Levitiki 24 - Bibili 1927 (Omyene)

¹ N’agambi Yeôva gôre Môsès awulya inè:

² Zômby’Israèl gô baga g’ômwanga wi dôṽyô ilambi agali ambya m’iyôlivi pyarô pa, ko mô dwaṉa gw’ilambi egômbe zôdu.

³ Aarône e ga gekize mô gô nkôṽa y’igala ny’ôṉamba wi re diṽiṉô pa wi re swaswo n’egara z’ampanga gô ñanja y’idataṉa, ko ilambi bam̃iṉag’egômbe zôdu g’ôzô wi Yeôva avile nkôlô kwang’ibanga. Nyô ne ivanga nya pèkèpèkè gôr’imbambi saṉi.

⁴ E be dôṽy’ilambi g’ômwanga wi dwaṉ’ilambi wi sika mbya ya teṉateṉa ko sô bam̃iṉag’egômbe zôdu g’ôzô wi Yeôva.

⁵ Ô be bong’avila gô farinya mbya ko wè panga na yô igôm̃i ny’idega n’idega baṉi; ôlegy’edu wi be dwaṉe mbèy mbaṉi s’igôm̃i.

⁶ Ô be dimbiṉa sô ikônda mbani, ôrôṽa vo ôkônda, gô tavulu yi sika mbya ya teṉateṉa g’ôzô wi Yeôva.

⁷ Ô be fwela ya yi nkangô mbya g’ôkônd’edu, gambèṉè yi be dwaṉa gô mpèmba ga ôyônginyô, ga ntyagô yi pezô ne ôgôṉi g’ôzô wi Yeôva.

⁸ Ntyugw’edu y’ijowa, wi be dôṽye mpèmba yiṉo g’ôzô wi Yeôva egômbe zôdu. Yô ne njeka ya pèkèpèkè, yi be penjavenjô ne Israèl.

⁹ Impèmba si be dwaṉa gôr’Aarône na gôr’awaṉi wè aṉôm̃e, ko waô nya sô gô mbôra y’ôrunda, konde yi be dwaṉa gôre waô eza z’ôrund’ômpôlômè, mbèy mori avila gw’intyagô si pezô ne ôgôṉi g’ôzô wi Yeôva. Nyô ne ivanga nya pèkèpèkè.

¹⁰ Ômwaṉ’ôṉôm̃e w’ômwantô w’Israèl, na w’ôṉôm̃e w’Egipt, aṽyeṉi gôr’Israèl, ayôm̃aṉi g’ôlakô n’ôṉôm̃e w’Israèl.

¹¹ Ômwaṉ’ôṉôm̃e w’ômwantô w’Israèl aṽendi, aroṽ’ina ny’Anyambyè. Aṽagi waô yè gôre Môsès. N’aweyô ngi yè Selômit, y’ômwaṉ’ômwantô wi Dibri, gô mbuṽe yi Dan.

¹² N’aweli waô yè gô ntyôgô kwanga gô be myeze Môsès nte be sômbye Yeôva.

¹³ N’agambi Yeôva gôre Môsès awulya inè:

¹⁴ Goguny’avila g’ôlakô ôvèdisi w’Anyambyè; waôdu w’ayogyô yè wi be taly’ago maô gw’ewônjô zè, ni mandô yôdu yi be pungè adô.

¹⁵ Ô be kamba gôr’Israèl, ko wè bulya inè: Ôm’edu e be dog’Anyambyè yè e be dèng’ôgôm̃a w’ibe sè.

¹⁶ Ayè yi be pèdy’ina nyi Yeôva e be jôṉô; mandô yôdu yi be pungè adô; adwaṉ’ôgènda mbya ge ôlwaṉi mbya, e be juwa g’ômwanja wi re yè pèdya p’ina ny’Anyambyè.

¹⁷ Ayè yi be bôl’ôma ko yè juwa e be jôṉô.

¹⁸ Ayè yi be bôle nyam̃a ko yô juwa, e be tô fwiṉiza yô; em̃èṉo gw’em̃èṉo.

¹⁹ Jog’ôm’edu abonj’ôrangaṉô wè evôra, e be dendiṉè ga nt’are yè denda pa:

²⁰ Evôra gw’evôra, intyo gw’intyo, inô gw’inô; e be kwèrô evôra mèmô ga nt’are yè kwèra p’ôrangaṉô wè.

²¹ Ayè yi be jôṉe nyam̃a e be fwiṉiza yô, ndô ayè yi be jôṉ’ôma e be jôṉô.

²² Aṉwè be dwaṉa n’ivanga mèmô gôr’ôgènda, ga nt’are gôr’ôlwaṉi, konde myè ne Yeôva, Anyambyè yaṉi.

²³ N’agambi Môsès gôr’Israèl; agogunyi waô ôvèdisi w’Anyambyè avila g’ôlakô, n’avungi waô yè adô. N’Israèl w’alendi ôzômbyô w’aveṉi Yeôva Môsès.