Levitiki 26 - Bibili 1927 (Omyene)

¹ Avangaṉi du ikaṉa, ge ṉwè dôṽyô ôgaṉa wi ntônkôgô, ge bwiti, ge ṉwè dôṽya egolany’edu z’idô gô ntye yaṉi, ko ṉwè dèmbinya nyô; konde myè ne Yeôva, Anyambyè yaṉi.

² Aṉwè be penjavenj’intyugu sam̃ s’ijowa, ko ṉwè dube mbôri yam̃ y’ôrunda. Myè ne Yeôva.

³ J’aṉw’asông’ampangi mam̃, j’aṉw’apenjavenj’isômbyi sam̃, alenda sô,

⁴ gambèṉè mi be tôm̃’iningô gw’irera ya yô, ni ntye yi be jaṉ’ôwongo wa yô, ni rere y’intyaga yi be jaṉ’ilônda ya yô.

⁵ Gô be sukiza ṉwè itul’iputu, gambèṉè egômbe z’ikum̃iny’ilônda zi be bya, n’ikum̃inya s’ilônda si be siṽa gw’egômbe z’inyèny’ilônda; n’aṉwè be nye mpèmbi yaṉi gô jôra, ko ṉwè dwaṉe njuke fo gô ntye yaṉi.

⁶ Mi be p’am̃ènjè gô ntye, e zel’ôma wi be sokoly’antyôviṉô maṉi; mi be pang’inyam̃’imbendi gô doṽa avila gô ntye, n’ôkwara w’iwora w’avyagaṉe du gô ntye yaṉi.

⁷ Aṉwè be kombiz’ilôvalôvi yaṉi, ko waô pôswa gw’azô maṉi vo ôkwara.

⁸ Aṉag’ataṉè gôre ṉwè wi be kombize nkam̃a y’aṉaga, ni nkam̃a y’aṉaga gôre ṉwè wi be kombiz’igôm̃i ny’intozèny s’aṉaga, ko ilôvalôvi yaṉi pôswa gw’azô maṉi vo ôkwara w’iwora.

⁹ Na mi be kegwa gôre ṉwè, ko mi buṉiza ṉwè mbuṉizaga; mi be penjavenje njeki yam̃ na ṉwè.

¹⁰ Aṉwè be ny’ôwongo ôlungu, ko ṉwè koguny’ôlungu g’ômwanja wi dimbiṉ’ômwoṉa.

¹¹ Mi be dwaṉiz’ilwaṉô nyam̃ gô garegare yaṉi n’iṉiṉi nyam̃ ny’anumbe ṉwè du.

¹² Mi be kangaṉa gô garegare yaṉi, mi be dwaṉ’Anyambyè yaṉi, n’aṉwè be dwaṉ’iṉongo nyam̃.

¹³ Myè ne Yeôva, Anyambyè yaṉi, y’agogunyi ṉwè avila gw’Egipt, y’arômbi ṉwè avila gw’inivô; my’avuruṉ’igôrô yi mpangi yaṉi, ko mi panga ṉwè gô kangaṉe wônjô gôre.

¹⁴ Ndô j’aṉw’avôganyô myè du ge ṉwè denda du isômbyi sam̃ siṉo sôdu,

¹⁵ j’aṉw’apèdy’ampangi mam̃, na j’aṉiṉi maṉi m’abik’intyale sam̃, ko ṉwè alenda du ampangi mam̃ môdu, ko ṉwè jôṉe njeki yam̃, gambèṉè vônaṉi nte be dendiṉa myè ṉwè.

¹⁶ Mi be tôm̃a gôre ṉwè ererya, ivita n’ijôrô si be pang’antyo maṉi gèṽagèṽa, ko aṉiṉi maṉi jeṉ’azingô, n’aṉwè be nyèny’ilôndi yaṉi gô nyawènyawè, kond’ilôvalôvi yaṉi yi be nya yô.

¹⁷ Ôzô wam̃ wi be dwaṉ’apekwa gôre ṉwè, n’aṉwè be bôlô gw’azô m’ilôvalôvi yaṉi; waô wi numba ṉwè wi be pangiṉa ṉwè, n’aṉwè be fanga vangaṉe e zel’ôma gô kombiza ṉwè.

¹⁸ Vangaṉe yeṉo, j’aṉw’ayogiṉô myè du, mi be tevuṉa ṉwè nyongo ôrwageṉô vyagaṉô g’ômwanja w’ibe saṉi.

¹⁹ Mi be jôṉ’ekale zi ngulu yaṉi; mi be pang’ôrôṽi waṉi ga ômwanga, ni ntye yaṉi ga nyènyè.

²⁰ Ngulu yaṉi yi be dwaṉ’isolo fo, ntye yaṉi y’ayaṉe ôwongo wa yô, ni rere yi ntye y’ayaṉe ilônda ya yô.

²¹ J’aṉw’asira myè ko ṉwè aṽela du gô pôganyô myè, gambèṉè mi be bôla ṉwè nyongo ôrwageṉô vyagaṉô nt’ar’ibe saṉi.

²² Mi be tôm̃’inyam̃a s’iga gôre ṉwè, si be paruṉa ṉwè awaṉi waṉi, si be jiliz’inyam̃i saṉi, ko sô kongiza ṉwè, n’impoṉo saṉi si be jika.

²³ J’igôm̃a yiṉo yi pa mèpiza du ṉwè, na j’aṉw’asira myè,

²⁴ gambèṉè mi be sira ṉwè kè ko mi bôla ṉwè nyongo ôrwageṉô vyagaṉô g’ômwanja w’ibe saṉi.

²⁵ Mi be pang’ôkwara w’iwora gô bya gôre ṉwè, wi be fwiṉiz’ekôlè zi njeki yam̃, na gô be dataṉa ṉwè gw’inkali saṉi, mi be tôm̃’evunga gô garegare yaṉi, n’aṉwè be pô gw’ago m’ilôvalôvi yaṉi.

²⁶ Gô be moguṉa myè amungi maṉi mi mpèmba, igôm̃i ny’antô nyi be pike mpèmbi yaṉi gw’inu im̃ori dadyè ko waô tô bage mpèmbi yaṉi pisô pa g’ôdôdô; aṉwè be nya, ko ṉwè ayôra du.

²⁷ Vangaṉe yeṉo, j’aṉwè pa pôganyô myè du, na j’aṉw’asira myè,

²⁸ gambèṉè mi be sira ṉwè kè n’eguṉu, na mi be sônya ṉwè igôm̃a nyongo ôrwageṉô vyagaṉô g’ômwanja w’ibe saṉi;

²⁹ Aṉwè be ny’izôṉe y’awaṉi waṉi aṉôm̃e, n’aṉwè be ny’izôṉe kè y’awaṉi waṉi antô.

³⁰ Mi be jiliz’imbôri saṉi indôndwi, mi be teṉ’ibwiti saṉi si re saviṉô pa gô nkômbe, mi be fwele bende yaṉi gô bende y’ikaṉi saṉi, n’iṉiṉi nyam̃ nyi be numba ṉwè.

³¹ Mi be kaluṉ’inkali saṉi dum̃u; mi be jiliz’imbôri saṉi s’ôrunda, ko agôgiṉa nyèṉè nkangô mbya yi yom̃i yaṉi yi nkangô.

³² Mi be bundakaṉe ntye, n’ilôvalôvi yaṉi yi dwaṉa gô yô yi be mama g’ômwanja wa yô.

³³ Mi be pazangaṉa ṉwè gôr’aṉongo, na mi be koguny’ôkwara w’iwora gw’inyum̃i saṉi; ntye yaṉi yi be bundakaṉô, n’inkali saṉi si be dwaṉe dum̃u.

³⁴ Gambèṉè ntye yi be jeṉe mbya gw’ijowa sa yô, ôlingô wi be dwaṉa yô jilizô pa, ko ṉwè dwaṉa gô ntye y’ilôvalôvi yaṉi; gambèṉè ntye yi be jowa, ayeṉ’igeṽa g’ômwanja w’ijowa sa yô.

³⁵ Ôlingô wi be dwaṉa yô jilizô pa, yi be dèng’ijowa si re yi pa dènga sô, gw’intyugu saṉi s’ijowa gô be dwaṉa ṉwè gô yô.

³⁶ Mi be pang’irèm̃a ya waô wi re gôre ṉwè wi be dwaṉa bo abôbô, gô ntye y’ilôvalôvi yaô; n’ôtogo w’ôyavi wi sugyazugyô wi be tyeza waô; wi be fanga ga ôma wi fanga avila g’ôkwara w’iwora, ko waô pôswa ôma fo gô kombiza waô.

³⁷ Wi be jiraṉ’ôm̃ori gôr’ôm̃ori g’aṉaga wi re g’ôkwara w’iwora ôma fo gô kombiza waô. Aṉw’alènge du ngulu yi kum̃aṉa gw’azô m’ilôvalôvi yaṉi.

³⁸ Aṉwè be pera gôr’aṉongo, ni ntye y’ilôvalôvi yaṉi yi be nya ṉwè.

³⁹ Waô wi re gôre ṉwè wi be dwaṉa bo wi be jeṉ’ekèṽa g’ômwanja w’ibe saô gô ntye y’ilôvalôvi yaô; wi be dwaṉa kè gèṽagèṽa g’ômwanja w’ibe s’ireri saô.

⁴⁰ Wi be mèm’ibe saô n’ibe s’ireri saô, ipava si re waô pava pa gôre myè, n’isira si re waô sira pa myè.

⁴¹ Mi be sira waô kè g’ômwanja w’ibe g’ômwanji wam̃, aṽaga waô gô ntye y’ilôvalôvi yaô. Gambèṉè irèm̃i yaô yi re yi pa nige nkôndi yi be sônyô, ko waô p’inwaṉa s’ibe saô.

⁴² Mi be jônginye njeki yam̃ ni Yakob, mi be jônginye njeki yam̃ n’Izaak, ni njeki yam̃ n’Abraam, na mi be jônginye ntye.

⁴³ Ntye yi be tigô ne waô, na yi be jeṉe mbya g’ômwanja w’ijowa, ôlingô wi re yô tigô pa gô janjô, ko waô p’inwaṉa s’ibe saô, konde nè wi re pèdya p’intyale sam̃ ko aṉiṉi maô numb’ampangi mam̃.

⁴⁴ Ndô gô be dwaṉa waô gô ntye y’ilôvalôvi yaô, my’arige du waô, ge mi bika du waô gô jiliza waô vya, gô jôṉe njeki yam̃ na waô pelè na pelè, konde myè ne Yeôva, Anyambyè yaô.

⁴⁵ Mi be jônginya g’ômwanja wi njeki yaô nungu, vo yô agogunyi myè waô avila gw’Egipt, gw’antyo m’aṉongo gôre myè gô dwaṉ’Anyambyè yaô, myè ne Yeôva.

⁴⁶ Yiṉo ne izômbyô, intyale, n’ampanga, m’alwaṉizô ne Yeôva ntyo yè n’Israèl, gô nômba yi Sina vo ôgo wi Môsès.