Levitiki 19 - Bibili 1927 (Omyene)

¹ N’agambi Yeôva gôre Môsès awulya inè:

² Gamba gôre mandô yôdu y’Israèl, awulinya waô inè: Lwaṉaṉ’ôrunda, konde myè r’ôrunda, myè, Yeôva, Anyambyè yaṉi.

³ Ôm’edu gôre ṉwè e be dube ngi yè ni reri yè, avenjavenj’intyugu sam̃ s’ijowa. Myè ne Yeôva, Anyambyè yaṉi.

⁴ Agegwaṉi gôr’ikaṉa, avangiṉaṉi du ikuṽi yaṉimè inyambyè si njirôgô.

⁵ J’aṉw’ajira gôre Yeôva ntyagô y’akeṽa, aṉwè be jira yô gô mpangiṉi yi re yô ko tondô.

⁶ Nyam̃a yi jirô ntyagô yi be nyô gô ntyugu yi be jira ṉwè yô, ntyo bunya; eza zi be dèka kwanga gô ntyugu yi ntyarô zi be pezô g’ôgôṉi.

⁷ Ja z’anyô gô ntyugu yi ntyarô, ziṉo zi be dwaṉ’ezom̃’eṽe; ntyagô y’alwaṉe mbya du.

⁸ Ayè yi be nya yô e be twaṉ’ôgôm̃a w’ibe sè, konde afwevizi eza zi re pangô p’ôrunda gôre Yeôva; ôma mèwoṉo e be teṉô avila gôr’iṉongo nyè.

⁹ Gô be teṉa ṉwè ilônda yi ntye yaṉi, ô be tig’ôm̃ôndô wi ntyagi yo ko w’areṉô, ko wè agum̃inya ya yi dèka gô teṉô ilônda.

¹⁰ Agum̃inya nyèṉè kôlô y’ilônda yi dèka bata gô ntyagi yo; w’agum̃inya kè ilônda yi be pôswa avila gô yô. Ô be tiga mèyoṉo gôr’ôkuge na gôr’ôgènda. Myè ne Yeôva, Anyambyè yaṉi.

¹¹ Ayufaṉi, ge ṉwè nôka ge temiz’am̃ori.

¹² Arangaṉi du ôrangô w’inôka vo ini nyam̃, konde awè ko fweviz’ina ny’Anyambyè yo. Myè ne Yeôva.

¹³ Arugiz’ôrangaṉô wo, awongiṉè ezom̃a du n’ôpitapitè. Azimbya du ipa s’ôma wi janja kwang’ibanga.

¹⁴ Aloga du ôma wi re mpôge, awel’ibaku gô bôsô y’ôma wi r’ipoku, ge pôsunyè, konde ô be dwaṉa n’itya s’Anyambyè yo. Myè ne Yeôva.

¹⁵ Awem̃a gw’iteṉiz’isam̃u; avôn’ôzô w’ôma w’ôkuge, aluba du ôm’ômpôlô, ndô ô be teṉiz’isam̃u y’ôrangaṉô wo ga nt’ar’ôrèti.

¹⁶ Alwaṉa du esèringila gôr’iṉongo nyo. Agum̃aṉa du g’ômwanja wi ntyiṉa y’ôrangaṉô wo. Myè ne Yeôva.

¹⁷ Aṉumba du mwô’ngi yo ôṉôm̃e g’ôrèm̃i wo, awè ko tevuṉ’ôrangaṉô wo, ndô ayega du ibe g’ômwanji wè.

¹⁸ Awiṉiza du ekôlè, alwaṉa du ni ngambi gôr’awaṉa w’iṉongo nyo. Rond’ôrangaṉô wo ga ôkuṽi womè. Myè ne Yeôva.

¹⁹ Aṉwè be penjavenj’ampangi mam̃. Ageziṉa du aṉongo m’inyam̃a ambaṉi; aṽèṉa du ntyagi yo n’aṉongo m’ilônd’ambaṉi; arwaṉe ngoy yi re pangô pa n’aṉongo m’inyongè ambaṉi, ga nt’are lèni ni lyamba.

²⁰ Jog’ôṉôm̃e adèwa n’ômwantô, aṽelaṉa na yè, jog’ayè ôsak’ômwantô wi re tom̃ô pa n’ôṉôm̃e, jog’ayè e zele danduṉô pa ge pangô pa dyèngadyènga, gambèṉè waô aṽaṉi wi be tevuṉô, ndô aranga gô jôṉô konde e zele danduṉô pa.

²¹ Ôṉôm̃e e be baga g’ômwanja w’ifwem̃i sè gôre Yeôva, g’ômpômbala wi ñanja y’idataṉa, idombè iṉôm̃e gô ntyagô y’ômwanja w’ôgara.

²² Gambèṉè miṉisè e be pa g’ômwanji wè ôraṽô wi mpungu y’ibe g’ôzô wi Yeôva n’idombè ny’apô gô jirô gô ntyagô g’ômwanja w’ibe si re yè janja pa, n’ibe s’ajanjô yè si be nyezô yè.

²³ Gô be jingiṉa ṉwè gô ntye ko ṉwè bèṉa vovo aṉongo mi rere môdu mi jaṉ’ilônda, gambèṉè aṉwè be jeṉ’ilônda ya yô ga izombè; impum̃’irarô yi be dwaṉ’izombè gôre ṉwè; y’anyô du.

²⁴ G’ômpum̃a wi nay, ilônda yôdu ya yô yi be dwaṉ’ôrunda gôre Yeôva gô sum̃inyô yè.

²⁵ G’ômpum̃a w’ôtaṉè, gambèṉè aṉwè be ny’ilônda ya yô, ko ṉwè dwaṉa nteṉaga yô. Myè ne Anyambyè yaṉi.

²⁶ Anyaṉ’ezom̃y’edu ni ntyiṉa. Avogaṉi n’im̃amba ge ni vindi.

²⁷ Areṉaṉi abèga gô wônjô yaṉi ge ṉwè teṉe lèlu sondosondo.

²⁸ Agwèraṉ’agwèra gw’izôṉe yaṉi g’ômwanja w’ôma wi re juwa pa, ge ṉwè fwele lingilyô gw’ikuṽi yaṉi. Myè ne Yeôva.

²⁹ Aweviza du ômwaṉi wo ômwantô gô pangè gô dwaṉ’evôvevôve, ntye yi vende dwaṉ’evôve ko yô jônya n’ibe.

³⁰ Aṉwè be penjavenj’intyugu sam̃ s’ijowa, ko ṉwè dube mbôri yam̃ y’ôrunda. Myè ne Yeôva.

³¹ Agegwaṉi gôre waô wi pog’abambô, ge gôre waô wi pog’imbwiri; awutaṉi du waô, aṉwè vende fweviz’ikuṽi yaṉi na waô. Myè ne Yeôva, Anyambyè yaṉi.

³² Ô be kum̃aṉa g’ôzô w’imbôlô, ko wè dub’aṉèro. Ô be ty’Anyambyè yo. Myè ne Yeôva.

³³ Jog’aby’ôgènda gô dwaṉa na ṉwè gô ntye yaṉi, avitakaṉaṉi yè du.

³⁴ Lendiṉaṉi ôgènda wi dwaṉa gôre ṉwè ga ôlwaṉi gôre ṉwè; rondaṉi yè ga ikuṽi yaṉimè, konde aṉw’avegagi agènda gw’Egipt. Myè ne Yeôva, Anyambyè yaṉi.

³⁵ Ayanjaṉ’ibe ge gw’iteṉiza s’isam̃u, ge gw’iteṉa s’ikaô yi ntye, ge gw’ipisa s’idôdô, ge gô yom̃a yi kèṉiza.

³⁶ Aṉwè be dwaṉa n’ôdôdô wi r’ipita fo, ipisa s’ipita fo, efa zi r’ipita fo, ni in s’ipita fo. Myè ne Yeôva, Anyambyè yaṉi, y’agogunyi ṉwè avila gw’Egipt.

³⁷ Aṉwè be penjavenj’ampangi mam̃ môdu n’isômbyi sam̃ sôdu, ko ṉwè denda sô. Myè ne Yeôva.