Levitiki 7 - Bibili 1927 (Omyene)

¹ Nyiṉo ne ivanga nyi ntyagô y’ômwanja w’ôgara; zô ne eza z’ôrund’ômpôlômè.

² Yô ne mbôra yi jôṉa waô nyam̃a yi ntyagô yi pezô yi be jôṉô nyam̃a yi pô gô ntyagô y’ômwanja w’ôgara. Ntyiṉa ya yô yi be nyènyô gô mbôra yi jirô intyagô vingôvingô.

³ Wi be jira gô yô agali môdu n’ôkwende, agali mi diṽiṉ’isègè;

⁴ n’im̃ang’imbaṉi, n’agali mi re gô yô, mi diṽiṉ’ibanja, n’ôm̃ônd’ômpôlô w’iṉiṉi, yi be tômbô avila gw’im̃anga.

⁵ Miṉisè e be peza yô gô mbôra yi jirô intyagô gô ntyagô yi pezô ne ôgôṉi g’ôzô wi Yeôva. Yô ne ntyagô yi jirô g’ômwanja w’ôgara.

⁶ Ôṉôm̃y’edu gôr’imiṉisè e be nya yô. E be nya yô gô mbôra y’ôrunda. Zô ne eza z’ôrund’ômpôlômè.

⁷ Ga nt’are gô ntyagô y’ôraṽô wi mpungu y’ibe, yeṉo re gô ntyagô y’ômwanja w’ôgara, vovo r’ivang’im̃ori gw’intyagô siṉo mbaṉi inè: nyam̃a yi jirô ntyagô yi be dwaṉa gôre miṉisè yi p’ôraṽô wi mpungu y’ibe.

⁸ Miṉisè yi be jire ntyagô yi pezô y’ôm’edu, e be bong’ebanda zi nyam̃a yi ntyagô yi pezô yi re yè jira pa.

⁹ Ntyagw’edu y’inya si nambô gw’inu, si kekizô gw’eganga ntyo gw’epèlè z’ôngôngô, si be dwaṉa gôre miṉisè yi re jira pa sô.

¹⁰ Ntyagw’edu y’inya si re bindô pa n’agali ge jôm̃izô si be dwaṉa gôr’awaṉ’aṉôm̃e waôdu w’Aarône, waôdu wi be dènge ntôra mô.

¹¹ Yiṉo ne ntyagô y’akeṽa yi be jirô gôre Yeôva.

¹² Jog’ôm’edu ajira yô vo ip’akeṽa, gambèṉè e be jira ta ni ntyagô y’akeṽa idega si re levèn fo, bindô pa n’agali, idega sa tètè si re levèn fo tèṽizô pa n’agali, n’idega si farinya mbya kangô pa ni bindô pa n’agali.

¹³ E be kunda gw’idega siṉo mpèmba yi tum̃inyô g’ômwanja wi ntyagô yè y’inya ni ntyagô yè y’ip’akeṽa na y’akeṽa.

¹⁴ Wi be pa mbèy mori avila gô ntyagw’edu yi mpagaga, arum̃inya yô gôre Yeôva, gambèṉè mbèy mè yi be dwaṉa gôre miṉisè yi re nyènya pe ntyiṉa yi nyam̃a yi ntyagô y’akeṽa.

¹⁵ Ôzôṉe wi ntyagô y’ip’akeṽa na y’akeṽa yi be nyô gô ntyugu yi re yô jirô pa; arigô gô yô ezom̃y’edu kwang’ibanga.

¹⁶ Jog’ôm’edu ajire ntyagô gô dwaṉiz’ôrangô ntyo ga ntyagô yi ntondiṉi, eza zi jirô zi be nyô gô ntyugu yi be jirô zô, ni mbèy yi be dèka yi be nyô bunya.

¹⁷ Eza zi be dèka avila g’ôzôṉe wi nyam̃a yi jirô ntyagô zi be pezô g’ôgôṉi gô ntyugu yi ntyarô.

¹⁸ J’ôzôṉe wi ntyagô yè y’akeṽa w’anyô gô ntyugu yi ntyarô, gambèṉè y’awongô, ge yô tangô gôre yè yi re jira pa yô; yiṉo yi be dwaṉ’ezom̃’eṽe, n’ôm’edu e be nya yô e be twaṉ’ibe sè.

¹⁹ Ôzôny’edu wi re bwata pa ezom̃y’edu z’isèkè w’anyô du; wi be pezô g’ôgôṉi.

²⁰ Ôm’edu are nkèrè, ko nya avila g’ôzôṉe; ndô ayè yi dèngô gô ndwaṉi yè y’isèkè, yi be nya avila g’ôzôṉe wi ntyagô y’akeṽa yi Yeôva, ôma mèwo e be teṉô avila gôr’iṉongo nvè.

²¹ N’ayè yi be bwat’ezom̃y’edu z’isèkè, ge isèkè sa mwô’ṉaga, ge isèkè si nyam̃a, ge eza z’isèkè ko yè nya avila g’ôzôṉe wi ntyagô y’akeṽa yi Yeôva, ôma mèwoṉo e be teṉô avila gôr’iṉongo nyè.

²² Agambi Yeôva gôre Môsès awulya inè:

²³ Gamba gôr’awaṉa w’Israèl, inè: Anyaṉi du agali mi nyare, ge m’ômwidombè ge mi mbôṉi.

²⁴ Agali mi nyam̃a yi re juwa pa, ge sasuṉô pa ne nyam̃a, mô ko dwaṉa n’isolo gô janjiṉa gw’eṽilô edu; ndô anyaṉi du mô;

²⁵ konde ayè yi be nya avila gw’agali m’inyam̃a si jirô gôre Yeôva gw’intyagô si pezô ne ôgôṉi, ôma mèwoṉo e be teṉô avila gôr’iṉongo nyè.

²⁶ Anyaṉi du ntyiṉa, ge yi nyoṉi, ge yi nyam̃a gw’imbôra sôdu si be dwaṉô ṉwè.

²⁷ Ayè yi be nye ntyiṉa y’ôṉongo w’ezom̃y’edu, ôma mèwoṉo e be teṉô avila gôr’iṉongo nyè.

²⁸ Agambi Yeôva gôre Môsès, awulya inè:

²⁹ Gamba gôr’awaṉa w’Israèl inè: Ayè yi be jira gôre Yeôva ntyagô yè y’akeṽa e be twaṉe ntyagô yè gôre Yeôva, avila gô ntyagô yè y’akeṽa.

³⁰ E be twaṉa yô n’ago mèmè eza zi re ko pezô ne ôgôṉi g’ôzô wi Yeôva; e be twaṉ’agali ni ntôṉô ta, ntôṉô gô piṉô ga mpagaga g’ôzô wi Yeôva ko yô tô fwinya gôre miṉisè.

³¹ Gambèṉè miṉisè e be pez’agali gô mbôra yi jirô intyagô, ni ntôṉô yi be dwaṉa gôr’Aarône na gôr’awaṉi wè aṉôm̃e.

³² Gw’intyagô saṉi s’akeṽa, vaṉi gôre miṉisè iṽèṉi iṉôm̃yè nya numbu, vaṉi nyô gô tuminyô gôre Yeôva.

³³ Ayè yi re gôr’awaṉ’aṉôm̃e w’Aarône e be jire ntyiṉa n’agali gô ntyagô y’akeṽa, e be dèng’iṽèṉi iṉôm̃yè nya numbu;

³⁴ konde mi bonga, gw’intyagô s’akeṽa si jirô ne awaṉa w’Israèl, ntôṉô yi piṉô gôre Yeôva, n’iṽèṉi nya numbu nyi pô gô tum̃inyô gôre Yeôva, ko mi pa yô gôr’Aarône yi miṉisè na gôr’awaṉi wè aṉôm̃e vo ivanga nya pèkèpèkè, nyi be penjavenjô ne Israèl.

³⁵ Mènyoṉo ne inyanga ny’isagyô ny’Aarône n’awaṉi wè aṉôm̃e nyi be pô waô gw’intyagô si pezô ne ôgôṉi g’ôzô wi Yeôva, avila gô ntyugu yi be tum̃inyô waô gô dwaṉa gw’ijanja s’eṽilô zam̃ zi miṉisè;

³⁶ nyi sômbyô ne Yeôva gôr’Israèl gô pa waô avila gô ntyugu y’isagyô saô; nyi be dwaṉ’ivanga nya pèkèpèkè gôr’imbambi saô.

³⁷ Nyiṉo ne ivanga nyi ntyagô yi pezô, nyi ntyagô y’inya, nyi ntyagô y’ôraṽô wi mpungu y’ibe, nyi ntyagô y’ômwanja w’ôgara ny’idôṽyô s’imiṉisè na nyi ntyagô y’akeṽa,

³⁸ ny’azômbyi Yeôva Môsès gô nômba yi Sina, gô ntyugu y’azômbyi yè Israèl gô jir’intyagô saô gôre Yeôva gw’itôve si Sina.