Levitiki 2 - Bibili 1927 (Omyene)

¹ Jog’ôm’edu ajiriṉe Yeôva ntyagô y’inya mpagaga, gambèṉè ntyagô yè y’inya yi be dwaṉe farinya mbya; e be jir’agali g’ôlômba, ko yè kunda vovo ya yi nkangô.

² E be baga yô gôr’imiṉisè, awaṉ’aṉôm̃e w’Aarône, ni miṉisè yi be bonge ntyom̃è y’ileṽe avila gô farinya mbya yiṉo yi re tèṽizô p’agali ni ya yi nkangô yôdu, ko yè peza yô gô mbôra yi jirô intyagô g’ôyônginyô. Yô ne ntyagô mbya yi mpagaga gôre Yeôva.

³ Ya yi be dèka avila gô ntyagô y’inya yi be dwaṉa gôr’Aarône na gôr’awaṉi wè aṉôm̃e; yô ne ya y’ôrund’ômpôlômè gw’intyagô s’inya si pezô ne ôgôṉi g’ôzô wi Yeôva.

⁴ Ja w’ajire ntyagô y’inya y’eza zi re pikô pa gw’inu, gambèṉè zi be dwaṉa avila gô farinya mbya, ko zô dwaṉ’ôlega wi re levèn fo bindô pa n’agali, n’ôlega wa tètètè wi re levèn fo tèṽizô pa n’agali.

⁵ Jogo ntyagô yo y’inya yi r’ôlega wi re pikô pa gw’epèlè z’ôngôngô, gambèṉè wi be dwaṉa avila gô farinya mbya bindô pa n’agali levèn fo.

⁶ Ô be moguṉa wô yom̃’amunga, ko wè jir’agali g’ôlômba; yô ne ntyagô yi mpagaga.

⁷ Jogo ntyagô yo y’inya yi r’ôlega wi re pikô pa gw’eganga, gambèṉè wi be pangô ni farinya mbya bindô pa n’agali.

⁸ Ô be bage ntyagô y’inya yi be pangô ni yom̃a mèyoṉo gôre Yeôva; yi be pô gôre miṉisè ko yè baga yô gô mbôra yi jirô intyagô.

⁹ Miṉisè yi be tômba avila gô ntyagô y’inya eza zi re gô dwaṉa g’ôyônginyô, ko yè peza zô gô mbôra yi jirô intyagô. Yô ne ntyagô mbya yi mpagaga gôre Yeôva.

¹⁰ Ya yi be dèka avila gô ntyagô y’inya, yi be dwaṉa gôr’Aarône na gôr’awaṉi wè aṉôm̃e; yô ne ya y’ôrund’ômpôlômè gw’intyagô s’inya si pezô ne ôgôṉi g’ôzô wi Yeôva.

¹¹ Ntyagw’edu y’inya yi be jirô ṉwè gôre Yeôva y’alendô ni levèn, konde aṉwè aveze du eza zi re ni levèn ntyo zi re n’ôṉèmbè gw’intyagô s’inya si pezô ne ôgôṉi g’ôzô wi Yeôva.

¹² Aṉwè ko jira gôre Yeôva ga ntyagô y’ilônd’ilônga; ndô y’awôm̃unyô du gô mbôra yi jirô intyagô ga ntyagô mbya y’inya si nkangô.

¹³ Ô be fwel’ezanga gw’intyagô so s’inya sôdu, w’aleṽaṉa du gô fwel’ezanga gw’intyagô so s’inya sôdu, elingilyô zi njeka y’Anyambyè yo; gw’intyagô so sôdu s’impagaga ô be fwel’ezanga.

¹⁴ Jogo w’ajira gôre Yeôva gô ntyagô y’inya y’ilônd’ilônga, ô be jir’iputu inyoṉa, pikô pa g’ôgôṉi ni nyigô pa, ga ntyagô y’inya y’ilôndi yo ilônga.

¹⁵ Ô be jir’agali g’ôlômba ko wè kunda vovo ya yi nkangô; yô ne ntyagô y’inya.

¹⁶ Miṉisè yi be peza g’ôyônginyô mbèy mori y’iputu si re nyigô pa n’agali, ni ya yi nkangô yôdu. Yô ne ntyagô y’inya si pezô ne ôgôṉi g’ôzô wi Yeôva.