Luk 19 - Bibili 1927 (Omyene)

¹ Ayingiṉi Yesu avyagaṉa gô Yerikô.

² N’avegagi vovo ekiti z’ôma, ini nyè ne Zake, avegagi kè gw’ewônjô z’ipublikan;

³ awutagi gô jeṉa nt’are Yesu, ndô e pa jolya g’ômwanja w’ibuṉa s’aṉaga, konde avegagi ôpe.

⁴ N’avali yè mangô gô bôsô, avanda gw’erere gô jeṉè, konde avegagi gô pyagaṉa gô mpoṉo mèyoṉo.

⁵ Gw’aṽyeṉi Yesu gô mbôra mèyo, avôni antyo mè gw’igôṉô, na gw’ayenyè yè, awulinyi yè inè: Zake, zunge sum̃iṉa; konde ṉèṉo wiṉo, myè ko dwaṉa gô nagô yo.

⁶ N’azunge sum̃iṉi Zake, awongè ni mbya.

⁷ Gw’ayeṉi waô yeṉo, waôdu w’alagalagi, awulya inè: Are kènda pa gô dwaṉ’ôgènda w’ôm’ombe.

⁸ Ndô Zake agum̃aṉi gô bôsô ya Rerè, awulinyè inè: Vôna, Rera, mi pe mbèy y’igumbi nyam̃ gôr’ikuge, na ja my’are bongiṉa p’ôma ezom̃a n’ipita, mi fwiṉiza zô gôre yè nyongo nay.

⁹ Awulinyô yè ne Yesu inè: Ṉèṉo wiṉo nagô yiṉo y’abyeṉô n’isungiṉa, konde ayè kè ômwaṉa w’Abraam.

¹⁰ Konde Ômwaṉa w’ôma are bya pa gô buta azungiṉa ezom̃a zi re pera pa.

¹¹ Gw’avôganyôgô waô isam̃u yiṉo, Yesu agundi nkôgô kè, konde avegagi pyèrè ni Yerusalèm, na konde w’avikilyi nè, iṉongo ny’Anyambyè nyi be sunge bôm̃unya pelè.

¹² Yeṉo awulyi yè inè: Enam̃i z’ôma agèndi gô ntye ya bô, gô bong’inyanga nyi penda, ko yè tô fwinya.

¹³ Aweyi yè igôm̃i ny’inyôngô sè, ava waô igôm̃i ny’imina, awulinya waô inè: Gôlaṉi ôkita na sô, kaô my’afwinya.

¹⁴ Ndô aṉaga wi ntye yè w’aṽiki yè, n’arôm̃i waô igende gôre yè, gô bulya inè: Azwè pa bel’ôma wiṉo gô pangiṉa zwè.

¹⁵ N’arweṉi ayè pô p’inyanga nyi penda, gw’awinyi yè, azômbyi nè, inyôngô mè s’avenyô yè sika, si ga weyô gôre yè, ko yè mya nt’adiwô dèng’ôm’edu n’ikôla.

¹⁶ N’aṽyeṉ’ôlônga, awulya inè: Rera, mini yo yi re dènga p’igôm̃i ny’imina.

¹⁷ N’awulinyè yè inè: Mbyambye, nyôngô mbya, gô re nè, ô re dwaṉa pa n’inyanga nyi bekelyô g’ôsam̃u ômwangô, lwaṉa n’inyanga nyi pangiṉ’igôm̃i ny’inkala.

¹⁸ N’aṽyeṉi waṽaṉi, awulya inè: Rera, mini yo yi re dènga pe min’ôtaṉè.

¹⁹ N’awulinyè yè inè: Lwaṉ’awè kè n’inyanga nyi pangiṉe nkal’ôtaṉè.

²⁰ N’aṽyeṉ’ôm̃ori, awulya inè: Rera, vône mini yo ye yiṉo, y’avenjavenjô myè kôra pa ni tôlô;

²¹ konde my’aryeṉi wè, konde awè ôm’ôyoli; ô bong’ezom̃a zi re wè pa dimbiṉa, ô teṉ’ezom̃a zi re wè pa bèṉa.

²² N’awulinyè yè inè: Awè nyôngô mbe, mi jèkèlyo n’agamba mi re kogwa pa avila g’ôgwaṉi womè; w’amyeṉi nè, myè r’ôm’ôyoli, mbongag’ezom̃a zi re myè pa dimbiṉa, ni nteṉag’ezom̃a zi re myè pa bèṉa;

²³ sambô ntiṉa nde y’ayasi wè gô fwele siki yam̃ gôre mongi wi pendakaṉe sika, ko gw’afwinya myè, mi bonga yô n’ôba ta?

²⁴ N’awulinyi yè w’avegagi vovo inè: Wongiṉaṉi yè mina mè, ava yô gôre yè yi re n’igôm̃i ny’imina.

²⁵ Awulinyi waô yè inè: Rera, are n’igôm̃i ny’imina.

²⁶ Mi bulinya ṉwè inè: Ôm’edu are dènga pa gôre yè be pô, ndô ayè yi re e zele dènga pa vangaṉ’ezom̃a zi re na yè zi be bongiṉô yè.

²⁷ Ndô ilôvalôvi yam̃ mèyo, yi re yi pa bela myè pangiṉa waô, ṽagaṉi yô guṉu, ko jôṉaṉi yô g’ôzô wam̃.

²⁸ Yesu kamba pa yeṉo, agèndi gô bôsô y’aṉaga gô panda gô Yerusalèm.

²⁹ Arweṉi gw’azusi Yesu pyèrè ni Bètfaze ni Betani, gô nômba yi fweyô inè, nômba yi yôlivi, arôm̃i aṽaṉi avila gôr’iṉèngi yè, awulya inè:

³⁰ Gèndaṉi gô nkala yi re swaswo na ṉwè; gô be jingiṉa ṉwè gôgô, aṉwè be diṽinyô mwô’buru diryô pa, wi re wi pa pandô ôma ni mori; vuruṉaṉi wô, ko bagaṉi wô.

³¹ J’aṉw’abambyô n’ôma inè: Ntiṉa nde yi puruṉa ṉwè wô? ko fwiṉizaṉi yè inè: Rerè ar’isolo na wô.

³² N’agèndi waô w’arôm̃yô, aliṽiny’isam̃u ga nt’awulinyô waô ne Yesu.

³³ Gw’avuruṉagi waô mwô’buru, mongi w’aṉivi wô w’awulinyi waô inè: Ntiṉa nde yi puruṉa ṉwè mwo’buru?

³⁴ Awiṉizi waô inè: Rerè ar’isolo na wô.

³⁵ N’aṽagi waô mwô’buru gôre Yesu, n’aralyi waô ingoy saô gô wô, avandize Yesu gô wô.

³⁶ Gw’agèndagi yè, aṉaga w’ayany’ingoy saô gô mpoṉo.

³⁷ Gw’aṽyeṉi yè pyèrè ni Yerusalèm, g’ôlonga wi nômba yi yôlivi, nkumba y’iṉèngi yè yôdu y’avakilyi gô jeṉe mbya azum̃iny’Anyambyè n’inyôy ivôlô g’ômwanja wi lemba yôdu y’ayenyô waô.

³⁸ Awulyi waô inè: Ôzaviṉô gôr’ôga wi bya gw’ina nya Rerè! Am̃ènjè g’ôrôṽa n’ivenda gw’igôṉômè!

³⁹ Ifarisi sinyèwo gô nkondo w’awulinyi Yesu inè: Ôṉènji, leg’iṉèngi yo.

⁴⁰ N’awiṉizi yè inè: Mi bulinya ṉwè inè, ja wiṉo w’adwaṉa do, adô mi be tônga.

⁴¹ Gw’aṽyeṉi Yesu pyèrè ni nkala, ayeṉa yô, aleṉi g’ômwanja wa yô, awulya inè:

⁴² Gavoṉo w’amyeṉi, awè kè, gô ntyugu yiṉo isam̃u yi pang’am̃ènjè mo! Ndô vèṉo yi re jumbuṉô pa gw’antyo mo.

⁴³ Konde intyugu si be bya gôre wè, si be kômbiṉô wè n’ilôvalôvi yo n’ôgômba vingôvingô, aṉunjo ngwa g’ôzamby edu;

⁴⁴ yi be jilizo, awè n’ômwaṉi wo gô garegare yo, yi ze tige gôre wè idô gw’idô, konde ô pa mya egômbe z’aṽyeṉi Anyambyè gô belo.

⁴⁵ N’ayingiṉi yè gô nagô y’Anyambyè, avakilya gô kogunya waô w’agôlag’agôlô;

⁴⁶ awulinyi yè waô inè: Are tèndô pa inè: Nagô yam̃ yi be dwaṉe nagô y’ikambiṉa. Ndô aṉw’are panga pa yô ômpulungu w’ifwe.

⁴⁷ Aṉènjagi yè ntyugw’edu gô nagô y’Anyambyè. Ndô imiṉisè impôlô, n’irèndisi, n’ayôgô w’aṉaga w’awutagi gô jôṉè;

⁴⁸ ndô wi pa mya nt’are waô ko kôtè, konde aṉaga waôdu w’azôngagi gô pôganyô yè.