Levitiki 6 - Bibili 1927 (Omyene)

¹ N’agambi Yeôva gôre Môsès awulya inè:

² V’ôzômbyô wiṉo gôr’Aarône n’awaṉi wè aṉôm̃e inè: Nyiṉo ne ivanga nyi ntyagô yi pezô. Ntyagô yi pezô yi be dwaṉa gô gare yi mbôra yi jirô intyagô ôgwèra wôdu kwang’ibanga, n’ôgôṉi wi be dwaṉa kaô mbam̃iṉaga gô mbôra yi jirô intyagô.

³ Miṉisè e be bore ngoy yè ya pupu awele siṉi g’ôzôṉe wè; e be tômb’ômbu wi pangô ne ôgôṉi wi peze ntyagô yi pezô gô mbôra yi jiro intyagô, gambèṉè e be dimbiṉa wô pyèrè gô mbôra yi jirô intyagô.

⁴ Avila vovo e be tômb’ingoy sè ko yè bor’inyèṉè, gô koguny’ômbu gw’igala ny’ôlakô, gô mbôra yi nkèrè.

⁵ Ôgôṉi wi be bam̃iṉaga gô mbôra yi jirô intyagô, w’aṉim̃a du; ibang’edu, miṉisè e be bak’ôgôṉi vovo gw’ikôni, alimbiṉe nyam̃a yi jirô ntyagô yi pezô, avez’agali m’intyagô s’akeṽa.

⁶ Ôgôṉi wi be bam̃iṉaga egômbe zôdu gô mbôra yi jirô intyagô, w’aṉim̃a du.

⁷ Na nyiṉo ne ivanga nyi ntyagô y’inya. Awaṉ’aṉôm̃e w’Aarône wi be jira yô g’ôzô wi Yeôva swaswo ni mbôra yi jirô intyagô.

⁸ Miṉisè e be bonge ntyom̃è y’ileṽe avila gô farinya mbya n’avila gw’agali, ni ya yi nkangô yôdu kundô pa gô ntyagô yi mpagaga, ko yô bam̃iṉa gô mbôra yi jirô intyagô g’ôyônginyô wi nkangô mbya gôre Yeôva.

⁹ Aarône n’awaṉi wè aṉôm̃e wi be nya eza zi be dèka avila gô ntyagô yi mpagaga; wi be nya zô levèn fo, gô mbôra y’ôrunda; gô ñanja y’idataṉa.

¹⁰ Y’avikô ni levèn. Yô ne mbèy yi re myè pa pa waô gw’intyagô sam̃ si pezô ne ôgôṉi. Zô ne ezom̃a z’ôrund’ômpôlômè, ga nt’are gô ntyagô y’ôraṽô wi mpungu y’ibe na ga nt’are gô ntyagô y’ômwanja w’ôgara.

¹¹ Ôṉômy’edu gôr’awaṉa w’Aarône e be nya zô. Nyô ne ivanga nya pèkèpèkè gôr’imbambi sam̃, g’ômwanja w’intyagô si pezô ne ôgôṉi g’ôzô wi Yeôva; ôm’edu e be bwata vovo e be dwaṉ’ôrunda.

¹² N’agambi Yeôva gôre Môsès, awulya inè:

¹³ Yiṉo ne ntyagô yi be jirô Aarône n’awaṉi wè aṉôm̃e gôre Yeôva gô ntyugu yi be sagyô waô: mbèy mori avila gw’igôm̃i y’efa yi farinya mbya, ga ntyagô y’inya y’egômbe zôdu, nyèwo ibanga ni nyèwo nkôlô.

¹⁴ Yi be kekizô gw’epèlè z’ôngôngô n’agali ta, ko wè baga yô kangô pa; ô be pa yô kè feṉa pa na gw’amunga ga ntyagô yi mpagaga yi nkangô mbya gôre Yeôva.

¹⁵ Miṉisè avila gôr’awaṉ’aṉôm̃e w’Aarône, yi be dwaṉa sagyô pa gw’inyangi nyè, e be jira kè ntyagô yiṉo yi mpagaga. Nyô ne ivanga nya pèkèpèkè g’ôzô wi Yeôva; yi be pezô yôdudu.

¹⁶ Ntyagw’edu yi mpagaga yi miṉisè yi be pezô yôdudu; y’anyô du.

¹⁷ N’agambi Yeôva gôre Môsès, awulya inè:

¹⁸ Gamba gôr’Aarône na gôr’awaṉi wè aṉôm̃e inè: Vônaṉi, nyiṉo ne ivanga nyi ntyagô y’ôraṽô wi mpungu y’ibe. Gô mbôra yi jôṉô nyam̃a yi ntyagô yi pezô yi be jôṉô g’ôzô wi Yeôva nyam̃a yi pô gô ntyagô y’ôraṽô wi mpungu y’ibe; yô ne eza z’ôrund’ômpôlômè.

¹⁹ Miṉisè yi be jire nyam̃a yi ntyagô yi taṽe mpungu y’ibe e be nya yô; yi be nyô gô mbôra y’ôrunda, gô ñanja y’idataṉa.

²⁰ Ôm’edu e be bwat’ôzôṉe, e be dwaṉ’ôrunda. J’are nyènyô pe ntyiṉa gô ngoy, mbôra mè yi re kôta pe ntyiṉa yi be jôvuṉô gô mbôra y’ôrunda.

²¹ Evagô z’iwôṉô zi be nambô yô zi be jôṉô; ja yi re nambô pa gw’evagô zi nyènyè, gambèṉè zi be sizô ayôvuṉô gw’aṉingô.

²² Ôṉôm̃y’edu gôr’imiṉisè e be nya yô; zô ne eza z’ôrund’ômpôlômè.

²³ Ndô w’anye nyam̃y’edu yi ntyagô yi taṽe mpungu y’ibe wi be bage ntyiṉa ya yô gô ñanja y’idataṉa, gô p’ôraṽô wi mpungu y’ibe gô nagô y’ôrunda; yi be pezô g’ôgôṉi.