Levitiki 21 - Bibili 1927 (Omyene)

¹ N’awulinyi Yeôva Môsès, inè: Gamba gôr’imiṉisè, awaṉ’aṉôm̃e w’Aarône inè: Miṉisè y’aweva du gôr’iṉongo nyè g’ômwanja w’ebende,

² kaô g’ômwanja w’ayaṉô mè ma banda, g’ômwanja wi ngi yè, g’ômwanja wa reri yè, g’ômwanja w’ômwaṉi wè ôṉôm̃e, g’ômwanja w’ômwaṉi wè ômwantô, g’ômwanja wa mwô’ngi yè ôṉôm̃e,

³ g’ômwanja kè w’ezombi zè zi p’ar’izali nyi re nyi pa dèwa n’ôṉôm̃e ni mori, nyi pe dwaṉa ta na mongi yè gôre yè e pa jômbô.

⁴ Ayè yi r’ôvangiṉi gôr’iṉongo nyè, aweviza du ôkuṽi wè ko yè bundakaṉa wô.

⁵ Imiṉisè s’azèngiṉa du ikanga gô wônjô yaô, ge waô sèngiṉe lèlu yaô sondosondo, w’agwèra du agwèra gw’izôṉe yaô.

⁶ Wi be dwaṉe nkèrè gôr’Anyambyè yaô, ko w’aweviz’ina ny’Anyambyè yaô, konde wi jiriṉe Yeôva intyagô si pezô ne ôgôṉi, inya s’Anyambyè yaô; wi be dwaṉe nkèrè.

⁷ W’awonga du ômwantô w’evôvevôve ge wi re fwevizô pa: w’awonga du ômwantô wi re tômbô pa ne ôṉôm̃u wè, konde wi be dwaṉe nkèrè gôr’Anyambyè yaô.

⁸ Ô be jeṉe miṉisè ga eza z’ôrunda konde yi pa inya s’Anyambyè yo; yi be dwaṉ’ôrunda gôre wè, konde my’ar’ôrunda, myè, Yeôva yi mèpiza ṉwè.

⁹ Jog’ômwaṉ’ômwantô wi miṉisè e fweva g’ômwanja w’evôve zè, gambèṉè e fwevize reri yè; e be pezô g’ôgôṉi.

¹⁰ Miṉisè yi re mpôlô gôr’awareri yè, yi re jirô pa agali m’isagya gw’ewônjô, na yi re pangô p’ôrunda aworyô ingoy s’ôrunda, azèngiṉa du ewônjô zè ge jôkuṉa du ingoy sè.

¹¹ Agènda gw’ebende z’ôm’edu, ko aweviz’ôkuṽi wè, g’ômwanja wa reri yè ge g’ômwanja wi ngi yè.

¹² Ayè agogwa du avila gô mbôra y’ôrunda, ko yè aweviza du mbôra y’ôrunda y’Anyambyè yè, konde agali m’isagya m’Anyambyè yè mi re ga kôrôṽa gôre yè. Myè ne Yeôva.

¹³ E be jômb’ômwantô kaô izali nyi re nyi pa dèwa n’ôṉôm̃e ni mori

¹⁴ Ayè ayômb’ôtika, ge ômwantô wi re tômbô pa no ôṉôm̃u wè, ge ômwantô wi re fweva pa ntyo evôvevôve, ndô e ga yômbe kaô ômwantô wi r’izali nyi re nyi pa dèwa n’ôṉôm̃e ni mori gôr’iṉongo nyè.

¹⁵ Ayè aweviza du awaṉi wè gôr’iṉongo nyè, konde myè ne Yeôva yi mèpizè.

¹⁶ N’agambi Yeôva gôre Môsès awulya inè:

¹⁷ Gamba gôr’Aarône inè: Ôṉôm̃y’edu gô mbuṽe yo na gôr’imbambi so, wi be dwaṉa n’ibôke g’ôkuṽa, azusa du pyèrè gô jir’inya s’Anyambyè yè.

¹⁸ Ôṉôm̃y’edu are ni mpèlo g’ôkuṽa ayolyè gô susa pyèrè; ôṉôm̃e ar’idodu, ge ebôke, ge ômpômbô bèdè ntyo eṉam̃’ela;

¹⁹ ge ôṉôm̃e wi re mogwa p’ôgôlô ntyo ôgo;

²⁰ ge ôṉôm̃e wi re mogwa p’ekidi, ntyo wi re dèladèla ge wi r’intyo nkègèṉi, ge impaza, ge ôgèṉi, ntyo imanga y’ivangô tuwa pa.

²¹ Ôṉôm̃y’edu wi mbuṽe yi miṉisè Aarône, wi re ntyèmbo g’ôkuṽa, azusa du pyèrè gô jiriṉe Yeôva intyagô si pezô ne ôgôṉi, are ni ntyèmbo g’ôkuṽa; azusa du pyèrè gô jir’inya s’Anyambyè yè.

²² Ay’ayolye gô ny’inya s’Anyambyè yè, yom̃a y’ôrund’ômpôlômè na y’ôrunda.

²³ Ndô ayè agènda du g’ôṉamba wi re diṽiṉô pa, n’ayè azusa du pyèrè gô mbôra yi jirô intyagô, konde ayè are ni ntyèmbo g’ôkuṽa; ayè aweviza du imbôri sam̃ s’ôrunda, konde myè ne Yeôva, yi mèpiza sô.

²⁴ Yeṉo agambi Môsès gôr’Aarône na gôr’awaṉi wè aṉôm̃e, na gôr’Israèl waôdu.