Levitiki 9 - Bibili 1927 (Omyene)

¹ Gô ntyugu y’eṉanay Môsès aweyi Aarône n’awaṉi wè aṉôm̃e, n’aṉèro w’Israèl.

² N’awulinyi yè Aarône inè: Wong’ômwaṉa wi nyare g’ômwanja wi ntyagô y’ôraṽô wi mpungu y’ibe, n’idombè iṉôm̃e g’ômwanja wi ntyagô yi pezô, ômwaṉa wi nyare n’idombè iṉôm̃e yi ga lwaṉe ntyèmbo fo, ko jira yô ntyagô g’ôzô wi Yeôva.

³ Ô be kamba gôr’Israèl, awulya inè: Wongaṉi mbôṉi nôm̃e, g’ômwanja wi ntyagô y’ôraṽô wi mpungu y’ibe, ômwaṉa wi nyare n’ômwaṉa w’idombè w’ômpum̃’ôm̃ori na wi re ntyèmbo fo, g’ômwanja wi ntyagô yi pezô;

⁴ nyare nôm̃e n’idombè iṉôm̃e g’ômwanja w’intyagô s’akeṽa, gô jira sô g’ôzô wi Yeôva, ni ntyagô y’inya keziṉô pa n’agali; konde Yeôva abôm̃unya ṉèṉo wiṉo gôre ṉwè.

⁵ N’aṽagi waô eza z’azômbyô ne Môsès swaswo ni ñanja y’idataṉa, n’azusi mandô yôdu pyèrè, n’agum̃aṉi yô g’ôzô wi Yeôva.

⁶ N’awulyi Môsès inè: Wiṉo ne ôsam̃u wi re Yeôva sômbya pa, inè, aṉwè ga lende wô, ko ivenda nyi Yeôva bôm̃unya gôre ṉwè.

⁷ N’awulinyi Môsès Aarône inè: Zusa pyèrè gô mbôra yi jirô intyagô; yire ntyagô yo yi taṽe mpungu y’ibe ni ntyagô yo yi pezô, ko ôraṽô wi mpungu y’ibe g’ômwanji wo na g’ômwanja w’iṉongo, ko pa ôraṽo wi mpungu y’ibe g’ômwanji waô, ga nt’are Yeôva sômbya pa.

⁸ Azusi Aarône gô mbôra yi jirô intyagô, n’ayôṉi yè ômwaṉa wi nyare g’ômwanja wi ntyagô yè y’ôraṽô wi mpungu y’ibe.

⁹ Awaṉ’aṉôm̃e w’Aarône w’aveṉi yè ntyiṉa, n’avundi yè ôm̃eṉô wè gô ntyiṉa, aweli yè yô gw’imengô si mbôra yi jirô intyagô, n’ayiri yè ntyiṉa gô ntiṉa yi mbôra yi jirô intyagô.

¹⁰ Ndô agali, n’im̃anga, n’ôm̃ônd’ômpôlô w’iṉiṉi nyi nyam̃a yi jirô ntyagô y’ôraṽô wi mpungu y’ibe, avezi yè yô gô mbôra yi jirô intyagô, ga nt’azômbyi Yeôva Môsès.

¹¹ Ndô ôzôṉe n’ebanda avezi yô gw’igala ny’ôlakô.

¹² N’ayôṉi yè nyam̃a yi ntyagô yi pezô. Awaṉ’aṉôm̃e w’Aarône w’aveṉi yè ntyiṉa, n’ayiri yè yô gô mbôra yôdu yi jirô intyagô vingôvingô.

¹³ Aveṉi waô yè nyam̃a yi jirô ntyagô yi pezô bazô pa izôṉe, n’ewônjô, n’avezi yè yô gô mbôra yi jirô intyagô.

¹⁴ N’ayôvuṉi yè isègè n’ambèṉi ko yè peza yô gô mbôra yi jirô intyagô, g’ôlômba wi mbôra yi jirô intyagô yi pezô.

¹⁵ Avila vovo ayiri yè ntyagô y’iṉongo n’awongi yè mbôṉi nôm̃e g’ômwanja wi ntyagô y’ôraṽo wi mpungu y’ibe s’iṉongo, ayôṉi yè yô, ayira yô g’ôraṽô wi mpungu y’ibe ga nyam̃a nônga yi jirô gô ntyagô.

¹⁶ Ayiri yè ntyagô yi pezô, ko yè panga yô ôrunda, ga nt’ar’ampanga dwaṉizô pa.

¹⁷ N’ayiri yè ntyagô y’inya, awongi yè ntyom̃è y’ileṽe avila gô yô, ko yè peza yô gô mbôra yi jirô intyagô tômbare pe ntyagô yi pezô y’ibanga.

¹⁸ N’ayôṉi yè nyare nôm̃e n’idombè iṉôm̃e gô ntyagô y’akeṽa g’ômwanja w’iṉongo. Awaṉ’aṉôm̃e w’Aarône w’aveṉi yè ntyiṉa ko yè jira yô gô mbôra yôdu yi jirô intyagô vingôvingô.

¹⁹ Aveṉi waô yè agali mi nyare nôm̃e na m’idombè iṉôm̃e, n’ôkwende n’agali mi diṽiṉ’isègè, n’im̃anga, n’ôm̃ônd’ômpôlô w’iṉiṉi;

²⁰ aweli waô agali gw’intôṉô, n’avezi yè agali gô mbôra yi jirô intyagô.

²¹ N’aviṉi Aarône intôṉô, n’ôṽeg’ôṉôm̃yè g’ôzô wi Yeôva ga nt’azômbyi Môsès.

²² N’arômbiṉi Aarône ago mè gôr’iṉongo, azaviṉa waô. Azum̃iṉi yè, ayè jira pe ntyagô y’ôraṽô wi mpungu y’ibe, ni ntyagô yi pezô ni ntyagô y’akeṽa.

²³ N’ayingiṉi Mosès n’Aarône gô ñanja y’idataṉa. Gw’agogwi waô avila gôgô w’azaviṉ’iṉongo. N’ônjèlènjèlè wi Yeôva w’awôm̃unyi gôr’iṉongo nyôdu.

²⁴ N’agogw’ôgôṉi avila g’ôzô wi Yeôva, n’avezi wô mbôra yi jirô intyagô si pezô n’agali. Iṉongo nyôdu ny’ayeṉi wô, n’awôgiṉi waô mbôgiṉa y’igeṽa, n’avuri waô azô maô mbè gô ntye.