Levitiki 10 - Bibili 1927 (Omyene)

¹ Awaṉ’aṉôm̃e w’Aarône, Nadab, n’Abiyu, w’awongi ôm’edu ntyèngè awela gôgô ôgôṉi n’aralyi waô ya yi nkangô g’ôlômba; aṽagi waô g’ôzô wi Yeôva ôgôṉi ômwoṉa wi re yè e pa sômbya waô.

² N’agogw’ôgôṉi avila g’ôzô wi Yeôva ayiliza waô; ayuwi waô g’ôzô wi Yeôva.

³ Vovo awulinyi Môsès Aarône inè: Wiṉo ne ôsam̃u wi re Yeôva takilya pa, gôre yè bulya pa inè: mi be mèpizyô gôre waô wi susa pyèrè gôre myè, na mi be pendizyô gw’azô m’iṉongo nyôdu. N’alwaṉi Aarône do.

⁴ N’aweyi Môsès Miskaèl n’Elsafan, y’ômwôṉôm̃e w’Uzyèl, yi mbalô y’Aarône, n’awulinyi yè waô inè: Zusaṉi pyèrè, rwaṉaṉi bende y’awareri yaṉi bô avila gô nagô y’ôrunda gw’igala ny’ôlakô.

⁵ Yeṉo azusi waô, ko waô twaṉa yô gw’ingoy saô gw’igala ny’ôlakô ga nt’awulyi Môsès.

⁶ Agambi Môsès gôr’Aarône na gôr’Eleazar na gôr’Itamar, awaṉ’aṉôm̃e w’Aarône awulinya waô inè: Aliṽiṉaṉi du wônjô yaṉi, ge ṉwè jôkuṉa du ingoy saṉi, aṉwè vende juwa, ko Yeôva aṽendiṉe mandô yôdu. Ndô awareri yaṉi ni nagô yôdu y’Israèl, yi ga leṉe g’ômwanja w’ôgôṉi wi re Yeôva baka pa.

⁷ Agogwaṉi du avila g’ômpômbala wi ñanja y’idataṉa, aṉwè vende juwa, konde agali m’isagya mi Yeôva mi re gôre ṉwè. N’alendi waô ga nt’awulyi Môsès.

⁸ Agambi Yeôva gôr’Aarône awulya inè:

⁹ Ayong’ivè, ge ijong’ijoli, awè ge awaṉi wo aṉôm̃e na wè, gô be jingiṉa ṉwè gô ñanja y’idataṉa, awè vende juwa. Nyiṉo nyi be dwaṉ’ivanga nya pèkèpèkè gôr’imbambi saṉi,

¹⁰ ko ṉwè jolye banguny’eza zi r’ôrunda, n’eza zi r’eṽe, eza zi r’isèkè, n’eza zi re nkère,

¹¹ ko ṉènjaṉ’Israèl ampanga môdu mi re Yeôva sômbya pa waô vo Môsès.

¹² N’agambi Môsès gôr’Aarône na gôr’Eleazar, na gôr’Itamar, awaṉ’aṉôm̃e aṽaṉi w’alèki n’Aarône, awulinya waô inè: Wongaṉ’eza zi tigaṉa avila gô ntyagô y’inya gw’intyagô si pezô ne ôgôṉi g’ôzô wi Yeôva, ko nyaṉi zô levèn fo pyèrè gô mbôra yi jirô intyagô, konde zô n’eza z’ôrund’ômpôlômè.

¹³ Aṉwè be nya zô gô mbôra y’ôrunda, zô ne inyangi nyo n’inyanga ny’awaṉi wo aṉôm̃e g’ômwanja w’intyagô si pezô ne ôgôṉi g’ôzô wi Yeôva; konde mèzoṉo zô re myè sômbyô pa.

¹⁴ Aṉwè be nya kè gô mbôra yi nkèrè, awè n’awaṉi wo aṉôm̃e, n’awaṉi wo antô na wè, ntôṉô yi re pinô pa g’ôzô wi Yeôva, n’iṽèṉi nyi re pô pa arum̃inyô gôre Yeôva; konde y’apenyô ṉwè ga nt’ar’inyangi nyo, n’inyanga ny’awaṉi wo aṉôm̃e gw’intyagô s’akeṽa s’Israèl.

¹⁵ Wi be baga, n’agali mi re kenjô pa gô pezô ne ôgôṉi, iṽèṉi nyi re pô pa arum̃inyô gôre Yeôva ni ntôṉô yi re piṉô pa g’ôzô wi Yeôva; yi be dwaṉa g’ômwanji wo na g’ômwanja w’awaṉi wo aṉôm̃e na wè, vo ivanga nya pèkèpèkè ga nt’are Yeôva sômbya pa.

¹⁶ N’awuti Môsès mbôṉi nôm̃e yi taṽe mpungu y’ibe, na vôna, y’avezyô. Vovo aṽendi yè gôr’Eleazar na gôr’Itamar, awaṉ’aṉôm̃e w’arigaṉi n’Aarône, n’awulyi yè inè:

¹⁷ Ntiṉa nde yi re ṉwè e pa nya eza z’ajirô gô ntyagô yi taṽe mpungu y’ibe gô mbôra y’ôrunda? zô ne eza z’ôrund’ômpôlômè, ni Yeôva are pa pa ṉwè zô, ko ṉwè twaṉ’ibe si mandô, ko ṉwè taṽe mpungu y’ibe g’ômwanja wa yô g’ôzô wi Yeôva.

¹⁸ Vônaṉi ntyiṉa yi nyam̃a yi jirô ntyagô yi pa twaṉô du gô gare yi nagô y’ôrunda; aṉw’arô nyeṉi yô gô nagô y’ôrunda ga nt’are myè sômbyô pa ne Yeôva.

¹⁹ N’awulinyi Aarône Môsès inè: Vôna, wi re jira pa ṉèṉo wiṉo ntyagô yaô yi taṽe mpungu y’ibe ni ntyagô yaô yi pezô g’ôzô wi Yeôva, na my’abyeṉô n’ôṉongo w’isam̃u ga yiṉo; arwe nè my’anya ṉèṉo wiṉo nyam̃a y’ajirô ntyagô yi taṽe mpungu y’ibe, gavoṉo atô dwaṉe mbya gw’antyo mi Yeôva?

²⁰ N’ayogyô Môsès ko yè tond’agamba miṉo.