Levitiki 22 - Bibili 1927 (Omyene)

¹ N’agambi Yeôva gôre Môsès awulya inè:

² Gamba gôr’Aarône na gôr’awaṉi wè aṉôm̃e, inè, wi ga ṽangunye ikuṽi yaô avila gô yom̃a y’ôrunda yi re pangô p’ôrunda gôre myè ne Israèl, ko w’aweviza du ini nyam̃ ny’ôrunda; myè ne Yeôva.

³ Wulinya waô inè: Ôṉôm̃y’edu gôr’imbambi saṉi ni mbuṽe yaṉi, e be susa pyèrè gô yom̃a y’ôrunda yi re pangô p’ôrunda gôre Yeôva ne Israèl, ko yè dwaṉa n’isèkè g’ôkuṽi wè, ôma mèwoṉo e be teṉô avila g’ôzô wam̃. Myè ne Yeôva.

⁴ Ôṉôm̃y’edu wi mbuṽe y’Aarône e be dwaṉa ni nkaṉi ya gelô ntyo n’ôzômba, anya du yom̃a y’ôrunda, kaô adwaṉa pupu. Yi be dwaṉa kè mpangiṉi mèmô g’ômwanja w’ôma wi be bwat’ôma are fweva pa vo ikôzaṉa ne ebende, g’ômwanja w’ôma are ni nkaṉi y’ôzômba;

⁵ g’ômwanja w’ôma wi be bwate ya yi dandalanda, ko yè fweva vo yô, ntyo ôṉôm̃e are datô pa n’isèkè sa ntuntu ko yè fweva vo sô.

⁶ Ayè yi be bwate ya yiṉo e be fweva kwange nkôlô; anye yom̃a y’ôrunda, ndô e be sovuṉ’ôkuṽi wè gô mbeṉe.

⁷ Nkômbe kènda pa, gambèṉè e be dwaṉa pupu, n’avila vovo e be nye yom̃a y’ôrunda, konde yô ne inyi sè.

⁸ Ayè anya du nyam̃a yi re juwa pa ntyo sasuṉô pa ko yè awevizô ne yô. Myè ne Yeôva.

⁹ Wi be penjavenj’ampangi mam̃, waô vende dèng’ôgôm̃a g’ômwanja w’ibe saô ko waô juwa, ja w’afwevize yom̃a y’ôrunda. Myè ne Yeôva, yi mèpiza waô.

¹⁰ Ôgèndy’edu anye yom̃a y’ôrunda; ayè yi dwaṉa gô nagô yi miṉisè n’ôma wi janja w’anya du yom̃a y’ôrunda.

¹¹ Ndô ôsaka wi re kôlô pa ne miṉisè ayè ko nya yô, egolaṉi mèmô kè ayè yi re jaṉô pa gô nagô yè; waô wi be nya gw’inyi sè.

¹² Ômwaṉ’ômwantô wi miṉisè wi jômbizô gôr’ôgènda anya du gô yom̃a y’ôrunda yi re piṉô pa g’ôzô wi Yeôva.

¹³ Ndô ômwaṉ’ômwantô wi miṉisè wi be dwaṉ’ôtika ntyo tômbô pa ne ôṉôm̃u wè, ko yè alwaṉa n’awaṉa, ko yè fwinya gô dwaṉa gô nagô ya reri yè ga nt’avegagi yè gw’erumbe zè, ko nya gw’inya sa reri yè. Ndô ôgèndy’edu anya sô.

¹⁴ Jog’ôma any’ezom̃a z’ôrunda n’ijela, gambèṉè e be pa gôre miṉisè njôni y’ezom̃a z’ôrunda, agunda gô zô mbèy y’ôtaṉè.

¹⁵ Miṉisè y’awundakaṉa du yom̃a y’ôrunda yi re pô pa ne Israèl, na yi re waô piṉa pa g’ôzô wi Yeôva.

¹⁶ W’arô twaṉi kè ibe s’arô pangi waô gô dwaṉ’ôgara gô nye yom̃a y’ôrunda; konde myè ne Yeôva yi mèpiza waô.

¹⁷ N’agambi Yeôva gôre Môsès awulya inè:

¹⁸ Gamba gôr’Aarône na gôr’awaṉi wè aṉôm̃e, na gôr’Israèl waôdu, awulinya waô inè: Ôṉôm̃y’edu wi nagô y’Israèl ntyo agènda gôr’Israèl, wi be jire ntyagô yi pezô gôre Yeôva, y’adwaṉa g’ômwanja wi dwaṉiz’ôrang’ômbya, y’adwaṉa g’ômwanja wi ntyagô yi mpagaga mbya,

¹⁹ e be bonge nyare nôm̃e yi re ntyèmbo fo, awaṉa w’adombè ntyo imbôṉi, ko ntyagô yè bongô.

²⁰ Ayiraṉi gô ntyagô nyam̃y’edu yi re ni ntyèmbo konde y’awongô.

²¹ Jog’ôma ajiriṉe Yeôva nyam̃a mpôlô ntyo nyangô gô ntyagô y’akeṽa, y’adwaṉa g’ômwanja wi dwaṉiz’ôrang’ômbya, ntyo y’adwaṉa g’ômwanja wi ntyagô yi mpagaga mbya, nyam̃a yi jirô ntyagô yi be dwaṉe ntyèmbo fo, ko yô bongô.

²² Ayiraṉi du nyam̃a yi r’idodu, ge y’eṉèm̃a ntyo y’ôbèli, ge yi re n’ampômbô, ge impaza, ge ôgèṉi; ayiraṉi yô du gô mbôra yi jirô intyagô gô ntyagô yi pezô ne ôgôṉi g’ôzô wi Yeôva.

²³ Awè ko jira gô ntyagô yi mpagaga nyare ntyo ômwaṉa w’idombè wi re n’eṉam̃a ela, ntyo eṉam̃a epe, ndô y’awongô du g’ômwanja wi dwaṉiz’ôrang’ômbya.

²⁴ Ayira du gôre Yeôva nyam̃a yi re imanga y’ivangô tuwunyô pa, ge nyigyanyigyô pa, ge jôkuṉô pa ge teṉô pa, ayiraṉi du yô gô ntyagô yi ntye yaṉi.

²⁵ Awongaṉi avila gôr’ôgènda nyam̃y’edu yi jirô ntyagô avila gô siṉo gô jira yô ga inya s’Anyambyè yaṉi, konde si re ibèli, si re n’intyèmbo, s’awongô du.

²⁶ N’awulinyi Yeôva Môsès inè:

²⁷ Nyare mori, ômwaṉa w’idombè ôm̃ori ntyo mbôṉi ja y’ajaṉô yi be dwaṉa ni ngi yè ntyugu ôrwageṉô; avila gô ntyugu y’eṉanay agènda gw’intyugw’im̃ori yi be bongô gô jirô gôre Yeôva gô ntyagô yi pezô ne ôgôṉi.

²⁸ Nyare ntyo ômwaṉa w’idombè, ayôṉaṉi nyam̃a n’ômwaṉi wè ta ntyugu mô.

²⁹ J’aṉwè ajiriṉe Yeôva ntyagô y’akeṽa, gambèṉè ko jiraṉi nt’are yô ko bongô.

³⁰ Nyam̃a yi jiro gô ntyagô yi be nyô gô ntyugu mèmô; arigaṉ’ezom̃a avila gô yô kwang’ibanga. Myè ne Yeôva.

³¹ Aṉwè be penjavenj’ampangi mam̃, ko ṉwè denda mô. Myè ne Yeôva.

³² Awevizaṉi du ini nyam̃ ny’ôrunda ko mi pangô ôrunda gô garegare y’Israèl. Myè ne Yeôva, yi panga ṉwè ôrunda,

³³ na y’agogunyi ṉwè avila gw’Egipt gôre yè gô dwaṉ’Anyambyè yaṉi. Myè ne Yeôva.