Levitiki 5 - Bibili 1927 (Omyene)

¹ Jog’ôm’edu ajeṉe môndo mbe yi bôndô, ko yô jolizô n’ôrangô, ko yè arakilya yô nt’are yè jeṉa pa ge nt’are yè mya pa, gambèṉè e be dwaṉ’ôgara.

² Jog’ôm’edu abwat’ezom̃a zi re fweva pa n’ipuso ga nt’ar’ebende zi nyam̃a y’isèkè, ge y’adwaṉe nyam̃a y’iga ntyo yi re mènyô pa gô nkala, ge vangaṉe ya yi dandalanda, gambèṉè ayèmè e be dwaṉa fweva pa, alèng’ôgara.

³ Jogo e pa mya ge j’amya inè, are bwata p’isèkè s’ôma, gambèṉè e be dèng’ôgara.

⁴ Jog’ôm’edu atang’ôrangô ibandam̃iṉa fo n’iṉumbu yè gô dende mbe ntyo gô dende mbya, g’ôṉongo w’ôsam̃u edu, ko yè mya wô, gambèṉè ar’ôgara.

⁵ G’ôsam̃u edu gô yiṉo e be mèma g’ômwanja w’ibe sè.

⁶ Avila vovo e be jire ntyagô gôre Yeôva g’ômwanja w’ôgari wè, g’ômwanja w’ibe si re yè janja pa, nyam̃a nyantô nyangô, idombè ntyo mbôṉi ga nyam̃a yi jirô ntyagô y’ôraṽô wi mpungu y’ibe; ni miṉisè e be taṽe mpungu y’ibe sè g’ômwanji wè.

⁷ Jogo e zele n’ezom̃a zi dèng’idombè ntyo mbôṉi, gambènè e be jira gô ntyagô g’ômwanja w’ôgari wè gôre Yeôva g’ômwanja w’ibe sè, abembe ambaṉi ntyo awaṉa w’imenga aṽaṉi, im̃ori gô ntyagô yi taṽe mpungu y’ibe, n’im̃ori gô ntyagô yi pezô.

⁸ Gambèṉè e be baga mô gôre miṉisè, yi be dônge jir’eza zi re g’ômwanja wi ntyagô yi taṽe mpungu y’ibe. Miṉisè e be tôl’ewônjô za mô n’ôm̃eṉô, ko yè teṉ’epa z’igola zi ngori, ndô aranga gô bangunya zô bangô.

⁹ E be nyènye ntyiṉa y’eza z’ajirô gô ntyagô yi taṽe mpungu y’ibe g’ôzamb’ôm̃ori wi mbôra yi jirô intyagô, ni ntyiṉa yi be dèka yi be jirô gw’igala gô ntiṉa yi mbôra yi jirô intyagô; yô ne ntyagô y’ôraṽô wi mpungu y’ibe.

¹⁰ E be jire nyoṉi mori ntyagô yi pezô ga nt’ar’ivanga dwaṉizô pa. Yeṉo kè miṉisè e be jira g’ômwanja w’ôma mè ntyagô y’ôraṽô wi mpungu y’ibe si re yè janja pa, ko sô nyezô yè.

¹¹ Jogo azele n’ezom̃a zi dèng’abembe ambaṉi ntyo awaṉa w’imenga aṽaṉi, gambèṉè e be baga gô ntyagô g’ômwanja w’ibe sè mbèy mori avila gw’igôm̃i y’efa yi farinya mbya, ga ntyagô yi taṽe mpungu y’ibe; awel’agali du g’ôlômba wa yô, ko yè agunda vovo du ya yi nkangô, konde yô ne ntyagô y’ôraṽô wi mpungu y’ibe.

¹² E be baga yô gôre miṉisè, gambèṉè miṉisè e be bonga gô yô ntyom̃è y’ileṽe ga ôyônginyô, n’ayè e be peza yô gô mbôra yi jirô intyagô, ga intyagô si pezô ne ôgôṉi g’ôzô wi Yeôva; yô ne ntyagô y’ôraṽô wi mpungu y’ibe.

¹³ Yeṉo kè miṉisè e be taṽa g’ômwanja w’ôma mè ôraṽô wi mpungu y’ibe si re yè janja pa g’ômwanja w’isam̃u yiṉo ko sô nyezô yè. Ni ya yi be dèka avila gô ntyagô yi be dwaṉa gôre miṉisè ga nt’are gô ntyagô y’inya si mpagaga.

¹⁴ Agambi Yeôva gôre Môsès, awulya inè:

¹⁵ Jog’ôm’edu apava ko yè fwem̃a n’ipuso g’ômwanja w’isam̃u y’ôrunda gôre Yeôva, gambèṉè e be jire ntyagô g’ômwanja w’ôgari wè gôre Yeôva g’ômwanja w’ibe sè idombè iṉôm̃e nyi re ntyèmbo fo, bongô pa avila g’ôlemba ga nt’are njôni yi be tevô wè gô sika ya pupu, vo sikèl, ga nt’are sikèl yi nagô y’ôrunda.

¹⁶ Gambèṉè e be pa, agunda vovo mbèy y’ôtaṉè gw’ezom̃a zi re yè bonga pa avila gô nagô y’ôrunda, gambèṉè e be pa zô gôre miṉisè. Ni miṉisè e be taṽ’ôraṽô w’ibe g’ômwanji wè gô jir’idombè iṉôm̃e gô ntyagô g’ômwanja w’ôgari wè ko sô nyezô yè.

¹⁷ Jog’ôm’edu afwem̃a gô dend’ezom̃a, ko yè amya zô, gw’ivang’im̃ori nyi Yeôva isam̃u yi re yi zele kwèkwè gô dendô, e be dwaṉ’ôgara arwaṉ’ibe sè.

¹⁸ Gambèṉè e be pa gôre miṉisè gô ntyagô g’ômwanja w’ôgari wè idombè iṉôm̃e nyi re ntyèmbo fo, bongô pa avila g’ôlemba ga nt’are njôni yo. Ni miṉisè e be taṽ’ôraṽô w’ibe g’ômwanji wè g’ômwanja w’ifwem̃a si re yè fwem̃a pa imya fo gô sô, ko sô nyezô yè.

¹⁹ Yô ne ntyagô yi jirô g’ômwanja w’ôgara inè, ôma mè avegagi rèti ôgara gôre Yeôva.

²⁰ Agambi Yeôva gôre Môsès awulya inè:

²¹ Jog’ôm’edu afwem̃a ko yè pava gôre Yeôva, gô nôkiṉ’ ômwareri yè g’ômwanja w’eza z’ijega, g’ômwanja w’eza zi re yè pô pa gô penjavenja, g’ômwanja w’ezom̃a zi njufôgô ge zi re bongô pa n’itemiza,

²² ja z’adèngô inè, zi re pera pa ko yè nôka gô zô, arang’ôrangô w’inôka; g’ôsam̃u edu gô yiṉo yi dendô n’ôma, nfwem̃aga gô yô;

²³ jog’afwem̃a kè yeṉo, alwaṉ’ôgara, gambèṉè e be fwiṉiz’eza zi re jufô pa ntyo bongô pa n’itemiza, ezom̃a z’avegagi kum̃izô pa gôre yè gw’ijega, ezom̃a z’averi ko zô dèngô;

²⁴ ge ezom̃’edu zi re yè tanga p’ôrangô w’inôka, gambèṉè e be fwiza zô zôdudu, ko yè kunda vovo mbèy y’ôtaṉè, ava zô gôr’ôma w’aṉivi zô, gô ntyugu mèmô yi be jirè ntyagô yè y’ômwanja w’ôgara.

²⁵ E be pa gôre miṉisè gô ntyagô y’ômwanja w’ôgara gôre Yeôva g’ômwanja w’ibe sè idombè iṉôm̃e nyi re ntyèmbo fo, bongô pa avila g’ôlemba, ga nt’are njôni yi be tevô wè.

²⁶ Ni miṉisè e be taṽ’ôraṽô w’ibe g’ômwanji wè g’ôzô wi Yeôva, ko sô nyezô yè ntôry’edu yi be dwaṉ’ifwem̃a si re yè fwem̃a pa.