ne ziṉo inè: Aṉwè be dèng’ekèykèy pingô pa n’iṉamba, ni dèwinyô pa gô mbôra yi ny’inyare.

¹³ Na v’igamba ny’agwaṉa yenjèl y’avegagi ni nkumba mpôlô yi mbèli y’ôrôṽa, nsum̃inyag’Anyambyè, awulya inè:

¹⁴ Ivenda gôr’Anyambyè gw’igôṉômè, n’am̃ènjè gô ntye gôr’aṉaga wi tondô yè!

¹⁵ Arweṉi nè, gw’alubw’iyenjèl avila gôre waô awinya g’ôrôṽa, ivenjavenji y’adombè y’awulyaṉi nè: Azwè ga gèndeṉi kwanga gô Betelèm, ayeṉ’ôsam̃u wiṉo wi re twa pa, wi re Rerè myeza pa zwè.

¹⁶ N’agèndi waô ngwambè, alènge Marya ni Yôsèf, n’ômwaṉa dèwa pa bi gô mbôra yi ny’inyare.

¹⁷ Gw’ayeṉi waô ômwaṉa w’arakilyi agamba m’awulinyô waô g’ômwanja w’ômwaṉa wiṉo.

¹⁸ Waôdu w’ayogyô mô w’am̃ami g’ômwanja w’isam̃u y’awulinyô waô n’ivenjavenji y’adombè.

¹⁹ Ndô Marya avigi agamba miṉo môdu, avikilyaga mô g’ôrèm̃i wè.

²⁰ N’awiny’ivenjavenji y’adombè, mpendyaga ni nsum̃inyag’Anyambyè g’ômwanja w’isam̃u yôdu y’ayogyô waô ayeṉa, vangaṉe nt’aliwô myezô waô.

²¹ Gw’ageki ntyugu y’eṉanay yi r’ômwaṉa gô kèrô, ini nyè ny’aṽètyô inè, Yesu, nt’aliwô bètyô nyô ne yenjèl, ayè vundigagô ro gw’iwum̃u nyi ngi yè.

²² Na gw’agek’intyugu s’ijombunyô saô, ga nt’ar’ivanga nyi Môsès, Yôsèf ni Marya w’aṽagi yè gô Yerusalèm, gô tum̃inyè gôre Rerè,

²³ ga nt’are tèndô pa gw’ivanga nya Rerè inè: Njalyè nôm̃y edu yi be dwaṉ’ôrunda gôre Rerè,

²⁴ ko waô jira kè gô ntyagô abembe ambaṉi ge awaṉa w’amenga aṽaṉi, ga nt’are tèndô pa gw’ivanga nya Rerè.

²⁵ Na vôna, avegagi ôṉôm̃e gô Yerusalèm, ini nyè ne Simeôn. Ôma mè avegagi ôgôre n’ômbya, awôndagi ôzindyô w’Israèl, n’Iṉiṉ’Iṽya ny’avegagi gôre yè.

²⁶ Aliwô amyezyô n’Iṉiṉ’Iṽya inè, ayeṉ’ijuwa kaô adônge jeṉe Krist ya Rerè.

²⁷ Ayinginyô yè n’Iṉiṉ’Iṽya gô nagô y’Anyambyè. Na gw’ayinginy’izombi ômwaṉa Yesu, gô dendiṉè ga nt’are ntyale y’ivanga,

²⁸ vovo awongyè yè gw’ago mè, azaviṉ’Anyambyè, awulya inè:

²⁹ Vèṉo, Rera, yivire nyôngô yo gô kènda n’am̃ènjè, ga nt’ar’igambi nyo.

³⁰ Konde antyo mam̃ m’ajeṉ’isungiṉi so,

³¹ isungiṉa si re wè kekiza pa gw’azô m’aṉongo môdu,

³² ôzange gô bamba gôr’aṉongo, n’ônjèlènjèlè w’iṉongo nyo, Israèl.

³³ N’am̃ami reri yè ni ngi yè isam̃u y’awulyô g’ômwanji wè.

³⁴ Azaviṉô waô ne Simeôn, n’awulinyi yè Marya, yi ngi yè inè: Vôna, ômwaṉa wiṉo are dôṽyô pa gô pôsunya aṉongunya k’awenge gôr’Israèl, na gô dwaṉ’elingilyô zi be kambô mbe,

³⁵ n’ôrèm̃i wo wi be tôlô pwese n’ôkwara, ko ipikilya s’irèm̃’imyenge tum̃inyô.

³⁶ Avegagi kè ôvogisi ômwantô, ini nyè ne Ana, ’mwamwantô wi Fabuèl, ôma wi mbuṽe y’Asèr. Avegagi dômbiṉa pa pôlô, aliwô adwaṉi n’ôṉôm̃u wè impum̃’ôrwageṉô ayè jômbè pa.

³⁷ Aliwô adwaṉ’ôtika, n’avegagi agôm̃i m’impum̃’eṉanay n’impum̃’inay g’ôṉèro wè; ômwantô wiṉo e pa dubwa avila gô nagô y’Anyambyè, ndô alwaṉi nsaviṉag’Anyambyè, ni mpengag’esônge nkwenaga k’inkolo ôgwèra n’ôm̃anda.

³⁸ Ayè aṽyeṉi egômbe mè av’akeṽa gôr’Anyambyè, agamba g’ômwanja wi Yesu gôr’aga waôdu w’awôndagi ôlanduṉi wi Yerusalèm.

³⁹ Gw’am̃azi waô isam̃u yôdu y’azômbyô n’ivanga nya Rerè, Yôsèf ni Marya w’awinyi gô Galile, gô nkali yaô Nazarèt.

⁴⁰ N’avôm̃agi ômwaṉa ayola. Avegagi ralye n’imya, n’imèpiṉô s’Anyambyè s’avegagi gôre yè.

⁴¹ Izombi yi Yesu y’agèndagi ômpum̃y’edu gô Yerusalèm gô fèti yi Paki.

⁴² Gw’arweṉi yè igôm̃i ny’impum̃a n’impum̃’imbaṉi g’ôṉèro wè, avandi waô gôgô, ga nt’avegagi ntyale gw’egômbe zi fèti.

⁴³ Na gw’aliwô waô w’akekiz’intyugu, gw’awinyi waô, ômwaṉa Yesu alèki gô Yerusalèm. Ndô reri yè ni ngi yè wi pa mya.

⁴⁴ Ndô w’avikilyagi nè are na waô gô nkondo, n’agèndi waô ôgèndo wi ntyugu mori, n’awutagi waô yè gôre mongi yaô n’irangaṉô yaô.

⁴⁵ Ndô gw’arweṉi waô wi pa dèngè, w’awinyi gô Yerusalèm gô butè.

⁴⁶ N’arweṉi ntyugu ntyarô vyagaṉô, alèngi waô yè gô nagô y’Anyambyè, dwaṉa pa baru gô garegare y’iṉènji, mpôganyôgô waô ni mbambyaga waô ikotè.

⁴⁷ Waôdu w’avôganyôgô yè w’am̃am’ikôtizi sè n’ijiviri sè.

⁴⁸ Gw’ayenyô yè ne izombi yè, w’am̃ami pôlô, n’awulinyô yè no ngi yè inè: ’Mwam̃, ntiṉa nde yi re wè dendiṉa pa zwè yeṉo? Vôna, reri yo na myè, azwè abutôgo n’añandi.

⁴⁹ N’awulinyi yè waô inè: Ntiṉa nde y’abutaga ṉwè myè? Aṉwè pa mya inè, mi ga yanje ṽilô ya Reri yam̃?

⁵⁰ Ndô wi re kôtiz’igamba ny’awulinyi yè waô.

⁵¹ N’azum̃iṉi yè na waô gô kènda gô Nazarèt, n’arugizi yè ôkuṽi wè gôre waô. N’avigi ngi yè isam̃u yiṉo yôdu g’ôrèm̃i wè.

⁵² N’avôm̃agi Yesu gw’imya, na gw’elaviṉi, na gw’imèpiṉô g’ôzô w’Anyambyè na gw’azô m’aṉaga.