Levitiki 11 - Bibili 1927 (Omyene)

¹ N’agambi Yeôva gôre Môsès na gôr’Aarône, awulinya waô inè:

² Gambaṉi gôr’Israèl, awulya inè: Siṉo ne inyam̃a si be nyô ṉwè gw’inyam̃a sôdu si re gô ntye.

³ Aṉwè be nye nyam̃y’edu yi re mengô mbwa n’ômpondo kè mbwa, na yi ny’am̃aṉi;

⁴ ndô anyaṉi sô si pyanguṉa dadyè, ntyo si re dadyè mengô mbwa; yeṉo kè anyaṉi kamèli, yi pyanguṉ’inya, ndô yi zele mengô mbwa, konde y’atweṉi mbe gôre ṉwè.

⁵ Anyaṉi ônyembe wi ny’am̃aṉi, ndô wi zele ni mengô yi re n’ômpondo mbwa, konde w’atweṉ’ômbe gôre ṉwè.

⁶ Anyaṉi ntôri, yi pyanguṉ’inya, ndô yi zele ni mengô mbwa, gambèṉè y’atweṉi mbe gôre ṉwè.

⁷ Anyaṉi ngôwa, yi re mengô mbwa n’ômpondo kè mbwa, ndô yi pa ny’am̃aṉi, konde y’atweṉi mbe gôre ṉwè.

⁸ Anyaṉ’ôzôṉe wa sô ge ṉwè bwate bende ya sô, konde s’atweṉ’imbe gôre ṉwè.

⁹ Siṉo ne intyuwè si be nyô ṉwè gw’intyuwè sôdu si re gw’aṉingô. Aṉwè be nya sôdu si re n’ipôgavôga n’inkazô, na si re gw’aṉingô, si dwaṉa gô ntyuṽa, na si dwaṉa gw’iloṽi.

¹⁰ Ndô sôdu si re si zele n’ipôgavôga n’inkazô, gôr’ezom̃’yedu zi kèndagènda gw’aṉingô, n’ezom̃y’edu zi re bo gw’aṉingô, na zi dwaṉa gô mbeṉe, na zi dwaṉa gw’iloṽi, zi r’eṽe gôre ṉwè.

¹¹ Si be dwaṉ’imbe gôre ṉwè. Anyaṉ’izôṉe ya sô, ni bende ya sô, yi be dwaṉe ṽe gôre ṉwè.

¹² Sôdu si re gw’aṉingô, si re si zele n’ipôgavôga n’inkazô, si be dwaṉ’imbe gôre ṉwè.

¹³ Siṉo ne inyoṉi si be dwaṉ’imbe gôre ṉwè, gw’inyoṉi si re ko s’anyô: ngwanyoṉi, esongè z’ibôwa, esongè,

¹⁴ nkungu, n’ôlèdi, na yi r’ôṉongo ga yô,

¹⁵ ôñgwañondo n’aṉongo môdu mi re ga yô,

¹⁶ ôdômbô, ekuru, ntyôngô, esongè, na yi r’ôṉongo ga yô;

¹⁷ elege, ôgègè, n’ekuru;

¹⁸ ôdugenge, iruṽaṉi, ni ntyoṽu,

¹⁹ ntyanga, ôko, na yi r’ôṉongo ga yô, ni nkôga, ni nkonjo;

²⁰ yom̃a yôdu yi dandalanda, yi dôgwa na yi kènda n’agôlô anay yi be dwaṉe ṽe gôre ṉwè.

²¹ Ndô gôre ya yi dandalanda yôdu yi dôgwa na yi kènda n’agôlô anay, aṉwè be nya ya yi re n’ambèṉi, gw’agôlô maô, gô dôgwa gô ntye.

²² Yiṉo yô be nyô ṉwè: ôsakampazô, ôsasingô, ndèndèndè, n’esèraroro, gw’iṉongo yaô.

²³ Ndô yom̃a mori yôdu yi dandalanda, yi dôgwa na yi re n’agôlô anay yi be dwaṉe ṽe gôre ṉwè;

²⁴ yi be panga ṉwè fweva; ôm’edu wi be bwate bende yaô e be fweva kwange nkôlô.

²⁵ N’ôm’edu wi be twaṉe bende yaô e be jôvuṉ’ingoy sè, n’ayè e be dwaṉa fweva pa kwange nkôlô.

²⁶ Nyam̃y’edu yi re mengô mbwa ndô yi zele n’ômpondo mbwa, ge yi re yi pa ny’am̃aṉi, aṉwè be jeṉa yô isèkè; ôm’edu e bwata yô e be fweva.

²⁷ Inyam̃a sôdu si re n’agôlô anay si kènda n’akulu maô aṉwè be jeṉa sô isèkè; ôm’edu e be bwate bende ya sô e be fweva kwange nkôlô.

²⁸ N’ôm’edu e be twaṉe bende ya sô e be jôvuṉ’ingoy sè, n’ayè e be fweva kwange nkôlô; aṉwè be jeṉa sô isèkè.

²⁹ Siṉo ne sô si r’imbe gôr’inyam̃a si dandalanda gô ntye, si be jeṉô ṉwè isèkè imbe; ônyunge, mpôgô, n’ôsèsèli g’ôṉongo wa yô;

³⁰ ômbeṉaṽègèlè, ôsonji, ekaga, nkola n’ôṉôngôli.

³¹ Aṉwè be jeṉa sô imbe gô yom̃a yôdu yi dandalanda; ôm’edu e be bwate bende ya sô e be fweva kwange nkôlô.

³² Na gw’ezom̃y’edu gô sô zi be pôswa gô bende ya sô zi be fweva, baki y’erere, ngoy, ebanda, bombo, ezom̃y’edu zi be fwelô gw’aṉingô ko zô dwaṉa fweva pa kwange nkôlô; zô pila pa vovo, gambèṉè zi be dwaṉe nkèrè.

³³ Ezom̃y’edu zi be dèngô gw’evagô z’iwôṉô gô mbôra yi be pôswa zô gw’ezom̃y’edu, zi be fweva, ko ṉwè jôṉ’evagô.

³⁴ Inya sôdu si re gô nyô ja s’apôsunyô ne aṉingô miṉo gô sô, gambèṉè si be fweva; n’ijonga sôdu si re n’isolo gô jongô gw’evagw’edu ôṉongo mèwoṉo, si be fweva.

³⁵ Ezom̃y’edu gô zô zi be pôswa gw’ezom̃y’edu zi bende yaô zi be fweva; inyogo nyi be jilizô; nyi be fweva n’aṉwè be jeṉa yô ṽe.

³⁶ Vovo e be dwaṉa kaô ikèy ni verô y’aṉingô nkum̃inyag’aṉingô mbôra mô ko mô dwaṉ’ambya; ndô ayè yi be bwate bende ya sô, e be fweva.

³⁷ Jog’apôswa ezom̃y’edu zi bende yaô gw’intyo ny’ôlônda nyi re ko bèṉô, nyi be dwaṉe nkèrè;

³⁸ ndô ja wi re fwela p’intyo ny’ilônda gw’aṉingô ko vovo pôswa ezom̃y’edu zi bende yaô, nyi be dwaṉ’iṽe gôre ṉwè.

³⁹ Jog’ajuwe nyam̃a avila gw’inyam̃a si re ṉwè ko nya, ayè yi be bwat’ebende za yô e be fweva kwange nkôlô.

⁴⁰ Ayè yi be ny’ebende za yô e be jôvuṉ’ingoy sè, n’ayè e be fweva kwange nkôlô, ndô ayè yi be twaṉ’ebende za yô e be jôvuṉ’ingoy sè, n’ayè e be fweva kwange nkôlô.

⁴¹ Yom̃a yôdu yi dandalanda gô ntye yi re ṽe gôre ṉwè, y’anyô du.

⁴² Yom̃a yôdu yi dandalanda gô ntye anyaṉi yô, avila gô yom̃a yôdu yi kènda iwum̃u nkogaga gô ntye ge avila gô yom̃a yôdu yi kènda n’agôlô anay ge yi re n’agôlô am̃enge, konde yi be dwaṉe ṽe gôre ṉwè.

⁴³ Awevizaṉ’ikuṽi yaṉi vo yom̃a yôdu yi dandalanda, awevaṉi du vo yô, ge ṉwè fwevizô du ne yô.

⁴⁴ Konde myè ne Yeôva, Anyambyè yaṉi; m̃èpizaṉ’ikuṽi yaṉi, ko ṉwè dwaṉe nkèrè vyagaṉô, konde my’are nkèrè kè vyagaṉô; ko ṉwè aweviz’ikuṽi yaṉimè du vo yom̃a yiṉo yôdu yi dandalanda gô ntye.

⁴⁵ Konde myè ne Yeôva, y’agogunyi ṉwè avila gw’Egipt, gô dwaṉ’Anyambyè yaṉi.

⁴⁶ Nyiṉo ne ivanga ny’ayam̃a na ny’ayoṉi na nyi ya yabo yôdu yi kèndagènda gô mbeṉe, na nyi yom̃a yôdu yi dandalanda gô ntye;

⁴⁷ ko ṉwè banguny’eza zi r’eṽe n’eza zi re nkèrè, nyam̃a yi nyô ni nyam̃a yi re y’anyô.