Levitiki 16 - Bibili 1927 (Omyene)

¹ N’agambi Yeôva gôre Môsès, awaṉ’aṉôm̃e w’Aarône juwa pa, w’ayuwi gw’awôm̃unyi waô g’ôzô wi Yeôva.

² N’awulinyi Yeôva Môsès inè: Gamba gôre mwô’ngi yo Aarône, inè: ayingiṉ’egômbe zôdu gô mbôra y’ôrunda gô gare y’ôṉamba wi re diṽiṉô pa swaswo n’epônga zi re g’ôlômba w’egara z’ampanga, ayè vende juwa; konde mi be bôm̃unya gw’evindi gw’egara z’ampanga.

³ Vôna, yiṉo ne mpangiṉi yi be jingiṉa Aarône gô mbôra y’ôrunda. E be bonge nyare nôm̃e mori g’ômwanja wi ntyagô y’ôraṽô wi mpungu y’ibe n’idombè iṉôm̃e im̃ori g’ômwanja wi ntyagô yi pezô.

⁴ E be bore kôtô y’ôrunda ya pupu, e be bore siṉi ya pupu g’ôkuṽi wè, e be diry’ôtumba wa pupu, e be bor’ipaki nya pupu gw’ewônjô; siṉo ne ingoy s’ôrunda, si be borô yè, j’ayè sovuṉa pa gw’aṉingô.

⁵ E be bong’avila gô mandô y’Israèl mbôṉi nôm̃e mbaṉi g’ômwanja wi ntyagô y’ôraṽô wi mpungu y’ibe, n’idombè iṉôm̃e im̃ori g’ômwanja wi ntyagô yi pezô.

⁶ Aarône e be pe nyare yè nôm̃e gô taṽe mpungu y’ibe, ko yè p’ôraṽô wi mpungu y’ibe g’ômwanji wè na g’ômwanja wi nagô yè.

⁷ E be bonge mbôṉi nôm̃e mbaṉi, ko yè dimbiṉa sô g’ôzô wi Yeôva, g’ômpômbala wi ñanja y’idataṉa.

⁸ N’Aarône e be punge yôga g’ômwanja wi mbôṉi mbaṉi, egaṉô ezôga em̃ori g’ômwanja wi Yeôva, n’ezôga em̃ori g’ômwanja w’Azazèl.

⁹ Aarône e be pange mbôṉi y’akôtô ne ezôga g’ômwanja wi Yeôva gô susa pyèrè, ko yè pa yô gô ntyagô y’ôraṽo wi mpungu y’ibe.

¹⁰ Ni mbôṉi y’akôtô ne ezôga g’ômwanja w’Azazèl yi be dimbiṉô bo g’ôzô wi Yeôva, ko yô taṽe mpungu y’ibe, ko yô puruṉô gw’itôve gôr’Azazèl.

¹¹ N’Aarône e be pe nyare yè nôm̃e gô taṽe mpungu y’ibe, ko yè p’ôraṽô wi mpungu y’ibe g’ômwanji wèmè na g’ômwanja wi nagô yè. Gambèṉè e be jôṉe nyare yè nôm̃e yi taṽe mpungu y’ibe.

¹² N’ayè e be bonge ntyèngè ralye n’anyingilya m’ôgôṉi ma gèlagèla tômbô pa avila gô mbôra yi jirô intyagô g’ôzô wi Yeôva, n’intyom̃è s’aleṽe mbaṉi si ya yi nkangô nyigyanyigyô pa ga mpira; gambèṉè e be bage ya yiṉo gô ntyomori y’ôṉamba wi re diṽiṉô pa.

¹³ Gambèṉè e be fwele ya yi nkangô g’ôgôṉi g’ôzô wi Yeôva ko ôtutu wi ya yi nkangô diṽiṉ’epônga zi re g’ôlômba w’egara z’ampanga, ko yè ayuwa du.

¹⁴ N’ayè e be bonge ntyiṉa yi nyare nôm̃e, ko yè nyènya yô n’ôm̃eṉô wè gw’epônga z’egara gô nkôṽa yi tongwa ni nkômbe; e be nyènye ntyiṉa n’ôm̃eṉô wè nyongo ôrwageṉô swaswo n’epông z’egara z’ampanga.

¹⁵ E be jôṉe mbôṉi nôm̃e yi taṽe mpungu y’ibe g’ômwanja w’iṉongo, gambèṉè e be bage ntyiṉa ya yô ntyomori y’ôṉamba wi re diviṉô pa. E be denda ni ntyiṉa yiṉo ga nt’adendè ni ntyiṉa yi nyare nôm̃e, e be nyènya yô gw’epônga z’egara; na swaswo gw’epônga z’egara z’ampanga.

¹⁶ Yeṉo be dendô ôraṽô wi mpungu y’ibe gô mbôra y’ôrunda g’ômwanja wi nfweviṉi y’Israèl na g’ômwanja w’ipava sôdu si re waô pava pa. E be dende mbela mèmô gô ñanja y’idataṉa yi re na waô gô garegare y’ifwevi saô.

¹⁷ Alwaṉ’ôma gô ñanja y’idataṉa gô be jingiṉè gô p’ôraṽô wi mpungu y’ibe gô mbôra y’ôrunda, kaô akogwa. E be p’ôraṽô g’ômwanji wèmè na g’ômwanja wi nagô yè, na g’ômwanja wi mandô yôdu y’Israèl.

¹⁸ Gô be kogwè avila vovo, e be kènda gô mbôra yi jirô intyagô yi re g’ôzô wi Yeôva, gambèṉè e be p’ôraṽô wi mpungu y’ibe gô mbôra yi jirô intyagô; e be bonge ntyiṉa yi nyare nôm̃e na yi mbôṉi nôm̃e, ko yè fwela yô gw’imengô si mbôra yi jirô intyagô vingôvingô.

¹⁹ E be nyènye ntyiṉa n’ôm̃eṉô wè nyongo ôrwageṉô gô mbôra yi jirô intyagô, ko yè jombunya yô, avanga yô ôrunda, g’ômwanja w’ifweva s’Israèl.

²⁰ Gô be mèṉizè ipa ôraṽô wi mpungu y’ibe gô mbôra y’ôrunda, gô ñanja y’idataṉa na gô mbôra yi jirô intyagô, gambèṉè e be pange mbôṉi nôm̃e ya bo gô susa pyèrè.

²¹ Aarône e be taly’ago mè ambaṉi gw’ewônjô zi mbôṉi ya bo, am̃èma gô yô ibe sôdu s’Israèl n’ipava sôdu si re waô pava pa, gambèṉè e be fwela sô gw’ewônjô zi mbôṉi, avila vovo ayè n’ôma wi re n’eṽilô mè wi be suga yô gw’itôve.

²² Ni mbôṉi yi be twaṉa g’ôkuṽi wè ibe saô sôdu gô ntye yi ntyambè, gambèṉè e be suga yô gw’itôve.

²³ N’Aarône e be jingiṉa gô ñanja y’idataṉa, e be soduṉ’ingoy sa pupu s’aborô yè gw’ajingiṉè gô mbôra y’ôrunda, ko yè dimbiṉa sô vovo.

²⁴ E be sovunyô ôkuṽi wè gw’aṉingô gô mbôra y’ôrunda, ko yè tô bor’ingoy sè. Avila vovo e be kogwa, ayire ntyagô yè yi pezô ni ntyagô yi pezô y’aṉaga, ko yè p’ôraṽô wi mpungu y’ibe g’ômwanji wè na g’ômwanja w’aṉaga.

²⁵ E be pez’agali ni nyam̃a yi taṽe mpungu y’ibe gô mbôra yi jirô intyagô.

²⁶ Ayè y’azugi mbôṉi gôr’Azazèl e be jôvuṉ’ingoy sè gô mbeṉe, azovuṉ’ôkuṽi wè gô mbeṉe; avila vovo ayè tô jingiṉa g’ôlakô.

²⁷ Nyare nôm̃e yi taṽe mpungu y’ibe ni mbôṉi yi taṽe mpungu y’ibe si re bagô pe ntyiṉa gô mbôra y’ôrunda gô taṽe mpungu y’ibe, si be kogunyô gw’igala ny’ôlakô ebanda za sô, izôṉe ya sô, n’ati ma sô mi be pezô g’ôgôṉi.

²⁸ Ayè yi be peza yô e be jôvuṉ’ingoy sè, azovuṉ’ôkuṽi wè gô mbeṉe avila vovo ayè tô jingiṉa g’ôlakô.

²⁹ Nyiṉo nyi be dwaṉ’ivanga nya pèkèpèkè gôre ṉwè inè: g’ôgwèli w’ôrwageṉô gô ntyugu y’igôm̃i y’ôgwèli, aṉwè be sôny’ikuṽi yaṉi, ko ayanjaṉ’eṽilô edu, ôlwaṉi ge ôgènda wi dwaṉa gô garegare yaṉi.

³⁰ Konde gô ntyugu mè be pô ôraṽô wi mpungu y’ibe g’ômwanji waṉi, ko ṉwè jombunyô; aṉwè be jombunyô avila gw’ibe saṉi sôdu g’ôzô wi Yeôva’

³¹ Siṉo si be dwaṉa gôre ṉwè ijowa, ntyugu y’ijowa, ko ṉwè sôny’ikuṽi yaṉi; nyiṉo nyi be dwaṉ’ivanga nya pèkèpèkè.

³² Ôraṽo wi be taṽô ne miṉisè yi re sagyô pa na yi re pangô p’ôrunda gw’eṽilô zi miṉisè gw’inyanga nya reri yè; e be bor’ingoy sa pupu, ingoy s’ôrunda.

³³ E be p’ôraṽô wi mpungu y’ibe gô mbôra y’ôrunda, e be p’ôraṽô wi mpungu y’ibe gô ñanja y’idataṉa, na gô mbôra yi jirô intyagô, ko yè p’ôraṽô wi mpungu y’ibe g’ômwanja w’imiṉisè na g’ômwanja w’aṉaga waôdu wi mandô.

³⁴ Nyiṉo nyi be dwaṉ’ivanga nya pèkèpèkè gôre ṉwè inè: e be p’ôraṽô wi mpungu y’ibe ômpum̃y’edu nyongo mori gôr’Israèl g’ômwanja w’ibe saô. N’alendi waô ga nt’azômbyi Yeôva Môsès.