Levitiki 23 - Bibili 1927 (Omyene)

¹ N’agambi Yeôva gôre Môsès awulya inè:

² Gamba gôr’Israèl, ko bulinya waô inè: Ifèti si Yeôva si dendô ṉwè, si be dwaṉ’idataṉa s’ôrunda. Vônaṉ’ôṉongo w’ifèti sam̃.

³ Ṽilô yi be janjô ntyugu ôrôṽa, ndô ntyugu y’ôrwageṉô yô ne ijowa, ntyugu y’ijowa; yi be dwaṉ’ôlataṉô w’ôrunda gô yô. Ayanjaṉ’eṽilô edu; yô ne ijowa si Yeôva gw’alwaṉô maṉi môdu.

⁴ Vônaṉ’ifèti si Yeôva, idataṉa s’ôrunda si be dendô ṉwè gô gômbe ya yô yi re tetô pa.

⁵ G’ôgwèli ôlônga, gô ntyugu y’igôm̃i ni nay y’ôgwèli, gô gare yi nkôlô mbaṉi, be dwaṉe Paki yi Yeôva.

⁶ Na gô ntyugu y’igôm̃i n’ôtaṉè y’ôgwèli mè, yô be dwaṉe fèti yi mpèmba yi re levèn fo gô dube Yeôva; aṉwè be nye mpèmba yi re levèn fo ntyugu ôrwageṉô.

⁷ Gô ntyugu nônga, aṉwè be dwaṉa n’ôlataṉô w’ôrunda; ayanjaṉ’eṽilw’edu eṽôlô.

⁸ Aṉwè be jiriṉe Yeôva intyagô si pezô ne ôgôṉi, ntyugu ôrwageṉô. Gô ntyugu y’ôrwageṉô yi be dwaṉ’ôlataṉô w’ôrunda; ayanjaṉ’eṽilw’edu eṽôlô.

⁹ N’agambi Yeôva gôre Môsès awulya inè:

¹⁰ Gamba gôr’Israèl, ko bulinya waô inè: gô be jingiṉa ṉwè gô ntye yi pa myè ṉwè, ko ṉwè teṉ’ilônda ya yô gôgô, gambèṉè aṉwè be bag’ekôlô z’ilônd’ilônga z’egômbe zaṉi z’iteṉa gôre miṉisè.

¹¹ Yi be piṉ’ekôlô z’ilônda g’ôzô wi Yeôva, ko zô bongô, gambèṉè soṉo pila pa bunya, gambèṉè miṉisè e be piṉa zô g’ôzô wi Yeôva.

¹² Gô ntyugu yi be piṉa ṉwè ekôlô z’ilônda, aṉwè be jira gô ntyagô yi pezô gôre Yeôva ômwaṉa w’idombè w’ômpum̃’ôm̃ori wi re ntyèmbo fo.

¹³ Aṉwè be kunda vovo ntyagô y’inya s’imbèy s’igôm̃i mbaṉi si farinya mbya bindô pa n’agali, ga ntyagô y’inya si pezô ne ôgôṉi, si nkangô mbya gôre Yeôva; n’aṉwè be pange ntyagô y’ijonga yi mbèy yi nay yi in y’ivè.

¹⁴ Anyaṉi mpèmba ge iputu impinke ntyo si re nyigô pa, kaô gô ntyugu mèmô yi be baga ṉwè ntyagô y’inya gôr’Anyambyè yaṉi. Nyô ne ivanga nya pèkèpèkè gôr’imbambi saṉi gw’imbôra sôdu si be dwaṉô ṉwè.

¹⁵ Soṉo pila pa bunya gô ntyugu yi be baga ṉwè ekôlô z’ilônda gô piṉa zô g’ôzô wi Yeôva, aṉwè be tanga iwiki sa ntuntu ôrwageṉô.

¹⁶ Aṉwè be tanga agôm̃i m’intyugu ataṉè kwanga gô soṉo y’ôrwageṉô pila bunya, ko ṉwè jiriṉe Yeôva nyoṉa y’inya ntyagô.

¹⁷ Aṉwè be bag’avila gw’alwaṉô maṉi amunga mi mpèmba ambaṉi, ko mô piṉô g’ôzô wi Yeôva, mi pangô n’imbèy s’igôm̃i mbaṉi si farinya mbya ko yô pikô ni levèn; yô ne ilônd’ilônga gôre Yeôva.

¹⁸ Tômbare p’impèmba siṉo, aṉwè be jira gô ntyagô yi pezô gôre Yeôva awaṉa w’adombè ôrwageṉô w’ômpum̃’ôm̃ori wi re ntyèmbo fo, ni nyare nôm̃e n’adombè aṉôm̃e ambaṉi; aṉwè be kunda vovo ntyagô y’inya ni ntyagô y’ijonga nte dendô pèkèpèkè, ga ntyagô yi pezô ne ôgôṉi, yi nkangô mbya gôre Yeôva.

¹⁹ Aṉwè be jire mbôṉi nôm̃e gô ntyagô y’ôraṽô wi mpungu y’ibe, n’awaṉa w’adombè aṽaṉi w’ômpum̃’ôm̃ori gô ntyagô y’akeṽa.

²⁰ Ni miṉisè e be piṉ’inyam̃a siṉo g’ôzô wi Yeôva, ni mpèmba y’ilônd’ilônga ta n’awaṉ’aṽaṉi n’adombè ta; wi be pangô ôrunda gôre Yeôva, na wi be dwaṉa gôre miṉisè.

²¹ Gô ntyugu mèmô, aṉwè be myeze fèti, n’aṉwè be dwaṉa n’ôlataṉô w’ôrunda; ayanjaṉ’eṽilw’edu eṽôlô. Nyô ne ivanga nya pèkèpèkè gôr’imbambi saṉi gw’imbôra sôdu si be dwaṉô ṉwè.

²² Gô be teṉa ṉwè ilônda gô ntye yaṉi, areṉ’ômôndô wi ntyagi yo, ge wè kum̃iny’ilônda yi dèka gô teṉô. Ô be tiga yô gôr’ôkuge na gôr’ôgènda. Myè ne Yeôva, Anyambyè yaṉi.

²³ N’agambi Yeôva gôre Môsès awulya inè:

²⁴ Gamba gôr’Israèl inè: G’ôgwèli w’ôrwageṉô, gô ntyugu nônga y’ôgwèli, aṉwè be dwaṉa ni ntyugu y’ijowa, yi be dendô ntôngôgô itombo n’ôlataṉô w’ôrunda.

²⁵ Ayanjaṉ’eṽilw’edu evôlô ko ṉwè jiriṉe Yeôva intyagô si pezô ne ôgôṉi.

²⁶ N’agambi Yeôva gôre Môsès awulya inè:

²⁷ Gô ntyugu y’igôm̃i y’ôgwèli mè w’ôrwageṉô, yô be dwaṉe ntyugu y’iraṽô y’impungu s’ibe; aṉwè be dwaṉa n’ôlataṉô w’ôrunda, aṉwè be sôny’ikuṽi yaṉi, ko ṉwè jiriṉe Yeôva intyagô si pezô ne ôgôṉi.

²⁸ Ayanjaṉ’eṽilw’edu gô ntyugu mèyoṉo, konde yô ne ntyugu y’iraṽô y’impungu s’ibe, yi ga lendô gôre ṉwè ôraṽô wi mpungu y’ibe g’ôzô wi Yeôva, Anyambyè yaṉi.

²⁹ Ôm’edu are azôny’ôkuṽa gô ntyugu mèyoṉo e be teṉô avila gôr’iṉongo nyè.

³⁰ Ôm’edu e be dend’eṽilw’edu gô ntyugu mèyo, mi be jilizè avila gô garegare y’iṉongo nyè.

³¹ Alendaṉ’eṽilw’edu. Nyô ne ivanga nya pèkèpèkè gôr’imbambi saṉi, gw’imbôra sôdu si be dwaṉô ṉwè.

³² Si be dwaṉa gôre ṉwè ijowa, ntyugu y’ijowa, ko ṉwè sôny’ikuṽi yaṉi; avila gô nkôlô yi ntyugu y’eṉôgôm̃i kwanga gô nkôlô mori, aṉwè be jow’ijowi saṉi.

³³ N’agambi Yeôva gôre Môsès awulya inè:

³⁴ Gamba gôr’Israèl, inè: gô ntyugu y’igôm̃i n’ôtaṉè y’ôgwèli w’ôrwageṉô, yi be dwaṉe fèti yi nôga si saka ntyugu ôrwageṉô gô dube Yeôva.

³⁵ Gô ntyugu nônga yi be dwaṉ’ôlataṉô w’ôrunda; alendaṉ’eṽilw’edu eṽôlô.

³⁶ Aṉwè be jiriṉe Yeôva intyagô si pezô ne ôgôni ntyugu ôrwageṉô. Gô ntyugu y’eṉanay, aṉwè be dwaṉa n’ôlataṉô w’ôrunda, ko ṉwè jiriṉe Yeôva intyagô si pezô ne ôgôṉi; yi be dwaṉe mandô mpôlô y’igeṽa; alendaṉ’eṽilw’edu evôlô.

³⁷ Siṉo ne ifèti si Yeôva, idataṉa s’ôrunda, si be dataṉô ṉwè, ko waô jiriṉe Yeôva intyagô si pezô ne ôgôṉi, intyagô si pezô, intyagô s’inya, intyagô s’ijonga, ezom̃y’edu gô ntyugu yèmè.

³⁸ Aṉwè be penjavenja kè intyugu s’ijowa si Yeôva ta, n’aṉwè be dwaṉa kaô mpagage mpagagi yaṉi gôre Yeôva, intyagô saṉi sôdu gô dwaṉiz’ôrangô n’intyagô saṉi sôdu si mpagaga.

³⁹ Gô ntyugu y’igôm̃i n’ôtaṉè y’ôgwèli w’ôrwageṉô gô be kum̃inya ṉwè ilônda yi ntye, aṉwè be dende fèti gôre Yeôva, ntyugu ôrwageṉô; ntyugu nônga yi be dwaṉe ntyugu y’ijowa, ni ntyugu y’eṉanay yi be dwaṉe kè ntyugu y’ijowa.

⁴⁰ Aṉwè be bonga gô ntyugu nônga ilônda yi rere ṽya, ikôgô y’ambila, ampari m’anyumba mi rere n’irèṽè y’akoto, ko ṉwè jeṉ’igeṽa ntyugu ôrwageṉô g’ôzô wi Yeôva Anyambyè yaṉi.

⁴¹ Aṉwè be dende fèti yiṉo gôre Yeôva ômpum̃y’edu ntyugu ôrwageṉô. Nyô ne ivanga nya pèkèpèkè gôr’imbambi saṉi. Aṉwè be denda yô g’ôgwèli w’ôrwageṉô.

⁴² Aṉwè be dwaṉe ntyugu ôrwageṉô gw’inagô s’akuku; alwaṉi waôdu gôr’ Israèl wi be dwaṉa gw’inagô s’akuku,

⁴³ ko imbambi saṉi mya inè, my’are kogunya p’Israèl avila gw’Egipt, my avangi waô gô dwaṉa gw’inagô s’akuku. Myè ne Yeôva Anyambyè yaṉi.

⁴⁴ Yeṉo awulinyi Môsès Israèl inè, siṉo ne ifèti si Yeôva.