Levitiki 15 - Bibili 1927 (Omyene)

¹ N’agambi Yeôva gôre Môsès na gôr’Aarône, inè:

² Gambaṉi gôr’Israèl, awulinya waô inè: Ôṉôm̃y’edu wi re n’ôzômba, gambèṉè afwevi vo wô.

³ Gô ntiṉa y’ôzômbi wè are fweva pa; j’ôzômba wi twa ntyo w’akam̃iṉ’itwa, gambèṉè are fweva pa.

⁴ Ôdw’edu wi be dèwô yè wi be fweva, n’ezom̃y’edu zi be dwaṉô yè zi be fweva.

⁵ Ayè yi be bwat’ôdô wè e be jôvuṉ’ingoy sè, ko yè sovuṉa gô mbeṉe, gambèṉè e be dwaṉa fweva pa kwange nkôlô.

⁶ Ayè yi be dwaṉa gw’ezom̃a z’adwanyô yè, e be jôvuṉ’ingoy sè, ko yè sovuṉa gô mbeṉe, gambèṉè e be dwaṉa fweva pa kwange nkôlô.

⁷ Ayè yi be bwat’ôzôṉe w’ôma wi re n’ôzômba, e be jôvuṉ’ingoy sè, ko yè sovuṉa gô mbeṉe, gambèṉè e be dwaṉa fweva pa kwange nkôlô.

⁸ Jog’ôma wi re n’ôzômba atôny’igwaṉa gôr’ôma wi re nkèrè, gambèṉè ôma mè e be jôvuṉ’ingoy sè, ko yè sovuṉa gô mbeṉe, gambèṉè e be dwaṉa fweva pa kwange nkôlô.

⁹ Mbôry’edu yi be dwaṉô n’ôma wi re n’ôzômba yi be fweva.

¹⁰ Ayè yi be kôz’ezom̃y’edu zi re dwaṉa pa gw’ipangiṉi sè, e be fweva kwange nkôlô; n’ayè yi be twaṉa zô e be jôvuṉ’ingoy sè, ko yè sovuṉa gô mbeṉe, gambèṉè e be dwaṉa fweva pa kwange nkôlô.

¹¹ Ayè yi be kôzô ne ôma wi re n’ôzômba, ko yè ayôvuṉ’ago mè gw’aṉingô, e be jôvuṉ’ingoy sè, ko yè sovuṉa gô mbeṉe, gambèṉè e be dwaṉa fweva pa kwange nkôlô.

¹² Evagw’edu z’iwôṉô zi be bwatô ne ôma wi re n’ôzômba zi be jôṉô, n’ibaki si rere sôdu si be jôvuṉô gw’aṉingô.

¹³ Jog’ajombunyô avila gô nkaṉi yè y’ôzômba, gambèṉè e be tange ntyugu ôrwageṉô g’ômwanja w’ijombunyô sè; e be jôvuṉ’ingoy sè, ko yè jôvuṉe nkaṉi yè gw’aṉingw’ambya mi nkèrè.

¹⁴ Gô ntyugu y’eṉanay e be bong’abembe ambaṉi ntyo awaṉa wi menga aṽaṉi, gambèṉè e be kènda g’ôzô wi Yeôva, g’ômpômbala wi ñanja y’idataṉa, ko yè pa mô gôre miṉisè.

¹⁵ Ni miṉisè e be jira mô, im̃ori gô ntyagô y’ôraṽô wi mpungu y’ibe, n’im̃ori gô ntyagô yi pezô; gambèṉè miṉisè e be p’ôraṽô wi mpungu y’ibe g’ômwanji wè g’ôzô wi Yeôva gô ntiṉa y’ôzômbi wè.

¹⁶ Ôma wi re fweva pa n’isèkè si pila g’ôluwu wè, e be sovuṉ’ôkuṽi wè wôdu gô mbeṉe, gambèṉè e be dwaṉa fweva pa kwange nkôlô.

¹⁷ Ngoy’edu n’ebandy’edu zi be dwaṉa kôzyô pa n’isèkè mè, zi be jôvuṉô gô mbeṉe, gambèṉè zi be dwaṉa fweva pa kwange nkôlô.

¹⁸ Jog’ômwantô are dèwa pa n’ôṉôm̃e ôṉongo mè wi be sovuṉa, gambèṉè wi be dwaṉa fweva pa kwange nkôlô.

¹⁹ Ômwantô wi be dwaṉa n’ijiraṉa si ntyiṉa gô ntyôndi yè, e be dwaṉa ntyugu ôrwageṉô gw’isam̃u yè y’antô. Ôm’edu e be bwatè e be dwaṉa fweva pa kwange nkôlô.

²⁰ Ôdw’edu e be dèwô yè gw’egômbe zi re yè dwaṉa pa gw’isam̃u yè y’antô wi be dwaṉa fweva pa, n’ezom̃y’edu zi be dwaṉô yè zi be fweva.

²¹ Ôm’edu e be bwat’ôdô wè e be jôvuṉ’ingoy sè, ko yè sovuṉa gô mbeṉe, gambèṉè e be dwaṉa fweva pa kwange nkôlô.

²² Ôm’edu e be bwat’ezom̃’edu z’adwaṉô yè e be jôvuṉ’ingoy sè, ko yè sovuṉa gô mbeṉe, gambèṉè e be dwaṉa fweva pa kwange nkôlô.

²³ Ja vovo ar’ezom̃y’edu g’ôdô ge gw’ezom̃a z’adwaṉô yè, ayè yi be bwata zô e be dwaṉa fweva pa kwange nkôlô.

²⁴ Jog’ôṉôm̃e adèwa na yè ko ifweva s’ômwantô wiṉo nogaṉa gôre yè, ôṉôm̃e e be dwaṉa fweva pa ntyugu ôrwageṉô, n’ôdw’edu wi be dwaṉa fweva pa.

²⁵ Ômwantô wi be dwaṉa n’ijiraṉa si ntyiṉa intyugu sinyenge, aranga gw’egômbe zi dwaṉè gw’isam̃u yè y’antô, ge ijiraṉa si ntyiṉa dwaṉa vyagaṉô ni nte dwaṉa yô pèkèpèkè, e be dwaṉa fweva pa egômbe zôdu zi re yè gw’ijiraṉa si ntyiṉi yè egolaṉi ga gw’egômbe zi dwaṉè gw’isam̃u y’antô.

²⁶ Ôdw’edu e be dèwô yè ôlingô wi re ijiraṉa si ntyiṉi yè wi be dwaṉa egolaṉi ga ôdô wi re yè gw’egômbe z’isam̃u yè y’antô, n’ezom̃y’edu zi be dwaṉô yè zi be dwaṉa fweva pa egolaṉi ga gw’egômbe mè zi dwaṉè gw’isam̃u yè y’antô.

²⁷ Ôm’edu e be bwata yô e be fweva; e be jôvuṉ’ ingoy sè ko yè sovuṉa gô mbeṉe, gambèṉè e be dwaṉa fweva pa kwange nkôlô.

²⁸ Jog’ômwantô ajombunyô avila gw’ijiraṉa si ntyiṉi yè, gambèṉè e be tange ntyugu ôrwageṉô, avila vovo e be dwaṉa pupu.

²⁹ Gô ntyugu y’eṉanay gambèṉè e be bong’abembe ambaṉi ntyo awaṉa wi menga aṽaṉi, ko yè baga mô gôre miṉisè g’ômpômbala wi ñanja y’idataṉa.

³⁰ Miṉisè e be jir’im̃ori gô ntyagô y’ôraṽô wi mpungu y’ibe, n’im̃ori gô ntyagô yi pezô, ni miṉisè e be p’ôraṽô wi mpungu y’ibe g’ômwanji wè g’ôzô wi Yeôva, gô ntiṉa y’ijiraṉa si ntyiṉi yè si re yè fweviza pa.

³¹ Zanjiṉaṉ’awaṉa w’Israèl avila gw’isèkè saô ko w’ayuwa gô ntiṉa y’isèkè saô, ja w’afwevize nagô yam̃ y’ikuku yi re gô garegare yaô.

³² Nyiṉo ne ivanga g’ômwanja w’ôma wi re n’ôzômba ge ayè yi re fwevizô pa n’isèkè si pila g’ôluwu wè;

³³ g’ômwanja w’ômwantô wi re n’ijiraṉa s’isam̃u yè y’antô, g’ômwanja w’ôṉôm̃e ntyo ômwantô wi re ni nkaṉi y’ôzômba, na gôr’ôṉôm̃e wi dèwa n’ômwantô wi re fweva pa.