Levitiki 25 - Bibili 1927 (Omyene)

¹ N’agambi Yeôva gôre Môsès gô nômba yi Sina, inè:

² Gamba gôr’Israèl, ko bulinya waô inè: Gô be jingiṉa ṉwè gô ntye yi pa myè ṉwè, gambèṉè ntye yi be jowa; siṉo si be dwaṉ’ijowa gô dube Yeôva.

³ Ô be nyèny’ilônda gô ntyagi yo n’impum̃’ôrôṽa; ô be teṉe ntyagi yo y’igoli n’impum̃’ôrôṽa ko wè kum̃iny’ôwongo wa yô.

⁴ Ndô g’ômpum̃a w’ôrwageṉô wi be dwaṉ’ijowa, egômbe z’ijowa g’ômwanja wi ntye, ijowa gô dube Yeôva; anyènya du ilônda gô ntyagi yo, ge wè teṉa du ntyagi yo y’igoli.

⁵ Areṉa du ilônda yi fwelya avila gw’ilônda y’avôswi gw’areṉi wè, ko wè agum̃inya du ilônda yi ntyagi yo y’igoli yi re yi zele teṉô pa; wiṉo wi be dwaṉ’ômpum̃a w’ijowa g’ômwanja wi ntye.

⁶ Eza zi be jaṉa gô ntye gw’egômbe zi re yô tigô pa gô janjô, zi be dwaṉ’inya gôre ṉwè, na gôre wè, na gôre nyôngô yo nôm̃e, na gôre nyôngô yo nyantô, na gôre mongi yo wi janja, na gôr’ôgènda wi dwaṉa na wè,

⁷ gôre nyam̃i yo na gôr’inyam̃a si re gô ntye yo; ôwongo wôdu wi be dwaṉ’inya.

⁸ Ô be tang’ijowa ôrwageṉô s’impum̃a, nyongo ôrwageṉô impum̃’ôrwageṉô, n’intyugu s’ijowa siṉo ôrwageṉô s’impum̃a si be dwaṉ’agôm̃i m’impum̃’anay n’impum̃’eṉôgôm̃i.

⁹ Gô ntyugu y’igôm̃i y’ôgwèli w’ôrwageṉô ô be tông’ôrombo pôlômè; gô ntyugu y’iraṽô y’impungu s’ibe, aṉwè be tông’ôrombo gô ntye yaṉi yôdu;

¹⁰ ko ṉwè pang’ômpum̃a w’agôm̃i ataṉè ôrunda, aṉwè be takily’ ôdyèngadyènga gô ntye gôr’alwaṉi wa yô waôdu; wiṉo wi be dwaṉ’ômpum̃a w’igeṽa gôre ṉwè; ôm’edu gôre ṉwè e be tô fwinya gw’aṉivi mè, n’ôm’edu gôre ṉwè e be tô fwinya gô mbuṽe yè.

¹¹ Ômpum̃a w’igôm̃i n’ôtaṉè wi be dwaṉ’igeṽa gôre ṉwè; anyènyaṉi du ilônda, areṉaṉi du yom̃a yi jaṉa yômè gw’intyaga, ko ṉwè agum̃inya du igoli yi re yi zele teṉô pa;

¹² konde wô ne ômpum̃a w’igeṽa; aṉwè be jeṉa wô ga eza z’ôrunda. Aṉwè be nya ôwongo w’intyagi saṉi.

¹³ G’ômpum̃a wiṉo w’igeṽa, ôm’edu gôre ṉwè be fwinya gw’aṉivi mè.

¹⁴ J’aṉw’akôl’ezom̃a gôr’ôrangaṉô waṉi, ge j’aṉw’akôl’ezom̃a avila gôr’ôrangaṉô waṉi, gambèṉè ôm’edu gôre ṉwè aremiz’ômwareri yè.

¹⁵ Ô be kôla gôr’ôrangaṉô wo ntangag’impum̃a avila g’ômpum̃a w’igeṽa, n’ayè e be kôla na ṉwè, ntangag’impum̃a y’avegag’ôwongo buṉa pa.

¹⁶ J’impum̃a y’adwaṉa vyagaṉô, gambèṉè ô be pendiz’igôlô nya yô vyagaṉô; na j’impum̃a y’adwaṉ’imyèwo, gambèṉè ô be sôny’igôlô nya yô ni ntye, konde yô ne ntangô y’ilônda yi kôlô yè gôre wè.

¹⁷ Ôm’edu gôre ṉwè aremiz’ôrangaṉô wè, ko wè ty’Anyambyè yo, konde myè ne Yeôva Anyambyè yo.

¹⁸ Lendaṉ’ampangi mam̃, venjavenjaṉ’isômbyi sam̃ alenda sô, ko ṉwè dwaṉe njuke fo gô ntye.

¹⁹ Ni ntye yi be jaṉ’ilônda ya yô, aṉwè be nya ayôra pôlô, ko ṉwè dwaṉa gô yô njuke fo.

²⁰ Na j’aṉw’abulya inè: azwè be ny’ande g’ômpum̃a w’ôrwageṉô j’azw’anyènya du ilônda ge zwè teṉa du ilôndi yazô?

²¹ Mi be pa ṉwè ôzaviṉô wam̃ g’ômpum̃a w’ôrôṽa, ko wô jaṉiz’ôwongo vo impum̃’irarô.

²² Aṉwè be nyènya g’ômpum̃a w’eṉanay, ko ṉwè ny’ôwongo ôlungu, kwanga g’ômpum̃a w’eṉôgôm̃i, kwanga g’ôwongo ômwoṉa, aṉwè be ny’ôlungu.

²³ Intye s’agôlô du bangô na bangô, konde ntye iyam̃, konde aṉw’are gôre myè g’agènda na g’alwaṉi.

²⁴ Gô ntye yôdu yi be nivô ṉwè aṉwè be dwaṉiz’inyanga ny’idanduṉa gw’intye.

²⁵ Jog’ômwareri yo atw’ôkuge, ko yè kôle mbèy y’aṉivi mè, gambèṉè ayè yi re n’inyanga ny’idanduṉa, iyaṉô nyè nya banda, e be bya alanduṉ’eza zi r’ômwareri yè kôla pa.

²⁶ Jog’ôṉôm̃e e zele n’ôma wi re n’inyanga ny’idanduṉa, ko yè dèng’ezom̃a ayèmè gô danduṉa zô,

²⁷ gambèṉè e be tang’impum̃a avila gw’ikôla sa zô, awiṉiz’ôba wi re yè dènga pa gôr’ôma w’agôli yè na zô, ko yè fwinya gw’igumbi nyè.

²⁸ Jog’ayè alèng’ezom̃a gô fwiṉiza gôre yè, gambèṉè eza zi re yè kôla pa zi be tigaṉa gw’ago m’ôma w’agôli zô kwanga g’ômpum̃a w’igeṽa; g’ômpum̃a mè w’igeṽa e be fwinya gw’aṉivi mè, ko ôma w’agôli na yè dubwa avila gô mô.

²⁹ Jog’ôma akôle nagô yi dwaṉa gô nkala yi re kômbiṉô pa n’ikômba e be dèng’inyanga nyi danduṉa yô kaô akek’ômpum̃a zô kôlô pa; inyangi nyè gô danduṉa nyi be dwaṉ’ômpum̃a.

³⁰ Ndô ja nagô mè, nôgô pa gô nkala yi re kômbiṉô pa n’ikômba, yi pa tô kôlô ômpum̃’ôm̃ori gekaga ro, gambèṉè yi be dwaṉa pèkèpèkè gôr’ôma w’agôli yô na gôr’imbambi sè; y’alubwa du g’ômpum̃a w’igeṽa.

³¹ Inagô s’inkal’inyangô si re si zele kômbiṉô pa n’ikômba si be jeṉô ga intyaga si ntye; sô ko danduṉô, n’ôma w’agôli sô e be dubwa gô sô g’ômpum̃a w’igeṽa.

³² Vangaṉe gw’inkala si Leviti na gw’inagô si be nivô waô vovo, Leviti wi be dwaṉa n’inyanga gô danduṉa egômbe zôdu.

³³ Ayè yi be kôla ni Leviti nagô, e be kogwa avila gô nagô yi re kôlô pa, n’avila gô nkala y’alwaṉôgô yè g’ômpum̃a w’igeṽa, konde inagô s’inkala si Leviti sô ne agumbi maô gô garegare y’Israèl.

³⁴ Intyaga si re vingôvingô s’inkala si Leviti s’agôlô du; konde sô ne agumbi maô ma pèkèpèkè.

³⁵ Jog’ômwareri yo atw’ôkuge, ko ôgo wè jèza gôre wè, gambèṉè ô be simbyè; ô be denda kè mpangiṉi mèmô gôre yè yi r’ôgènda na yè yi dwaṉa gô ntye, ko yè dwaṉa na yè.

³⁶ Azungè gô bele dèng’ôba; ô be ty’Anyambyè yo, ko ômwareri yo dwaṉa na wè.

³⁷ Azungè du siki yo g’ômwanja wi dèng’ôba, ko wè azungè du ntôliṉô yo g’ômwanja wi dèng’ôba.

³⁸ Myè ne Yeôva, Anyambyè yo, y’agogunyi ṉwè avila gw’Egipt, gô pa ṉwè ntye yi Kanaan, gô dwaṉ’Anyambyè yaṉi.

³⁹ Jog’ômwareri yo atw’ôkuge pyèrè na wè, ko yè kôl’ôkuṽi wèmè gôre wè, avangè du gô janja ga ôsaka;

⁴⁰ e be dwaṉa gôre wè ga ôma wi janja n’ipa, ga ôma wi dwaṉa vovo; e be dwaṉ’ômi wo wi janjiṉo kwanga g’ômpum̃a w’igeṽa.

⁴¹ Gambèṉè e be dubwa avila gôre wè, ayè n’awaṉi wè na yè, ko yè fwinya gô mbuṽe yè, gw’igumba nya reri yè.

⁴² Konde waô inyôngô sam̃, s’agogunyô myè avila gw’Egipt; w’agôlô du ga nte kôlô asaka.

⁴³ W’avangiṉè du ni ngusu, ndô ô be ty’Anyambyè yo.

⁴⁴ Ô be bong’ôsaki wo ni nyôngô yo nyantô avila gôr’aṉongo mi re ṉwè vingôvingô; aṉwè be kôl’ôsaka ni nyôngô nyantô avila gô mô.

⁴⁵ Aṉwè ko kôla kè vovo awaṉa w’agènda wi be dwaṉa gôre wè, n’imbuṽe saô si be jaṉô gô ntye yaṉi, ko sô dwaṉ’agumbi maṉi.

⁴⁶ Aṉwè be tiga waô gô jigô ne awaṉi waṉi gô nyum̃i yaṉi ga igumba; aṉwè be bandam̃iṉa waô ga asaka egômbe zôdu. Ndô g’ômwanja w’awareri yaṉi, Israèl, ôm’edu gôre ṉwè avangiṉ’awareri yè ni ngusu.

⁴⁷ J’ôgènda ge ayè yi dwaṉa gôre wè apaga, k’ômwareri yo tw’ôkuge pyèrè na yè, ko yè kôl’ôkuṽi wèmè gôr’ôgènda wi dwaṉa gôre wè ntyo gôr’ôm’edu wi mbuṽe y’ôgènda,

⁴⁸ gambèṉè ayè kôlô pa, ayè ko dèng’inyanga nyi danduṉô; ôm̃ori gôr’awareri yè ko danduṉè.

⁴⁹ Mbalô wè ntyo ômwaṉ’ôṉôm̃e wi mbalô wè, ntyo ôm̃ori gôr’ayaṉô mè ma banda, ko danduṉè; ge j’are paga pa, ayè ko danduṉ’ôkuṽi wèmè.

⁵⁰ Ayè be tanga n’ôma w’agôli yè avila g’ômpum̃a w’agôlyô yè kwanga g’ômpum̃a w’igeṽa; n’igôlô nyi pô nyi be kenjô ga nt’are ntangô y’impum̃a, yi be dwaṉe njôni ga y’ôma wi janje njanjaga.

⁵¹ J’impum̃a yi p’ar’imyenge, gambèṉè e be p’igumba gw’idanduṉi sè g’ômwanja w’igôlô ny’impum̃a mè na ga nt’ar’igôlô nyi re yè kôlô pa.

⁵² J’atigaṉ’impum̃a ya kwè kwanga g’ômpum̃a w’igeṽa, gambèṉè e be tanga yô, ko yè p’igumba gw’idanduṉi sè g’ômwanja w’impum̃a mè.

⁵³ E be dwaṉa ga ôma wi janja g’ômpum̃a; avangiṉè du ni ngusu gw’antyo mo.

⁵⁴ Jog’alanduṉô gô mpanginy’edu gô siṉo, gambèṉè e be dandwa g’ômpum̃a w’igeṽa, ayè n’awaṉi wè na yè;

⁵⁵ konde Israèl wi r’asaka gôre myè; wi r’asaki wam̃, w’agogunyô myè avila gw’Egipt. Myè ne Yeôva, Anyambyè yaṉi.