Levitiki 8 - Bibili 1927 (Omyene)

¹ N’agambi Yeôva gôre Môsès awulya inè:

² Wong’Aarône n’awaṉi wè aṉôm̃e na yè, n’ingoy, n’agali m’isagya, ni nyam̃a yi taṽe mpungu y’ibe, n’adombè aṉôm̃e ambaṉi, n’ôtôndô wi mpèmba yi re levèn fo;

³ ko datize mandô yôdu g’ômpômbala wi ñanja y’idataṉa.

⁴ N’alendi Môsès ga nt’azômbyô yè ne Yeôva, n’alataṉi mandô yôdu g’ômpômbala wi ñanja y’idataṉa.

⁵ Awulinyi Môsès mandô inè: Vônaṉi ôsam̃u wi re Yeôva sômbya pa gô dendô.

⁶ N’avangi Môsès Aarône n’awaṉi wè aṉôm̃e gô susa pyèrè, n’ayôvuṉi yè waô n’aṉingô.

⁷ N’aweli yè kôtô gôr’Aarône, n’aliryè yè ôtumba g’ôna, aworizyè yè eling’ela, n’aweli yè gôre yè efod, ko yô dwaṉa g’ôtumba w’efod wi re yè borizô pa.

⁸ N’awelyè yè ezambô z’ômwanga zi ntôṉô, n’aweli yè gw’ezambô z’ômwanga zi ntôṉô, urim ni tumim.

⁹ Aweli yè ipaki gw’ewônjô zè, n’aweli yè, gô bôsô y’ipaki, jatè yi sika ya teṉateṉa, kôrôṽa y’ôrunda, ga nt’azômbyi Yeôva Môsès.

¹⁰ Awongi Môsès agali m’isagya, n’azagi yè nagô y’ôrunda, ni yom̃a yôdu y’avegagi gôgô, n’avangi yè yô ôrunda.

¹¹ N’anyènyi yè agali ma yô nyongo ôrwageṉô gô mbôra yi jirô intyagô, n’azagi yè mbôra yi jirô intyagô ni vagô yôdu ya yô, ni ntyèngè n’iwôngô nya yô gô panga yô ôrunda.

¹² Ayiri yè agali m’isagya gw’ewônjô z’Aarône, n’azagyè yè gô pangè ôrunda.

¹³ Avangi Môsès kè awaṉi wè aṉôm̃e n’Aarône gô susa pyèrè; n’aworizè waô ikôtô, aliry’itumba gw’ini yaô, awelyè waô apaki, ga nt’azômbyi Yeôva Môsès.

¹⁴ N’azusi yè nyare yi taṽe mpungu y’ibe pyèrè, n’Aarône n’awaṉi wè aṉôm̃e w’araly’ago maô gw’ewônjô zi nyare yi taṽe mpungu y’ibe.

¹⁵ N’ayônyô yô ne Môsès, awongi yè ntyiṉa, ko yè fwela yô n’ôm̃eṉô wè gw’imengô si mbôra yi jirô intyagô vingôvingô, ko yè jombunye mbôra yi jirô intyagô, n’ayiri yè ntyiṉa gô mbôra yi jirô intyagô, avanga yô ôrunda gô pa vovo ôraṽô wi mpungu y’ibe.

¹⁶ Awongi yè agali môdu mi diṽiṉ’isègè, n’ôm̃ônd’ômpôlô w’iṉiṉi, n’im̃ang’imbaṉi n’agali ma yô ko yè peza yô gô mbôra yi jirô intyagô.

¹⁷ Ndô nyare n’ebanda za yô, n’ôzôṉe wa yô, n’ati ma yô, avezi yô g’ôgôṉi gw’igala ny’ôlakô, ga nt’azômbyi Yeôva Môsès.

¹⁸ Azusi yè idombè iṉôm̃e nyi ntyagô yi pezô pyèrè n’Aarône n’awaṉi wè aṉôm̃e w’araly’ago maô gw’ewônjô z’idombè iṉôm̃e.

¹⁹ N’ayônyô nyô ne Môsès, ayire ntyiṉa gô mbôra yôdu yi jirô intyagô vingôvingô.

²⁰ Aṽazi Môsès idombè izôṉe ko yè pez’ewônjô, n’izôṉe n’agali.

²¹ N’ayôvuṉi yè isègè n’ambèṉi n’aṉingô, ko yè pez’idombè nyôdu gô mbôra yi jirô intyagô; y’avegagi ntyagô yi pezô, y’avegagi ntyagô yi pezô ne ôgôṉi, yi nkangô mbya gôre Yeôva, ga nt’azômbyi Yeôva Môsès.

²² N’avangi yè idombè iṉôm̃e inyèṉè gô susa pyèrè, nyô ne idombè iṉôm̃e ny’avinjô ko Aarône n’awaṉi wè taly’ago maô gw’ewônjô z’idombè mè.

²³ Ayôṉi Môsès idombè iṉôm̃e nyiṉo awonge ntyiṉa ya nyô, ko yè fwela yô g’ôm̃ôndô w’ôrôy ôṉôm̃yè w’Aarône, avila vovo g’ôm̃eṉ’ômpôlô w’ôgo wè ôṉôm̃yè, na g’ôm̃eṉ’ômpôlô w’ôgôlô wè ôṉôm̃yè.

²⁴ N’avangi yè awaṉ’aṉôm̃e w’Aarône gô susa pyèrè, aweli yè ntyiṉa g’ôm̃ôndw’edu w’arôy maô aṉôm̃yè na g’ôm̃eṉw’edu ômpôlô w’ago maô aṉôm̃yè na g’ôm̃eṉw’edu ômpôlô w’agôlô maô aṉôm̃yè; n’anyènyi yè ntyiṉa gô mbôra yôdu yi jirô intyagô vingôvingô.

²⁵ N’awongi yè agali, n’ôkwende, n’agali môdu mi diṽiṉ’isègè, n’ôm̃ônd’ômpôlô w’iṉiṉi, n’im̃ang’imbaṉi n’agali ma yô, n’ôṽeg’ôṉôm̃yè.

²⁶ Awongi yè kè g’ôtôndô wi mpèmba yi re levèn fo, dôṽyô pa g’ôzô wi Yeôva, ôlega wi re levèn fo, ôlega wi mpèmba y’agali n’ôlega wa tètè, n’aralyi yè yô gw’agali na gw’iṽèṉ’iṉôm̃yè nya numbu.

²⁷ N’aweli yè yom̃a yiṉo yôdu gw’ago m’Aarône na gw’ago m’awaṉi wè aṉôm̃e, ko waô piṉa yô g’ôzô wi Yeôva.

²⁸ Avila vovo Môsès arômbi yô avila gw’ago maô, ko yè peza yô gô mbôra yi jirô intyagô, g’ôlômba wi ntyagô yi pezô; y’avegagi ntyagô y’ôrunda, y’avegagi ntyagô yi pezô ne ôgôṉi, yi nkangô mbya gôre Yeôva.

²⁹ Môsès awongi ntôṉô y’idombè iṉôm̃e ny’avinjô, ko yè piṉa yô g’ôzô wi Yeôva; y’avegagi mbèy yi Môsès ga nt’azômbyi Yeôva Môsès.

³⁰ Awongi Môsès agali m’isagya ni ntyiṉa y’avegagi gô mbôra yi jirô intyagô; ko yè nyènya yô gôr’Aarône na gw’ingoy sè, gôr’awaṉ’aṉôm̃e w’Aarône na gw’ingoy saô, ko yè pang’Aarône n’ingoy sè ôrunda, n’awaṉ’aṉôm̃e w’Aarône n’ingoy saô na yè.

³¹ Môsès awulinyi Aarône n’awaṉi wè inè: Ṉambaṉ’ôzôṉe g’ômpômbala wi ñanja y’idataṉa; wô mèwoṉo wô be nyô ṉwè, ni mpèmba yi re g’ôtôndô w’ôrunda ga nt’are myè sômbya pa yô inè: Aarône n’awaṉi wè aṉôm̃e wi ga nye yô.

³² N’eza zi be dèka avila g’ôzôṉe n’avila gô mpèmba, aṉwè ga veze zô.

³³ Ntyugu ôrwageṉô aṉw’agogwa du avila g’ômpômbala wi ñanja y’idataṉa, kaô intyugu s’adwaṉizô ṉwè ôrunda gw’eṽilô zi miṉisè s’akeka; konde ntyugu ôrwageṉô si be dwaṉa gôre ṉwè gô pang’ôrunda.

³⁴ Nt’are dendô pa ṉèṉo wiṉo, Yeôva are sômbya pa yô gô dendô g’ôraṽô wi mpungu y’ibe g’ômwanji waṉi.

³⁵ Sambô, aṉwè be dwaṉa ntyugu ôrwageṉô g’ômpômbala wi ñanja y’idataṉa, ôm̃anda n’ôgwèra, ko ṉwè penjavenj’ampanga mi Yeôva, ko ṉwè ayuwa, konde yeṉo re myè sômbyô pa ne Yeôva.

³⁶ N’Aarône n’awaṉi wè aṉôm̃e w’alend’isam̃u yôdu y’azômbyô ne Yeôva vo Môsès.