Levitiki 13 - Bibili 1927 (Omyene)

¹ Agambi Yeôva gôre Môsès na gôr’Aarône awulya inè:

² Jog’ôm’adwaṉa n’eviga gw’ebanda z’ôkuṽi wè ge ôgèṉi, ntyo ibôke nyi r’egolaṉi ga ngalambô yi nkaṉi ya gelô gw’ebanda z’ôkuṽi wè, gambèṉè e be bagô gôre miṉisè Aarône ntyo gôr’ôm̃ori w’awaṉi wè aṉôm̃e wi r’imiṉisè.

³ Miṉisè e be kèlagèle ngalambô yi re gw’ebanda z’ôkuṽi wè. Jog’ômwa wi ngalambô w’atweṉi pupu, ko ngalambô jeṉaṉa dônga vyagaṉô n’ebanda z’ôkuṽi wè, gambèṉè yô ne ngalambô yi nkaṉi ya gelô, gambèṉè miṉisè yi re kèlagèla pa yi be myez’ôma mè inè, afwevi.

⁴ Jogo gw’ebanda z’ôkuṽa ar’ibôke nya pupu nyi re nyi pa jeṉaṉa dônga vyagaṉô n’ebanda, n’ômwa wa nyô wi pa twa pupu, gambèṉè miṉisè e be nunj’ôma wi re ni ngalambô mè gô nagô ntyugu ôrwageṉô.

⁵ Ni miṉisè e be kèlagèlè gô ntyugu y’ôrwageṉô. Jogo ngalambô yi pa jeṉaṉa gôre yè mpendaga, ge yô jagayaga gw’ebanda, gambèṉè miṉisè e be tô nunjè nyongo yi mbaṉi ntyugu ôrwageṉô.

⁶ Miṉisè e be tô kèlagèlè nyongo yi mbaṉi gô ntyugu y’ôrwageṉô. Jogo ngalambô y’atweṉi nkuṽaga ko y’ayagayaga gw’ebanda, gambèṉè miṉisè e be myez’ôma mè inè, are pupu; wi re dadyè ôgèṉi ôrevô, gambèṉè e be jôvuṉ’ingoy sè, ko yè dwaṉa pupu.

⁷ Ndô j’ôgèṉi wi jagayaga gw’ebanda, ayè pila pa gô tum̃inyô gôre miṉisè gô myezè ôpupupu wè, gambèṉè e be tô kèlagèlô nyongo yi mbaṉi ne miṉisè.

⁸ Ni miṉisè yi be kèlagèlè. Jog’ôgèṉi w’ajagayagi gw’ebanda, gambèṉè miṉisè e be myezè ifwevi sè inè: mèyoṉo nkaṉi ya gelô.

⁹ Jogo gôr’ôma are ni ngalambô yi nkaṉi ya gelô, gambèṉè e be bagô gôre miṉisè.

¹⁰ Ni miṉisè yi be kèlagèlè. J’are gw’ebanda ibôke nya pupu, gambèṉè j’ibôke mè nyi re panga p’ômwa pupu, ko nyô panga vovo bôm̃w’ôzôṉe w’ôlôsô gw’ibôke,

¹¹ gambèṉè yô ne nkaṉi ya gelô nungu gw’ebanda z’ôkuṽa w’ôma mè, ni miṉisè e be myezè isèkè sè, aṉunje yè gô nagô konde atweṉi n’isèkè.

¹² Jogo nkaṉi ya gelô y’ajagayagi gw’ebanda ko yô pug’ebanda zôdu z’ôma wi re ni ngalambô, avila gw’ewônjô kwanga gw’intyôzô, mbôry’edu yi be pônô yè ne miṉisè,

¹³ gambèṉè miṉisè yi be kèlagèlè; na j’ajeṉa inè, nkaṉi ya gelô y’apug’ôkuṽa wôdu, gambèṉè e be myez’ôma wi re ni ngalambô inè, are pupu, konde ôkuṽa wôdu w’atweṉi pupu.

¹⁴ Ndô ntyugu yi be jeṉô gôre yè ôzôṉe, gambèṉè e be dwaṉa n’isèkè.

¹⁵ Jogo miṉisè y’ajeṉ’ôzôṉe, e be myezè inè, are n’isèkè; gambèṉè ôzôṉe wi r’isèkè; yô ne nkaṉi ya gelô.

¹⁶ Jog’ôzôṉe w’akalwa n’arwa pupu, gambèṉè e be kènda gôre miṉisè, ni miṉisè yi be kèlagèlè,

¹⁷ na ja ngalambô y’akalwi pupu, gambèṉè miṉisè e be myez’ôpupupu w’ôma wi re ni ngalambô inè, atweṉi pupu.

¹⁸ Jog’ôma are gw’ebanda z’ôkuṽi wè n’ivômbô nyi re jingô pa,

¹⁹ ko bôm̃wa gô mbôra y’avegag’ivômbô, ôtômbô wa pupu ntyo ibôke nya pupu ntyo ôgèṉi wa teṉateṉa, gambèṉè ôma mè e be tum̃inyô gôre miṉisè.

²⁰ Ni miṉisè yi be kèlagèlè. J’ibôke ny’abôm̃unya dônga vyagaṉô n’ebanda, ko ômwa twa pupu, gambèṉè miṉisè yi be myezè isèkè sè inè: mèyoṉo ngalambô yi nkaṉi ya gelô, yi re jagayaga pa gw’ivômbô.

²¹ Jogo miṉisè y’ajeṉa vovo inè, ezel’ômwa wa pupu gw’ibôke, nyi zele kè dônga vyagaṉô n’ebanda, ndô ny’atweṉi guṽiguṽi, gambèṉè miṉisè yi be nunj’ôma mè gô nagô ntyugu ôrwageṉô.

²² Jog’ibôke ny’ajagayagi gw’ebanda, gambèṉè miṉisè e be myezè ifwevi sè inè: mèyoṉo ngalambô yi nkaṉi ya gelô.

²³ Ndô j’ibôke nyi re dwaṉa pa gô mbôra mèmô, ko ny’ayagayaga, gambèṉè zô evyavya z’ivômbô; ni miṉisè yi be myezè inè, are pupu.

²⁴ Jog’ôm’ are pezô p’ôgôṉi gw’ebanda z’ôkuṽi wè, ko evyavya z’ôgôṉi kalw’ibôke nya pupu ntyo ôgèṉi wa gelô, gambèṉè miṉisè yi be kèlagèlè.

²⁵ J’ômwa w’atweṉi pupu gw’ibôke, ko nyô jeṉaṉa dônga vyagaṉô n’ebanda, gambèṉè nyô ne nkaṉi ya gelô, yi re jagayaga pa gw’evyavya z’ôgôṉi, ni miṉisè yi be myezè ifwevi sè inè: mèyoṉo ne ngalambô yi nkaṉi ya gelô.

²⁶ Jogo miṉisè y’ajeṉa inè, vovo ezel’ômwa wa pupu gw’ibôke, nyi zele kè dônga vyagaṉô n’ebanda, ny’atweṉi kè guṽiguṽi, gambèṉè miṉisè e be nunj’ôma mè gô nagô ntyugu ôrwageṉô.

²⁷ Gambèṉè miṉisè e be tô kèlagèlè gô ntyugu y’ôrwageṉô. J’ibôke ny’ajagayagi gw’ebanda, gambèṉè miṉisè e be myezè ifwevi sè inè: mèyoṉo ngalambô yi nkaṉi ya gelô.

²⁸ Ndô j’ibôke nyi re dwaṉa pa gô mbôra mèmô, ko ny’ayagayaga gw’ebanda, ndô ny’atweṉi guṽiguṽi, mèzoṉo ne evyavya z’ôgôṉi; gambèṉè miṉisè e be myezè ôpupupu wè, konde zô ne evyavya z’ôgôṉi.

²⁹ Jog’ôṉôm̃e ntyo ômwantô are ni ngalambô gw’ewônjô ntyo gw’elèlu,

³⁰ gambèṉè miṉisè e be kèlagèle ngalambô. Ja y’ajeṉaṉa dônga vyagaṉô n’ebanda, ko vovo dwaṉ’ômwa wa tètètè sololo ga nyumbè, gambèṉè miṉisè e be myez’ôma mè ifwevi sè inè: mèyoṉo ne papakôwa, mèyoṉo ne nkaṉi ya gelô y’ewônjô ntyo y’elèlu.

³¹ Jogo miṉisè y’ajeṉa inè, ngalambô yi papakôwa yi pa jeṉaṉa dônga vyagaṉô n’ebanda, na inè vovo e zel’ômwa wa vyovyo, gambèṉè miṉisè e be nunj’ôma mè wi re ni ngalambô yi papakôwa ntyugu ôrwageṉô gô nagô.

³² Gambèṉè miṉisè e be kèlagèle ngalambô gô ntyugu y’ôrwageṉô. Ja papakôwa yi pa jagayaga, ja vovo ezel’ômwa wa sololo ga nyumbè, na ja nyi pa jeṉaṉa dônga vyagaṉô n’ebanda,

³³ gambèṉè ôma wi re ni papakôwa e be sèngiṉô, ndô mbôra yi re papakôwa y’azèngiṉô, ni miṉisè e be tô nunjè nyongo yi mbaṉi ntyugu ôrwageṉô.

³⁴ Ni miṉisè e be tô kèlagèle papakôwa gô ntyugu y’ôrwageṉô. Ja papakôwa yi pa jagayaga gw’ebanda, na ja yi pa jeṉaṉa dônga vyagaṉô n’ebanda, gambèṉè miṉisè yi be myezè ôpupupu wè, e be jôvuṉ’ingoy sè, ko yè dwaṉa pupu.

³⁵ Ndô ja papakôwa y’ajagayaga gw’ebanda, ayè myezô pa inè are pupu, gambèṉè miṉisè e be tô kèlagèle.

³⁶ Na ja papakôwa y’ajagayagi gw’ebanda, gambèṉè miṉisè y’arô buta twa pa vovo re ômwa wa sololo ga nyumbè; afwevi.

³⁷ Ja papakôwa yi re jeṉaṉa gôre yè mpendaga, na inè, ômwa wa vyovyo wi re pôm̃a pa vovo, gambèṉè y’ajingyô, n’ayè atweṉi pupu, ni miṉisè yi be myezè inè, e be dwaṉa pupu.

³⁸ Jog’ôṉôm̃e ntyo ômwantô are n’abôke gw’ebanda z’ôkuṽi wè, abôke ma pupu, gambèṉè miṉisè e be kèlagèlè.

³⁹ Jogo ar’abôke ma pupu guṽiguṽi gw’ebanda z’ôkuṽi wè, miṉo mi re kaô mpaza gw’ebanda, gambèṉè are pupu.

⁴⁰ Jog’ôṉôm̃e ar’itwe s’ewônjô dubwa pa, gambèṉè nyô ne ikanga; are pupu.

⁴¹ Jog’itwe s’ewônjô si re dubwa pa avila gô nkôṽa y’ôzô, gambèṉè nyô ne ikanga ny’ôzô, ndô are pupu.

⁴² Ndô j’adwaṉa vovo gô nkôṽa y’ikanga ny’ôzô ntyo nyi re gô nkori ngalambô ya pupu na ya sololo ga nyumbè gw’ikanga nyi nkôṽa yi nkori, gambèṉè nyô ne nkaṉi ya gelô yi re jagayaga pa gw’ikanga nyi nkôṽa yi nkori ntyo nyi nkôṽa y’ôzô.

⁴³ Gambèṉè miṉisè yi be kèlagèlè. Ja vovo are ngalambô y’ôgèṉi wa pupu ni sololo ga nyumbè gw’ikanga nyi nkôṽa yi nkori ntyo gô nkôṽa y’ôzô, nyi re ga nkaṉi ya gelô gw’ebanda z’ôkuṽa, gambèṉè ayè n’ôma wi nkaṉi ya gelô, ayè afwevi.

⁴⁴ Ni miṉisè e be myezè ifwevi sè konde nè ngalambô yi re gw’ewônjô zè.

⁴⁵ Ôma wi nkaṉi ya gelô, are ni ngalambô, e be twaṉ’ingoy sè jôkuṉô pa, n’ewônjô zè zi be dwaṉa gw’igala; e be diṽiṉ’elèlu, arônga inè: isèkè! isèkè!

⁴⁶ Yeṉo ôlingô wi be dwaṉè ni nkaṉi ya gelô, e be dwaṉa fweva pa, n’ayè afwevi. E be dwaṉ’anka; ilwaṉô nyè nyi be dwaṉa gw’igala ny’ôlakô.

⁴⁷ Jogo gô ngoy vovo re ngalambô yi nkaṉi ya gelô, gô ngoy yi lèni ntyo gô ngoy ya pupu,

⁴⁸ gô nyongè ya gôregôre ntyo gô ya relangaṉô nyongè ntyo lèni, gw’ebanda ntyo gw’ezom̃y’edu zi re pangô pa n’ebanda,

⁴⁹ jogo ngalambô y’adwaṉ’ôsolomèngèlè ge sololo ga nyumbè gô ngoy ntyo gw’ebanda, gô nyongè ya gôregôre ntyo gô ya relangaṉô, ge gw’ezom̃’edu z’ebanda, nyô ne ngalambô yi nkaṉi ya gelô, gambèṉè zi be tum̃inyô gôre miṉisè.

⁵⁰ Ni miṉisè e be kèlagèle ngalambô, gambèṉè e be nunj’eza zi re na yô gô nagô ntyugu ôrwageṉô.

⁵¹ Gambèṉè e be tô kèlagèla yô gô ntyugu y’ôrwageṉô. Jogo ngalambô y’ajagayagi gô ngoy, gô nyongè ya gôregôre ntyo gô ya relangaṉô, gw’ebanda ntyo gw’ezom̃y’edu zi re pangô pa n’ebanda, yô ne ngalambô yi nkaṉi ya gelô nungu, gambèṉè ezom̃a mè z’afwevi.

⁵² N’ayè e be peze ngoy, nyongè ya gôregôre ntyo gô ya relangaṉô, lèni ntyo lyamba, ezom̃y’edu z’ebanda zi re gô dèngô ni ngalambô, konde mèyoṉo ne nkaṉi ya gelô nungu; zi be pezô g’ôgôṉi.

⁵³ Ndô ja miṉisè apôna inè, ngalambô yi re jagayaga gô ngoy, gô nyongè ya gôregôre, ntyo gô ya relangaṉô, gw’ezom̃y’edu z’ebanda,

⁵⁴ gambèṉè e be sômbya inè, ezom̃a zi re kôtô pe ngalambô zi ga yôvuṉô, ko yè tô nunja zô nyongo yi mbaṉi gô nagô ntyugu ôrwageṉô.

⁵⁵ Ni miṉisè e be tô kèlagèle ngalambô, zô jôvuṉô pa. Ja ngalambô yi pa kalwe mpangiṉi nyèṉè ge yô jagayaga, gambèṉè eza mè zi p’are fweva pa; zi be pezô g’ôgôṉi; mbèy y’igala ntyo ya gare y’akôtyô ne yô.

⁵⁶ Jogo miṉisè y’ajeṉa inè, ngalambô y’atweṉi guṽiguṽi, yô jôvuṉô pa, gambèṉè e be siza yô avila gô ngoy ntyo avila gw’ebanda avila gô nyongè ya gôregôre ntyo ya relangaṉô.

⁵⁷ Ja nyi pe jeṉaṉa gô ngoy, gô nyongè ya gôregôre ntyo ya relangaṉô, ntyo gw’ezom̃’edu z’ebanda, gambèṉè nyô ne ibôke nyi nkaṉi ya gelô; eza zi re kôtô pa ne ngalambô zi be pezô g’ôgôṉi.

⁵⁸ Ngoy, nyongè ya gôregôre ntyo ya relangaṉô, ezom̃y’edu z’ebanda zi re jôvuṉô pa, n’avila gô mbôra yi re ngalambô dubwa pa, yi be tô jôvuṉô nyongo yi mbaṉi, gambèṉè zi be dwaṉa pupu.

⁵⁹ Nyiṉo ne ivanga g’ômwanja wi ngalambô yi nkaṉi ya gelô, ja y’akôta gô ngoy yi lèni ntyo yi lyamba, nyongè ya gôregôre ntyo ya relangaṉô, ntyo ezom̃’edu z’ebanda n’avila vovo yi be myezô inè, yi re pupupu ntyo yi re fweva pa.