Levitiki 4 - Bibili 1927 (Omyene)

¹ Agambi Yeôva gôre Môsès, awulya inè:

² Gamba gôr’Israèl, inè: Jog’ôm’edu afwem̃e njelaga gw’im̃ori gw’ampanga mi Yeôva, gô dend’isam̃u yi re yi zele kwèkwè gô dendô;

³ jog’ayè miṉisè yi re sagyô pa, yô re fwem̃a pa, aṽag’ôgara gôr’aṉaga, gambèṉè e be jire ntyagô gôre Yeôva g’ômwanja w’ibe si re yè denda pa ômwaṉa wi nyare yi re ntyèmbo fo, gô ntyagô yi taṽe mpungu y’ibe.

⁴ E be bage nyare g’ômpômbala wi ñanja y’idataṉa g’ôzô wi Yeôva, gambèṉè e be taly’ôgo wè gw’ewônjô zi nyare ko yè jôṉa yô g’ôzô wi Yeôva.

⁵ Miṉisè yi re sagyô pa, yi be bonge ntyiṉa yi nyare, aṽaga yô gô ñanja y’idataṉa;

⁶ e be pundy’ôm̃eṉô wè gô ntyiṉa, ko yè nyènye ntyiṉa nyongo ôrwageṉô g’ôzô wi Yeôva, swaswo n’ôṉamba wi re diṽiṉô pa gô nagô y’ôrunda.

⁷ Ni miṉisè yi be fwele ntyiṉa gw’imengô si mbôra yi jirô intyagô si ya yi nkangô, yi re g’ôzô wi Yeôva gô ñanja y’idataṉa, ko yè nyènye ntyiṉa yôdu yi nyare gô ntiṉa yi mbôra yi jirô intyagô si pezô, yi re g’ômpômbala wi ñanja y’idataṉa.

⁸ E be tômb’agali môdu avila gô nyare yi taṽe mpungu y’ibe, agali mi diṽiṉ’isègè n’agali mi re kôta pa vovo,

⁹ im̃ang’imbaṉi n’agali mi re gô yô mi diṽiṉ’ibanja, n’ôm̃ônd’ômpôlô w’iṉiṉi, ko yè tômba wô pyèrè avila gw’im̃anga;

¹⁰ miṉisè yi be tômbe yare yiṉo ga nte tômbô yô avila gôre nyare gô ntyagô y’akeṽa, ko yè peza yô gô mbôra yi jirô intyagô si pezô.

¹¹ Ndô ebanda zi nyare, ôzôṉe wôdu wa yô, n’ewônjô za yô, ambèṉi ma yô, isègè ya yô, n’ati ma yô,

¹² nyare yôdu e be baga yô gw’igala ny’ôlakô, gô mbôra yi nkèrè, yi pung’ômbu, ko yè peza yô g’ôgôṉi gw’ikôṉi; e be peza yô g’ôkônda w’ômbu.

¹³ Jogo mandô yôdu y’Israèl yi re fwem̃a pa njelaga ko igamba ny’amyô, gô denda gw’ivang’im̃ori nyi Yeôva isam̃u yi re yi zele kwèkwè gô dendô na gô baga kè ôgara,

¹⁴ ko ibe si re yè denda pa bôm̃wa, gambèṉè mandô yi be jire nyare gô ntyagô yi taṽe mpungu y’ibe, aṽaga yô swaswo gô ñanja y’idataṉa.

¹⁵ Aṉèro w’Israèl wi be taly’ago maô gw’ewônjô zi nyare yi re g’ôzô wi Yeôva, ni nyare yi be jôṉô g’ôzô wi Yeôva.

¹⁶ Miṉisè yi re sagyô pa, yi be bage ntyiṉa yi nyare gô ñanja y’idataṉa;

¹⁷ e be pundy’ôm̃eṉô wè gô ntyiṉa, ko yè nyènya yô nyongo ôrwageṉô g’ôzô wi Yeôva, swaswo n’ôṉamba wi re diṽiṉô pa.

¹⁸ E be fwele ntyiṉa gw’imengô si mbôra yi jirô intyagô, yi re g’ôzô wi Yeôva gô ñanja y’idataṉa, ko yè nyènye ntyiṉa yôdu gô ntiṉa yi mbôra yi jirô intyagô si pezô, yi re g’ômpômbala wi ñanja y’idataṉa.

¹⁹ E be tômb’agali môdu avila gô nyare, ko yè peza yô gô mbôra yi jirô intyagô.

²⁰ E be denda ni nyare yiṉo ga nt’alendi yè ni nyare yi taṽe mpungu y’ibe; yeṉo kè miṉisè yi be pang ôraṽô wi mpungu y’ibe g’ômwanji waô, ko waô nyezô.

²¹ E be bage nyare gw’igala ny’ôlakô ko yè peza yô ga nyare nônga. Yô ne ntyagô yi taṽe mpungu y’ibe gôre mandô.

²² Jog’ôvangiṉi are fwem̃a pa gô dende njelaga gw’ivang’im̃ori nyi Yeôva, Anyambyè yè, isam̃u yi re yi zele kwèkwè gô dendô ko yè baga kè ôgara,

²³ ko wô bôm̃uny’ibe si re yè janja pa, gambèṉè e be jira gô ntyagô mbôṉi nôm̃e yi re ntyèmbo fo;

²⁴ e be fwel’ôgo wè gw’ewônjô zi mbôṉi, ko yè jôṉa yô gô mbôra yi jôṉa waô inyam̃a si ntyagô yi pezô g’ôzô wi Yeôva. Yô ne ntyagô g’ômwanja w’ibe.

²⁵ Miṉisè yi be bonga n’ôm̃eṉô wè ntyiṉa yi nyam̃a yi jirô ntyagô yi taṽe mpungu y’ibe, e be fwela yô gw’imengô si mbôra yi jirô intyagô si pezô, n’ayè e be nyènye ntyiṉa gô ntiṉa yi mbôra yi jirô intyagô si pezô.

²⁶ E be pez’agali môdu gô mbôra yi jirô intyagô, gw’agali m’intyagô s’akeṽa. Yeṉo kè miṉisè yi be taṽa gôr’ôvangiṉi mè mpungu y’ibe sè, ko sô nyezô yè.

²⁷ Jog’ôm’edu gôr’iṉongo are fwem̃a pa njelaga gô denda gw’ivang’im̃ori nyi Yeôva, isam̃u yi re yi zele kwèkwè gô dendô ko yè bag’ôgara,

²⁸ ko wô bôm̃uny’ibe si re yè janja pa, gambèṉè e be jira gô ntyagô mbôṉi nyantô yi re ntyèmbo fo, g’ômwanja w’ibe si re yè janja pa.

²⁹ E be taly’ôgo wè gw’ewônjô zi nyam̃a yi jirô ntyagô yi taṽe mpungu y’ibe, yi be jôṉô yè gô mbôra yi jôṉô inyam̃a s’intyagô si pezô.

³⁰ Miṉisè e be bonga n’ôm̃eṉô wè ntyiṉa yi nyam̃a yi jirô ntyagô, ko yè fwela yô gw’imengô si mbôra yi jirô intyagô si pezô, n’ayè e be nyènye ntyiṉa yôdu gô ntiṉa yi mbôra yi jirô intyagô.

³¹ Miṉisè e be tômb’agali môdu ga nte tômbô agali mi ntyagô y’akeṽa, n’ayè e be peza mô gô mbôra yi jirô intyagô, na mi be dwaṉe nkangô mbya gôre Yeôva. Yeṉo kè miṉisè e be taṽe mpungu y’ibe gôr’ôma ko sô nyezô yè.

³² J’ajir’ômwidombè gô ntyagô y’ôraṽô w’ibe, gambèṉè e be jir’inyantô nyi re ntyèmbo fo;

³³ gambèṉè ayè e be taly’ôgo wè gw’ewônjô zi nyam̃a yi jirô ntyagô, yi be jôṉô yè gô ntyagô y’ôraṽô w’ibe gô mbôra yi jôṉa waô inyam̃a s’intyagô si pezô.

³⁴ Miṉisè e be bonga n’ôm̃eṉô wè ntyiṉa yi nyam̃a yi jirô ntyagô, e be fwela yô gw’imengô si mbôra yi jirô intyagô, n’ayè e be nyènye ntyiṉa yôdu gô ntiṉa yi mbôra yi jirô intyagô.

³⁵ Gambèṉè miṉisè e be tômb’agali môdu, ga nte tômbô agali m’ômwidombè gô ntyagô y’akeṽa, n’ayè e be peza mô gô mbôra yi jirô intyagô, ga ntyagô yi pezô ne ôgôṉi g’ôzô wi Yeôva. Yeṉo kè miṉisè e be taṽa gôr’ôma mè mpungu y’ibe si re yè janja pa ko sô nyezô yè.