Luk 15 - Bibili 1927 (Omyene)

¹ Aṽyeṉ’ipublikan waôdu n’aṉag’aṽe aṽya pyèrè gôre Yesu gô jogw’agambi mè.

² N’alagalag’ifarisi n’irèndisi awulya inè: Ôma wiṉo e bong’aṉag’aṽe, anya na waô.

³ Ndô agôviṉi yè waô nkôgô yiṉo inè:

⁴ Mande gôre ṉwè, j’are ni nkam̃a y’adombè, ko yè perô n’im̃ori, arige agôm̃i m’adombè eṉôgôm̃i n’adombè eṉôgôm̃i gw’itôve, ko yè kènda gô buta mènyo ny’averi, kaô adènga nyô?

⁵ Na gô dèngè nyô, e talya nyô gw’ibegi sè, njeṉage mbya na nyô,

⁶ na gô fwinyè gô nagô, e fwey’indegô sè, n’irangaṉô yè, awulinya waô inè: Yeṉaṉi mbya na myè, konde my’are dènga p’idombè nyam̃ ny’apegaga pera pa myè.

⁷ Mi bulinya ṉwè inè: Yeṉo be dwaṉa kè igeṽ’ivôlô g’ôrôṽa g’ômwanja w’ôm’ombe ôm̃ori e kalwa, vyagaṉô n’agôm̃i m’aṉag’aṽya eṉôgôm̃i n’aṉag’eṉôgôm̃i wi re wi zele n’isolo nyi kalwa.

⁸ Ge ômwantô mè mande, j’are n’igôm̃i ny’ifura, ko yè perô ne mori, aṉunge lambi, ayombuṉe nagô, awuta kaô adènga yô?

⁹ Na gô dèngè yô, e fwey’indegô sè n’irangaṉô yè, awulya inè: Yeṉaṉi mbya na myè, konde my’are dènga pe fura y’adiwô pera pa myè.

¹⁰ Mi bulinya ṉwè inè: Yeṉo dwaṉa kè igeṽa gw’azô m’iyenjèl s’Anyambyè g’ômwanja w’ôm’ombe ôm̃ori e kalwa.

¹¹ N’arô bulyi yè inè: Ôma avegagi n’awaṉ’aṉôm̃e aṽaṉi.

¹² Awulinyi ’mwerumbe reri yè inè: Rera, va myè mbèy y’igumba nyi be jigô myè. N’ageriṉi rerè ageriṉa waô igumbi nyè.

¹³ Intyugu inyèwo pyagaṉa pa, ’mwerumbe alatizi yom̃i yè yôdu ta, agènd’ôgèndo wè gw’iṉongw’ila; gôgô awunji yè yom̃i yè yôdu gw’isam̃u imbe.

¹⁴ Gw’aliwô yè amaz’igumbi nyè nyôdu, arweṉi njaṉa mpôlô gô ntye mèyoṉo, n’avakilyi yè gô jela.

¹⁵ N’agèndi yè gô janjiṉ’ôma wi ntye mèyoṉo, n’ôma mèwoṉo arôm̃i yè gw’itôve sè gô nyez’ingôwa.

¹⁶ N’arô tondi yè gô jôriz’iwum̃u nyè n’inya s’anyenyôgô ingôwa, ndô e pa pô inya n’ôma.

¹⁷ Ndô gw’awinyi yè g’ôgu wè, awulyi nè: Mongi janja awenge wa reri yam̃ wi re n’inya kwèkwè na vyagaṉô, ndô mi juwa vèṉo ni njaṉa!

¹⁸ Mi be kum̃aṉa, agènda gôre reri yam̃, awulinyè inè: Rera, my’are janja p’ibe g’ôrôṽa na g’ôzô wo kè,

¹⁹ my’azele n’inyanga nyèṉè gô fweyô inè, ômwaṉi wo; vanga myè g’ôm̃ori wa mongi janjiṉo.

²⁰ N’agum̃aṉi yè, agènda gôre reri yè. Ndô gw’avegagi yè e p’are bô, reri yè ayeṉi yè avôgiṉè, n’avali yè mangô, agôriṉa gô ngori yè, azombè.

²¹ N’awulinyô yè n’ômwaṉa inè: Rera, my’are janja p’ibe g’ôrôṽa na g’ôzô wo kè; my’azele n’inyanga nyèṉè gô fweyô inè, ômwaṉi wo.

²² Ndô rerè awuliny’inyôngô sè inè: Ṽagaṉi ngoy mbyamè, ko borizaṉi yè yô; welaṉ’ôm̃ôrô g’ôgo wè, n’intyôzô s’atanga gw’agôlô mè.

²³ Ko bagaṉi kè mwô’nyare ôvom̃i, ayôṉa wô.

²⁴ Azwè ga nye ayeṉe mbya; konde ômwaṉi wam̃ wiṉo apegaga jawa pa, ndô atô tweṉi bo; apegaga pera pa, ndô atô dèngyô. N’avakilyi waô gô jeṉe mbya.

²⁵ Ndô ômwaṉ’ôṉèro avegagi gô ntyaga. Gw’aṽyeṉi yè azusa pyèrè ni nagô, ayogyô yè abeka n’iyiṉô.

²⁶ Aweyi yè mori avila gôr’inyôngô, aṽambyè inè: Isam̃u nde yiṉo?

²⁷ N’awulinyô yè ne nyôngô mè inè: Mwô’ngi yo abyeṉi, ni reri yo are jôṉa pa mwô’nyare ôvom̃i, konde are yè dènga p’ôkuṽa mbyambye.

²⁸ Ndô aṽendi, ko ayivira gô jingiṉa. N’agogwi reri yè agwenè inkolo inè, e ga yingiṉe.

²⁹ N’awiṉizi yè reri yè inè: Vôna, impum̃’imyenge yiṉo yi re myè janjiṉo pa, ko my’ avav’izômbyô yo, ndô ô pa pa myè ni mori venge mwô’mbôṉi ko mi jeṉe mbya n’indegô sam̃.

³⁰ Ndô gw’aby’ômwaṉi wo wiṉo, are bunja p’igumbi nyo ni vôvevôve, w’ajôṉiṉè mwô’nyare ôvom̃i!

³¹ Awulinyô yè ne reri yè inè: ’Mwam̃, ô re na myè egômbe zôdu, ni yom̃a yôdu yi re na myè iyo;

³² ndô apegaga kwèkwè gôre zwè gô jeṉe mbya n’igeṽa, konde mwô’ngi yo wiṉo apegaga juwa pa, ndô atô tweṉi bo, konde apegaga pera pa, ndô atô dèngô yè.