Levitiki 3 - Bibili 1927 (Omyene)

¹ Jog’ôm’edu ajira gôre Yeôva ntyagô y’akeṽa, jog’ajire nyam̃a nôm̃e mpôlô, ntyo nyantô, gambèṉè e be jira yô yi re ntyèmbo fo g’ôzô wi Yeôva.

² E be taly’ôgo wè gw’ewônjô zi nyam̃a yi jirô ntyagô, e be jôṉa yô g’ômpômbala wi ñanja y’idataṉa, n’imiṉisè, awaṉ’aṉôm̃e w’Aarône, wi be nyènye ntyiṉa gô mbôra yôdu yi jirô intyagô vingôvingô.

³ G’ômwanja wi ntyagô y’akeṽa e be jire ntyagô mè yi pezô ne ôgôṉi g’ôzô wi Yeôva; agali mi diṽiṉ’isègè n’agali môdu mi re kôta pa vovo gw’isègè.

⁴ N’im̃ang’imbaṉi, n’agali mi re gô yô, mi diṽiṉ’ibanja, n’ôm̃ônd’ômpôlô w’iṉiṉi, wi be tômbô pyèrè avila gw’im̃anga.

⁵ Awaṉ’aṉôm̃e w’Aarône wi be peza yô gô mbôra yi jirô intyagô, g’ôlômba wi nyam̃a yi ntyagô yi pezô yi be dwaṉa gw’ikôṉi s’adimbiṉô g’ôgôṉi. Yô ne ntyagô yi pezô ne ôgôṉi yi nkangô mbya gôre Yeôva.

⁶ J’ajire nyam̃a nyangô nôm̃e ntyo nyantô gô ntyagô y’akeṽa gôre Yeôva, gambèṉè e be jira yô yi re ntyèmbo fo.

⁷ J’ajira gô ntyagô ômwidombè, gambèṉè e be jira wô g’ôzô wi Yeôva.

⁸ E be taly’ôgo wè gw’ewônjô zi nyam̃a yi jirô ntyagô, ko yè jôṉa yô swaswo ni ñanja y’idataṉa; n’awaṉ’aṉôm̃e w’Aarône wi be nyènye ntyiṉa gô mbôra yôdu yi jirô intyagô vingôvingô.

⁹ G’ômwanja wi ntyagô yiṉo y’akeṽa e be jira gô ntyagô yi pezô ne ôgôṉi g’ôzô wi Yeôva: agali n’ôkwende wôdu, ko yè tômba wô avila gw’epa z’ôkongo, agali mi diṽiṉ’isègè n’agali môdu mi re kôta pa vovo.

¹⁰ Im̃ang’imbaṉi, n’agali mi re gô yô mi diṽiṉ’ibanja n’ôm̃ônd’ômpôlô w’iṉiṉi, ko yè tômba wô pyèrè avila gw’im̃anga.

¹¹ Miṉisè e be peza yô gô mbôra yi jirô intyagô. Yô ne inya si ntyagô yi pezô ne ôgôṉi g’ôzô wi Yeôva.

¹² Jogo ntyagô yè y’adwaṉe mbôṉi nyantô, gambèṉè e be baga yô g’ôzô wi Yeôva;

¹³ e be taly’ôgo wè gw’ewônjô zi nyam̃a yi jirô ntyagô, yi be jôṉô yè g’ôzô wi ñanja y’idataṉa; n’awaṉ’aṉôm̃e w’Aarône wi be nyènye ntyiṉa gô mbôra yi jirô intyagô vingôvingô.

¹⁴ G’ômwanja wi nyam̃a yi jirô ntyagô e be jira gô ntyagô yi pezô ne ôgôṉi g’ôzô wi Yeôva: agali mi diṽiṉ’isègè, agali môdu mi re kôta pa vovo, n’im̃ang’imbaṉi,

¹⁵ n’agali mi re gô yô mi diṽiṉ’ibanja, n’ôm̃ônd’ômpôlô w’iṉiṉi ko yè tômba wô pyèrè avila gw’im̃anga.

¹⁶ Miṉisè yi be peza yô gô mbôra yi jirô intyagô. Agali môdu ne inya si ntyagô yi pezô ne ôgôṉi, yi nkangô mbya gôre Yeôva.

¹⁷ Nyô ne ivanga nya pèkèpèkè gôr’awaṉi waṉi gw’imbôra sôdu si be dwaṉô ṉwè; aṉwè anya agali ge ntyiṉa.