Levitiki 12 - Bibili 1927 (Omyene)

¹ Agambi Yeôva gôre Môsès awulya inè:

² Gamba gôr’Israèl, inè: Jog’ômwantô atw’inyem̃e, ko yè jaṉ’ômwaṉ’ôṉôm̃e, e be dwaṉa fweva pa ntyugu ôrwageṉô; e be dwaṉa fweva pa ga nte dwaṉè gw’intyugu si re yè dwaṉa pa gw’isam̃u y’antô g’ômwanja wi nkaṉi yè e be dwaṉa fweva pa.

³ Gô ntyugu y’eṉanay gambèṉè ômwaṉa e be kèrô.

⁴ N’ayè e be tô dwaṉ’agôm̃i m’intyugu ararô ni ntyugu ntyarô gôre yè gô jombunyô avila gô ntyiṉi yè; ayè awat’ezom̃y’edu z’ôrunda ge yè kènda gô nagô y’ôrunda, kaô intyugu s’ijombunyô sè s’akeka.

⁵ Jog’ajaṉ’ômwaṉ’ômwantô, gambèṉè e be dwaṉa fweva pa wiki mbaṉi, ga nte dwaṉè gw’intyugu si re yè dwaṉa pa gw’isam̃u y’antô, n’ayè e be dwaṉ’agôm̃i m’intyugu ôrôṽa ni ntyugu ôrôṽa gôre yè gô jombunyô avila gô ntyiṉi yè.

⁶ Jog’intyugu s’ijombunyô sè s’akeka g’ômwanja w’ômwaṉ’ôṉôm̃e ntyo g’ômwanja w’ômwaṉ’ômwantô, gambèṉè ayè e be twaṉa gôre miṉisè, g’ômpômbala wi ñanja y’idataṉa, ômwidombè w’ômpum̃’ôm̃ori gô ntyagô yi pezô n’ômwaṉa wi menga ntyo ibembe gô ntyagô y’ôraṽô wi mpungu y’ibe.

⁷ Miṉisè e be jira sô g’ôzô wi Yeôva ko yè pang’ôraṽô g’ômwanji wè, n’ayè e be jombunyô avila gw’ijiraṉa si ntyiṉi yè. Nyiṉo ne ivanga g’ômwanja w’ômwantô wi jaṉ’ômwaṉ’ôṉôm̃e ntyo ômwaṉ’ômwantô.

⁸ Jog’azele n’ezom̃a zi keka gô kôl’ômwidombè, gambèṉè e be bong’abembe ambaṉi ntyo awaṉa wi menga aṽaṉi, ôm̃ori gô ntyagô yi pezô n’ôm̃ori gô ntyagô y’ôraṽô wi mpungu y’ibe. Miṉisè e be pang’ôraṽô g’ômwanji wè, gambèṉè ayè e be dwaṉa pupu.