Levitiki 18 - Bibili 1927 (Omyene)

¹ N’agambi Yeôva gôre Môsès, inè:

² Gamba gôr’Israèl, awulinya waô inè: Myè ne Yeôva, Anyambyè yaṉi.

³ Alendaṉi du ga nte dendô gw’Egipt y’alwaṉagô ṉwè, ko alendaṉi du ga nte dendô gô Kanaan yi be baga myè ṉwè, ko azôngaṉ’intyale saô.

⁴ Lendaṉ’isômbyi sam̃, ko penjavenjaṉ’ampangi mam̃, ko ṉwè sônga mô. Myè ne Yeôva Anyambyè yaṉi.

⁵ Aṉwè be penjavenj’ampangi mam̃ n’isômbyi sam̃; ôma wi be denda sô e be dwaṉa bo vo sô. Myè ne Yeôva.

⁶ E zel’ôma gôre ṉwè wi be susa pyèrè gôr’iyaṉô nyè nya banda, gô eṉ’ôtele wè. Myè ne Yeôva.

⁷ Ayeṉa du ôtele wa reri yo, ge ôtele wi ngi yo. Ayè ne ngi yo, ayeṉa du ôtele wè.

⁸ Ayeṉa du ôtele w’ômwantô wa reri yo. Wô ne ôtele wa reri yo.

⁹ Ayeṉa du ôtele w’ezombi zo, ômwaṉ’ômwantô wa reri yo ge ômwaṉ’ômwantô wi ngi yo, wi re jaṉô pa gô nagô ge jaṉô pa gô mbôra nyèṉè.

¹⁰ Ayeṉa du ôtele w’ômwaṉ’ômwantô w’ômwaṉi wo ôṉôm̃e ge w’ômwaṉ’ômwantô w’ômwaṉi wo ômwantô, konde wô ne ôtele wo.

¹¹ Ayeṉa du ôtele w’ômwaṉ’ômwantô w’ômwantô wa reri yo, wi re jaṉô pa ne reri yo. Ayè ezombi zo.

¹² Ayeṉa du ôtele w’ezombi za reri yo. Nyô ne iyaṉô nya banda nya reri yo.

¹³ Ayeṉa du ôtele w’ezombi zi ngi yo, konde nyô ne iyaṉô nya banda nyi ngi yo.

¹⁴ Ayeṉa du ôtele w’ômwongwè ôṉôm̃e wa reri yo. W’asusa pyèrè gô dèwa n’ômwantô wè. Ayè ne ngi yo mori.

¹⁵ Ayeṉa du ôtele w’ômwantô w’ômwaṉi wo ôṉôm̃e. Ayè ne ômwantô w’ômwaṉi wo ôṉôm̃e; ayeṉa du ôtele wè.

¹⁶ Ayeṉa du ôtele w’ômwantô wa mwô’ngi yo ôṉôm̃e. Wô ne ôtele wa mwô’ngi yo ôṉôm̃e.

¹⁷ Ayeṉa du ôtele w’ômwantô na w’ômwaṉi wè ômwantô. Awonga du ômwaṉ’ômwantô w’ômwaṉi wè ôṉôm̃e, ge ômwaṉ’ômwantô w’ômwaṉi wè ômwantô gô jeṉ’itele yaô. Miṉo ne ayaṉô mo ma banda; sô ibe.

¹⁸ Awonga du mwô’ngwè ômwantô w’ômwantô wo, gô panga waô puvaṉa, ja w’ajeṉa ôtele wè gô p’ar’ômwantô wo bo.

¹⁹ Azusa pyèrè du gô dèwa n’ômwantô wi re dwaṉa pa gw’isam̃u yè y’antô gô jeṉ’ôtele wè.

²⁰ Ayinda du n’ômwantô w’ôrangaṉô wo gô fweviz’ôkuṽi wo na yè.

²¹ Avaṉi ômwaṉi edu avila gôr’awaṉi waṉi gôre waô gô kalwa gw’isaviṉa si Môloki; ko wè aweviza du ina ny’Anyambyè yo. Myè ne Yeôva.

²² Alèwa du n’ôṉôm̃e ga nte dèwô n’ômwantô. Wô ne ôsam̃u wi bikô.

²³ Alèwa du ni nyam̃a gô fweviz’ôkuṽi wo na yô. Ômwantô azusa pyèrè gô dèwa ni nyam̃a, gô belaṉa na yô; yi re ntyoṉi.

²⁴ Awevaṉi g’ôsam̃u edu gô yiṉo, konde g’ômwanja w’isam̃u yiṉo yôdu y’afweviz’aṉongo mi be sugô myè avila gô bôsô yaṉi.

²⁵ Ntye yi re fweva pa na yô; mi be tevuṉ’ibe sa yô, ni ntye yi be tôv’alwaṉi wa yô.

²⁶ Sambô venjavenjaṉ’ampangi mam̃ n’isômbyi sam̃, ko alendaṉ’ôsam̃u edu wi bikô gô yiṉo, ôlwaṉi, ge ôgènda wi dwaṉa gô garegare yaṉi.

²⁷ Konde yiṉo ne isam̃u yi bikô yôdu yi re dendô pa n’aṉôm̃e wi ntye, wi re dwaṉa pa vovo gô bôsô yaṉi; ni ntye yi re fweva pa na yô.

²⁸ Ṽandamiṉaṉi nè, ntye y’arôva ṉwè, j’aṉw’afweva, ga nt’are yô tova p’aṉongo m’alwaṉagi gô bôsô yaṉi.

²⁹ Konde waôdu wi be dend’ôsam̃u edu wi bikô avila gw’isam̃u imbe yiṉo wi be teṉô avila gô garegare y’iṉongo nyaô.

³⁰ Aṉwè be penjavenj’ampangi mam̃, ko ṉw’alende ntyaly’edu mbe s’alendôgô gô bôsô yaṉi, awevizôṉi du vo sô. Myè ne Yeôva, Anyambyè yaṉi.