Levitiki 27 - Bibili 1927 (Omyene)

¹ N’agambi Yeôva gôre Môsès awulya inè:

² Gamba gôr’Israèl, awulinya waô inè: Jog’ôm’atang’irangô, ja w’adendô gôr’ôma, yi be dwaṉa gôre Yeôva ga nt’are njôni yi be tevô wè.

³ Jog’ô re ni njôni yi nôm̃e avila gw’agôm̃i m’impum̃’ambaṉi agènda gw’agôm̃i m’impum̃’ôrôṽa, njôni yo yi be dwaṉ’agôm̃i m’isikèl ataṉè mi sika ya pupu, ga nt’are sikèl yi mbôra y’ôrunda.

⁴ Ja yi re nyantô, gambèṉè njôni yo yi be dwaṉa agôm̃i m’isikèl ararô.

⁵ Avila gw’impum̃’itaṉè agènda gw’agôm̃i m’impum̃’ambaṉi, njôni yo yi be dwaṉ’agôm̃i m’isikèl ambaṉi, g’ômwanja wi nôm̃e n’igôm̃i ny’isikèl g’ômwanja w’inyantô.

⁶ Avila g’ôgwèl’ôm̃ori agènda gw’impum̃’itaṉè, njôni yo yi be dwaṉa sikèl ôtaṉè si sika ya pupu g’ômwanja wi nôm̃e, ni sikèl ntyarô si sika ya pupu g’ômwanja w’ômwaṉ’ômwantô.

⁷ Avila gw’agôm̃i m’impum̃’ôrôṽa agènde mpandaga, njôni yo yi be dwaṉ’igôm̃i ny’isikèl ni sikèl ôtaṉè g’ômwanja w’ôṉôm̃e, n’igôm̃i ny’isikèl g’ômwanja w’ômwantô.

⁸ Jog’ayè yi re tanga p’ôrangô ar’ôkug’ômpôlô gô pe njôni yè, gambèṉè e be tum̃inyô gôre miṉisè, yi be p’igôlô, ni miṉisè yi be pe njôni yè nt’are njôni yi re n’ôma mè.

⁹ Jogo w’arangyô g’ômwanja w’inyam̃a si re ko jirô gô ntyagô gôre Yeôva, nyam̃y’edu yi be pô gôre Yeôva yi be dwaṉ’ôrunda.

¹⁰ Y’agaluṉô du, ge fwelô du mbe gw’inyanga nyi mbya, ge mbya fwelô gw’inyanga nyi mbe; ja nyam̃a y’apendakaṉô ni nyam̃a nyèṉè, gambèṉè sô mbaṉi si be dwaṉ’eza z’ôrunda.

¹¹ Jogo w’arangyô g’ômwanja w’inyam̃’imbe si re s’ayolye jirô gô ntyagô gôre Yeôva, gambèṉè nyam̃a yi be pô gôre miṉisè,

¹² yi be pe njôni ya yô nte be dwaṉa yô mbya ntyo mbe, ko njôni yi be tevô ne miṉisè.

¹³ Ja y’abele kôlô, yi be kundô mbèy y’ôtaṉè gô njôni yo.

¹⁴ Jog’ôm’edu amèpize nagô yè gôre yô gô dwaṉ’ôrunda gôre Yeôva, gambèṉè miṉisè yi be pe njôni nte be dwaṉa yô mbya ge mbe, ko yô pô gô njôni yi be tevô ne miṉisè.

¹⁵ J’ayè yi re panga pe nagô yè ôrunda a bele kôla yô, gambèṉè e be kunde mbèy y’ôtaṉè gw’igôlô nyi njôni yo, ko yô dwaṉa gôre yè.

¹⁶ J’ôm’edu apange ntyaga y’ôrumbi wè ôrunda gôre Yeôva, gambèṉè njôni yo yi be pô yè yi be dwaṉa gô mbuṉi y’ilônda, agôm̃i m’isikèl ataṉè mi sika ya pupu vo ômèr y’ilônda yi orze.

¹⁷ J’avangi ntyagi yè ôrunda avila g’ômpum̃a w’igeṽa, gambèṉè yi be dwaṉa ga nt’are njôni yi be tevô wè.

¹⁸ Ndô j’avangi ntyagi yè ôrunda ômpum̃a w’igeṽa pila pa, gambèṉè miṉisè e be tange sika gô ntangô y’impum̃a yi tigaṉa kwanga g’ômpum̃a w’igeṽa, ko yè sôny’igôlô ga nt’are njôni yi be tevô yè.

¹⁹ J’ayè yi re panga pe ntyagi yè ôrunda abele tô kôla yô, gambèṉè e be kunde mbèy y’ôtaṉè gw’igôlô nyi njôni yo, ni ntyaga yi be dwaṉa gôre yè.

²⁰ Ndô j’are tô kôla du ntyaga, ko yô kôlô gôr’ôm’ômwèṉè, gambèṉè ayolye tô kôle yô nyèṉè.

²¹ Na j’ôma wi kôla yô adandwa g’ômpum̃a w’igeṽa, ntyaga mè yi be dwaṉ’ôrunda gôre Yeôva, ga ntyaga yi re pô pa; yi be kalwa gô nivô ne miṉisè.

²² J’ôm’edu are panga pe ntyagi yè yi re yè kôla pa ôrunda gôre Yeôva, yi re yi zele gô nkôva yi re yè niva pa,

²³ gambèṉè miṉisè e be tange njôni y’igôlô ga nt’are njôni yi be tevô wè kwanga g’ômpum̃a w’igeṽa, n’ôma mè e be pa gô ntyugu mèmô igôlô nyi re kenjô pa, ga eza z’ôrunda gôre Yeôva;

²⁴ ômpum̃a w’igeṽa, ntyaga mè yi be tô fwinya gôr’ôma w’agôlyô na yô gô nkôṽa yi re yè niva pa.

²⁵ Njôni yo yôdu yi be dwaṉa gw’isikèl si mbôra y’ôrunda. Sikèl ne agôm̃i m’igera ambaṉi.

²⁶ E zel’ôma wi re ko pange njalyè yi nyam̃i yè ôrunda, y’atweṉi g’ôzamba wi Yeôva gô ntangô y’injalyè sè; y’adwaṉe nyare mbya, y’adwaṉ’ômwaṉa w’idombè mbya, y’atweṉi g’ôzamba wi Yeôva.

²⁷ Ja y’adendô gô nyam̃a mbe, yi be tô kôlô gw’igôlô nyi njôni yo, e be kunda gô yô mbèy y’ôtaṉè; ja yi pa danduṉô, gambèṉè yi be kôlô ga nt’are njôni yo.

²⁸ E zel’ezom̃a zi re degô p’ôma n’ôrangô gôre Yeôva, gw’eza zi re na yè, ayolye kôle zô ge yè tô danduṉa zô, adwaṉ’ôma mbya, ntyo adwaṉe nyam̃a mbya, ge ntyaga yi re yè niva pa mbya; ezom̃’edu zi be degô n’ôrangô, zôdu zi be dwaṉ’ôrunda gôre Yeôva.

²⁹ E zel’ôma are degô pa n’ôrangô, are ko jolye danduṉô, ndô e be jôṉô njôṉôgô.

³⁰ Mbèy edu yi ntye, y’adwaṉ’ôwongo wi ntye mbya, y’adwaṉ’ilônda yi rere mbya, y’atweṉi gôre Yeôva; yô ne eza z’ôrunda gôre Yeôva.

³¹ Jog’ôm’edu abela gô tô kôla ezom̃y’edu avila gô mbèy yè, e be kunda vovo mbèy y’ôtaṉè.

³² Mbèy edu yi nyam̃a mpôlô ntyo nyangô avila gw’ezom̃y’edu zi pyagaṉa gô nkogu, zi be dwaṉe mbèy mori ôrunda gôre Yeôva.

³³ W’agèlagèla du twa pe nyam̃a yi re mbya ge mbe, w’avendakaṉa du ja w’apendakaṉe; nyam̃a mori ni nyèṉè, gambèṉè sô mbaṉi si be dwaṉ’eza z’ôrunda, s’ayolye danduṉô.

³⁴ Miṉo n’ampanga m’avenyô ne Yeôva gôre Môsès g’ômwanja w’Israèl gô nômba yi Sina.