Luk 13 - Bibili 1927 (Omyene)

¹ Gw’egômbe mèzoṉo aṉag’awèwo w’awulinyi Yesu g’ômwanja wa mongi Galile, nt’alatizi Pilatu alatize ntyiṉi yaô na y’intyagô saô ta.

² Awiṉizô waô ne Yesu inè: Aṉwè tanga nè, mongi Galile mèwoṉo w’avegag’aṽe vyagaṉô na mongi mori wi Galile waôdu konde w’ayeṉ’azingô mèmoṉo?

³ Mi bulinya ṉwè inè, nyawè. Ndô j’aṉw’aṉige nkôndi, gambèṉè aṉwè du aṉwè be jilizyô mbela mô.

⁴ Ge igôm̃i ny’aṉaga n’aṉag’eṉanay mè, w’avôsunyô ne nagô y’adô gô Silôe, ko yô jôṉa waô, aṉwè tanga nè, w’avegag’ôgara vyagaṉô n’aṉag’am̃ori waôdu wi dwaṉa gô Yerusalèm?

⁵ Mi bulinya ṉwè inè, nyawè. Ndô j’aṉw’aṉige nkôndi, gambèṉè, aṉwè du aṉwè be jilizyô mbela mô.

⁶ N’agôvi yè kè nkôgô yiṉo inè: Avegag’ôma n’erere zi figi bèṉô pa gô ntyagi yè y’igoli. N’aṽyeṉi yè mbutag’ilônda gô zô, ndô e pa dènga du.

⁷ Vovo awulinyi yè ôvenjavenji wi ntyaga y’igoli inè: Vôna, impum̃a yiṉo irarô mi pilavila gw’erere ziṉo zi figi gô but’ilônda, ndô mi pa dènga du. Ṽega zô, ntiṉa nde yi diṽiṉa zô ntye?

⁸ Awiṉizô yè n’ôvenjavenji wi ntyaga inè: Rera, rô tigare zô ômpum̃a wiṉo kè, kaô my’atumb’ibelika vingô gô zô, awele wulu gô zô.

⁹ Vendetwa gô bôsô zi be jaṉ’ilônda; ndô ja zi pa jaṉ’ilônda, ko vanga w’abega zô.

¹⁰ Aṉènjagi Yesu gô nagô mori yi soṉo, gô ntyugu yi soṉo.

¹¹ Na vôna, avegagi vovo ômwantô w’avegagi n’iṉiṉa nyi ndèliṉi igôm̃i ny’impum̃a n’impum̃’eṉanay: n’avegagi yè puraṉa pa mbè, e pa jolye nyonyuṉ’ôkuṽi wè.

¹² Gw’ayenyô yè ne Yesu, aweyi yè, awulinyè inè: Ômwantô, w’apurunyô avila gô ndèliṉi yo.

¹³ N’aralyè yè ago mè. Na v’igamba ny’agwaṉa anyonyui gôre, azum̃iny’Anyambyè.

¹⁴ Ndô aṽendi ôvangiṉi wi nagô yi soṉo, konde Yesu aying’ijinga siṉo gô ntyugu yi soṉo, awulinyi yè aṉaga inè: Are ntyugu ôrôṽa si re kwèkwè gôr’aṉaga gô janjô; sambô yôgôṉi gô jingô gw’intyugu mèsoṉo, ndô aranga gô ntyugu yi soṉo.

¹⁵ Ndô Rerè awiṉizi yè inè, aṉwè imbyagwaṉa! ôm’edu gôre ṉwè, gô ntyugu yi soṉo, e pa puruṉe nyare yè ge buru yè avila gô nagô ya yô, age jonja yô aṉingô?

¹⁶ N’ômwantô wiṉo, mbamba nyantô y’Abraam, apegaga diryô pa ne Satan igôm̃i ny’impum̃a n’impum̃’eṉanay yiṉo, e ze n’inyanga nyi puruṉô avila g’ôgôrô wiṉo gô ntyugu yi soṉo?

¹⁷ Gw’agambagi yè agamba miṉo, ilôvalôvi yè yôdu y’ayeṉi ntyoṉi, ndô aṉaga w’ayeṉi mbya gw’isam̃u yôdu yi mamô y’alendyô yè.

¹⁸ Vovo arô bulyi yè inè: Iṉongo ny’Anyambyè nyi r’egolaṉi g’ande, na mi be kolaṉa nyô n’ezom̃a nde?

¹⁹ Nyi r’egolaṉi g’intyo nyi mutardi, ny’awongyô n’ôma awala nyô gô ntyagi yè; avôm̃i nyô, arw’erere, n’inyoṉi s’igôṉô s’aṽatam̃iṉi gw’ampari ma zô.

²⁰ N’arô bulyi yè inè: Mi be kolaṉ’iṉongo ny’Anyambyè n’ezom̃a nde?

²¹ Nyi r’egolaṉi ga levèn y’awongyô n’ômwantô awela yô gw’itôndô irarô yi mpèmba gô pange mpèmba yôdu gô panda.

²² Avyagaṉi Yesu gw’inkal’impôlô n’inyangô, nènjaga ni nkèndaga gô Yerusalèm.

²³ Awulinyô yè n’ôm̃ori inè: Rera, ar’awèwo dadyè wi sungiṉô? N’awiṉizi yè waô inè:

²⁴ Lembareṉi gô jingiṉa gw’iguge nya zwa. Konde, mi bulinya ṉwè inè, awenge wi be buta gô jingiṉa, ko w’ayolya.

²⁵ Gô be diwô ôṉivi wi nagô aṉongwi aṉunj’iguge, ko ṉwè pakilya gô kum̃aṉa gw’igala, alôk’iguge, awulya inè: Rera, rera, ṉunguṉa zwè iguge! gambèṉè e be fwiṉiza ṉwè inè: Mi pa mye nkôṽa y’apilô ṉwè.

²⁶ Vovo be pakilya ṉwè gô bulya inè: Azwè anyeṉagi ayongaga na wè, awè kè w’aṉènji gw’agali mazô.

²⁷ Ndô e be fwiṉiza inè: Mi bulinya ṉwè inè, mi pa mye nkôṽa y’apilô ṉwè; lubwaṉi avila gôre myè, aṉwèdu iyanjisi y’ibe.

²⁸ Vovo be dwaṉ’edingô ni nkègèrè y’anô, gô be jeṉa ṉwè Abraam, n’Izaak, ni Yakob, n’ivogisi yôdu, gw’iṉongo ny’Anyambyè ko ṉwèmè falô gw’igala.

²⁹ Wi be bya avila gô nkôṽa yi tongwa ni nkômbe, n’avila gô nkôṽa yi kènda na yô, n’avila gô Nor, n’avila gô Sud, alwaṉa baru gw’iṉongo ny’Anyambyè.

³⁰ Na vôna, aṉum̃uṉa wi be dônga, n’alônga wi be num̃uṉa.

³¹ Gô ntyugu mèyoṉo aṽyeṉ’ifarisi sinyèwo gô bulinyè inè: Lubwa avila vèṉo, ko kèndaga, konde Erod e bela gô jôṉo.

³² Awiṉizi yè waô inè: Gèndaṉi, ko bulinyaṉi evengambwa mèzoṉo inè: Vôna, mi tômb’aṉiṉ’ambe, aying’inkaṉi ṉèṉo wiṉo ni mèṉè, ni ntyugu yi ntyarô, gambèṉè my’amaza.

³³ Ndô my’are ko kombiz’ôgèndo wam̃ ṉèṉo wiṉo, ni mèṉè, ni mbaṉi, konde ôvogisi ajôṉô kaô gô Yerusalèm.

³⁴ Yerusalèm, Yerusalèm, awè yi jôṉ’ivogisi avunga waô adô w’arôm̃yô gôre wè, inyongo sinyenge s’aṽeli myè gô datiz’awaṉi wo, ga nte datiz’ôbôtônjogoṉi awaṉi wè gw’ampavi mè, ko ṉwè ayivira!

³⁵ Vônaṉi, nagô yaṉi yi be tigaṉa gôre ṉwè; ndô mi bulinya ṉwè inè: Aṉwè ze jeṉe myè nyèṉè, kaô gw’egômbe zi be bulya ṉwè inè: Ôzaviṉô gôre yè yi bya gw’ina nya Rerè!