Levitiki 17 - Bibili 1927 (Omyene)

¹ N’agambi Yeôva gôre Môsès, inè:

² Gamba gôr’Aarône na gôr’awaṉi wè aṉôm̃e, na gôr’Israèl waôdu, awulinya waô, inè: Vônaṉi nt’are Yeôva sômbya pa.

³ Jog’ôma wi nagô y’Israèl ajôṉa g’ôlakô ntyo gw’igala ny’ôlakô nyare nôm̃e, ge ômwaṉa w’idombè ge mbôṉi,

⁴ ko yè aṽaga yô g’ômpômbala wi ñanja y’idataṉa, gô jire ntyagô gôre Yeôva swaswo ni nagô y’ikuku yi Yeôva, gambèṉè ntyiṉa yi be tangô gôr’ôma mè, inè, are pôviza pe ntyiṉa, ôma mèwoṉo e be teṉô avila gô garegare y’iṉongo nyè.

⁵ Ko Israèl bag’inyam̃i saô gôre miṉisè g’ôzô wi Yeôva, gw’inyanga nyi jir’intyagô saô gw’intyaga, ko waô baga sô g’ômpômbala wi ñanja y’idataṉa, ko waô jira sô gôre Yeôva gô ntyagô y’akeṽa.

⁶ Miṉisè e be pôvize ntyiṉa ya sô gô mbôra yi jirô intyagô yi Yeôva, g’ômpômbala wi ñanja y’idataṉa, ko yè pez’agali mi be dwaṉe nkangô mbya gôre Yeôva.

⁷ W’ayira nyèṉè intyagô saô gôr’ikaṉa si re pangô pa n’egolaṉi z’imbôṉi si belaṉa na waô. Nyiṉo nyi be dwaṉ’ivanga nya pèkèpèkè gôre waô na gôr’imbambi saô.

⁸ Ko bulinya waô inè: Jog’ôma wi nagô y’Israèl ntyo agènda wi dwaṉa gô garegare yaô w’ajire ntyagô yi pezô ntyo nyam̃a yi jirô ntyagô,

⁹ ko w’aṽaga yô g’ômpômbala wi ñanja y’idataṉa gô jira yô gô ntyagô gôre Yeôva, ôma mèwoṉo e be teṉô avila gôre mongi yè.

¹⁰ Jog’ôma wi nagô y’Israèl ntyo agènda wi dwaṉa gô garegare yaô w’anye ntyiṉa y’ôṉongo w’ezom̃y’edu, gambèṉè mi be pal’ôzô wam̃ avila gôr’ôma mè wi nye ntyiṉa, na mi be teṉè avila gô garegare y’iṉongo nyè.

¹¹ Konde iṉiṉa ny’ôzôṉe nyi re gô ntyiṉa. My’are pa pa ṉwè yô gô mbôra yi jirô intyagô, ko yô taṽe mpungu y’ibe g’ômwanja w’aṉiṉi maṉi, konde yô ne ntyiṉa yi taṽe mpungu y’ibe vo aṉiṉi maṉi.

¹² Yeṉo my’are bulinya p’Israèl inè: Ezel’ôma gôre ṉwè e be nye ntyiṉa, n’ôgènda wi dwaṉa gô garegare yaṉi anya kè ntyiṉa.

¹³ Jog’ôm’edu gôr’Israèl ge agènda wi dwaṉa gô garegare yaô ate nyam̃a ge nyoṉi yi re gô nyô, e be jire ntyiṉa ya yô avugiṉa yô ni ntyèngè.

¹⁴ Konde iṉiṉa ny’izôṉe yôdu, nyô ne ntyiṉa ya nyô nyi re gô ntyiṉa: Yeṉo my’are bulinya p’Israèl inè: Anyaṉi ntyiṉa y’ôzôny’edu, konde iṉiṉa ny’ôzôṉe yôdu ne ntyiṉa ya nyô; ôm’edu e be nya yô e be teṉô.

¹⁵ Ôm’edu, ôlwaṉi ge ôgènda, e be nye nyam̃a yi re juwa pa ge sasuṉô pa ne nyam̃a, e be jôvuṉ’ingoy sè, ko yè sovuṉ’ôkuṽi wè gw’aṉingô, n’ayè e be fweva kwange nkôlô; avila vovo gambèṉè e be dwaṉa pupu.

¹⁶ Jog’ayè ayôvuṉ’ingoy sè, ge sovuṉô ôkuṽi wè, gambèṉè e be twaṉ’ôgôm̃a w’ifwem̃i sè.