Luk 16 - Bibili 1927 (Omyene)

¹ Yesu awulinyi kè iṉèngi yè inè: Ekiti z’ôma avegagi n’ôma w’avenjavenjag’igumbi nyè; azozizô gôre yè inè, e bundakaṉe yom̃i yè.

² Aweyè yè, awulinyè inè: Ôsam̃u nde wiṉo wi jogo myè g’ômwanji wo? Vare myè ntangô nt’ar’eṽilô zo, konde w’ayolye tô dwaṉe nyèṉè gw’ewônjô z’igumbi nyam̃.

³ N’awulyi ôma w’azozizô g’ôrèm̃i wè inè: Mi be denda sèṉi, gô re nè reri yam̃ e tômba myè avila gô pangiṉ’igumbi nyè? Gô janja gô ntye? mi ze ni ngulu. Na gô nègira? mi jeṉe ntyoṉi.

⁴ My’avôrô nte be denda myè, gô be tômbô myè avila gw’eṽilô zam̃, ko aṉaga bonga myè gw’inagô saô.

⁵ N’aweyi yè ôm’edu w’aṉwani reri yè, n’awulinyi yè ôlônga inè: Ô nwane reri yam̃ ntangô sèṉi?

⁶ Ayiviri yè inè: Nkam̃a y’inkulu s’agali. N’awulinyè yè inè: Wong’ezangô zo, ko sunge dwaṉa baru, arènd’agôm̃i ataṉè.

⁷ Vovo awulinyi yè ôm̃ori inè: Awè kè ô nwane ntangô sèṉi? Ayiviri yè inè, nkam̃a yi gara y’ibile. N’awulinyè yè inè: Wong’ezangô zo, ko tènda agôm̃i eṉanay.

⁸ Rerè y’ôm’ombe mèwoṉo azum̃inyi yè konde ayanji n’ôkeli. Konde awaṉa w’ivôm̃a nyiṉo wi re n’ôkeli gw’ivôm̃i nyaô vyagaṉô n’awaṉa w’ôzange.

⁹ Ndô mi bulinya ṉwè inè: Vangiṉaṉ’ikuṽi yaṉi indegô n’agumb’ambe mi ntye, inè, gô be maṉa mô gôre ṉwè, ko waô bonga ṉwè gw’alwaṉô ma koṉako.

¹⁰ Ayè yi bekelyô gw’isam̃u imyangômè, e be bekelyô kè gw’isam̃u impôlô, n’ayè yi kènda règo gw’isam̃u imyangômè, e be kènda règo gw’isam̃u impôlô.

¹¹ Sambô j’aṉw’azele dwaṉa pa aṉaga wi re ko bekelyô gw’agumb’ambe mi ntye, mande be jegiṉa ṉwè agumba ma rèti?

¹² Na j’aṉw’azele dwaṉa pa n’inyanga nyi bekelyô gô yom̃a yi ngaṉi, mande be pa ṉwè yom̃i yaṉimè?

¹³ E zele nyôngô yi re ko janjiṉe rerè mbaṉi. Konde e be bike mori, ko yè tonde mori; e be diṽa ni mori, ko yè pèdye mori. Aṉw’ayolye janjiṉ’Anyambyè ni Mamon ta.

¹⁴ Ifarisi w’avegagi n’ôgasô w’aṉiva, w’ayogyô kè isam̃u yiṉo yôdu, n’azelyagi waô yè.

¹⁵ Awulinyô waô ne Yesu inè: Aṉwè buta gô dwaṉ’aṽya gw’azô m’aṉaga, ndô Anyambyè avôrô irèm̃i yaṉi; konde ezom̃a zi pendyô pôlô gôr’aṉaga zô n’ezom̃a zi bikô gw’antyo m’Anyambyè.

¹⁶ Ivanga n’ivogisi y’alwaṉi kwanga gw’egômbe zi Yôan; avila gw’egômbe mèzoṉo iṉongo ny’Anyambyè nyi kambiṉô, n’ôm’edu e jingiṉa gô nyô ni ngulu.

¹⁷ Are dèla gôr’ôrôṽa ni ntye gô pyagaṉa, vyagaṉô na g’ôrèndo ôm̃ori w’ivanga gô tômbô.

¹⁸ Ôm’edu e tômb ômwantô wè ayômb’ômwèṉè, e bela wi ngaṉi; n’ôm’edu e jômb’ômwantô mè wi re tômbô pa n’ôṉôm̃u wè, e bela wi ngaṉi.

¹⁹ Avegagi ekiti z’ôma, z’aworagi nkèmbo ya gelô na yi lyamba mbya, n’anyeṉagi yè ntyugw’edu ayeṉe mbya.

²⁰ Elèngèlè z’ôma, ini nyè ne Lazare, alimbinyô gw’evungu zè, ôkuṽi wè ralye n’ilôsô,

²¹ n’aṽelagi yè gô jôrizô ni nkizi y’avôswagi avila gô tavulu y’ekiti; n’aṽyeṉig’imbwa anèmbag’ilôsô yè.

²² N’arweṉi nè, elèngèlè z’ayuwi, n’arwanyô yè ne iyenjèl gô ntôṉô y’Abraam. N’ayuwi kè ekiti, aṽènyô yè.

²³ Gw’avegagi yè gw’azingô gw’ilômbô, arômbiṉi antyo mè, ayeṉ’Abraam davadavye ni Lazare gô ntôṉô yè.

²⁴ Arôngi yè inè: Rera Abraam, yeṉa my’ ekèṽa, ko tôm̃e Lazare, inè, e ga luṽye ntyay y’ôm̃eṉô wè gw’aṉingô avoṉiza myè ôṉèm̃è wam̃, konde mi jeṉ’azingô g’ôgôṉi wiṉo.

²⁵ Ndô Abraam awiṉizi nè: ’Mwam̃, yônginya inè, gw’avegagi wè bo w’alèngi yom̃i yo ṽya, ndô Lazare alwaṉi kaô n’injuke; ndô vèṉo e jeṉe mbya, n’awè ô jeṉizô azingô.

²⁶ Na vyagaṉô n’isam̃u yiṉo yôdu, are dwaṉizô pa mbôra y’ôrong’ômpôlô ntyo zwè ntyo ṉwè; yeṉo waô w’arô pyagaṉi avila vèṉo agènda gôre ṉwè, ntyo avila gôgô aṽya gôre zwè w’ayolye nogaṉe.

²⁷ N’awiṉizi ekiti inè: Sambô, kokolo, Rera Abraham, rôm̃e Lazare gô nagô ya reri yam̃;

²⁸ konde my’are n’awarerè ataṉè. Ko yè myeza waô isam̃u yiṉo, waô vende bya gô mbôra y’azingô yiṉo.

²⁹ Abraam awiṉizi nè: Wi re ni Môsès n’ivogisi; wi ga yogiṉô waô.

³⁰ N’awulyi yè inè: Nyawè, rera Abraam, ndô jog’ôma are juwa pa akènda gôre waô, gambèṉè wi be kalwa.

³¹ N’awulinyô yè n’Abraam inè: Ja w’ayogiṉô Môsès n’ivogisi, gambèṉè ôm’ayolye pange waô jivira, vang’atôngwa ôma avila gw’ijuwa.