Itum̃inya 9 - Bibili 1927 (Omyene)

¹ Arôngi yenjèl y’ôtaṉè ôrombo. N’ayeṉi myè ôgègèṉi wi pôswa avila g’ôrôṽa gô ntye. N’avenyô yè isape s’ivemba ny’ôronga,

² n’aṉunguṉi yè ivemba ny’ôronga. N’avand’ôtutu avila gw’ivemba, ga ôtutu w’ebek’evôlô z’ôgôṉi; n’ayilanganyô nkômbe n’ôzange g’ômwanja w’ôtutu w’ivemba.

³ N’avila g’ôtutu agogw’isakampazô ayambiṉa gô ntye; n’avenyô yô ngulu, nt’are ngulu y’inkôrô si ntye.

⁴ N’awulyi nyô yô inè, y’alendiṉ’am̃aṉi mi ntye mbe, g’ezom̃’edu evezô, g’erery’edu, ndô kaô aṉaga mè wi re wi ze n’elingilyô z’Anyambyè gw’imbam̃i saô.

⁵ N’avenyô yô aranga gô jôṉa waô, ndô gô jeṉiza waô azingô agweli ataṉè; ni nkaza ya yô y’avegagi ga nkaza yi nkôrô ja y’at’ôma.

⁶ Gw’intyugu mèsoṉo aṉaga wi be but’ijuwa, ko w’alènga sô; ayônguṉa kè gô juwa, ko ijuwa fanga waô.

⁷ Ni mpangiṉi y’isakampazô mèyoṉo y’avegagi g’ikaṽala kekizô pa gw’igoṽi; na gô wônjô ya yô avegagi ga ikôrôṽa si sika ya teṉateṉa, n’azô ma yô m’avegagi g’azô m’aṉaga.

⁸ Y’avegagi n’itwe g’itwe s’antô, n’anô ma yô m’avegagi g’anô m’iliyoni.

⁹ N’avegagi yô ni yambô yi diviṉe ntôṉô, n’ôtogo w’ampava ma yô w’avegagi g’ôtogo w’intyôṉe, n’ikaṽala sinyenge si pale mangô gw’igoṽi.

¹⁰ N’avegagi yô n’ikwende ga inkôrô, ni logoṉi, na gw’ikende ya yô ne ngulu yaô yi jeṉiz’aṉaga nkaza agwèli ataṉè.

¹¹ N’avegagi yô ni yenjèl y’ivemba ny’ôronga g’ôga gô pangiṉa yô; ini nyè gô nkambiṉi y’Ebèr ne Abadon, ndô gô nkambiṉi yi Grèk ne Apôlyôn.

¹² Azile alônga m’apyagaṉi; ndô atigaṉi gô bya azile am̃èṉè ambaṉi.

¹³ Arôngi yenjèl y’ôrôṽa ôrombo. N’ayogyô myè inyôy avila gw’imengô nay si mbôra yi jirô intyagô yi sika ya teṉateṉa yi re g’ôzô w’Anyambyè,

¹⁴ awulinya yenjèl y’ôrôṽa y’avegagi n’ôrombo inè: Vuruṉa yenjèl nay si re tagô pa g’ôlôṽi ômpôlô yi Ferat.

¹⁵ N’avurunyô yenjèl nay s’avegigi kekizô pa gw’igwèra, n’ôm̃anda, n’ôgwèli, n’ômpum̃a, gô jôṉ’ôm̃ori gw’ararô gôr’aṉaga.

¹⁶ Ni ntangô y’imbèli ya mongi wi panda gw’ikaṽala y’avegagi nkam̃a s’intozèny mbaṉi s’intozèny: my’ayogyô ntangô yaô.

¹⁷ Yeṉo ayeṉi myè ikaṽala gô nyinô, na waô w’alwaṉi baru gô sô, ni yambô yi ntôṉôga y’ôgôni, ni yasinte, ni sufur. Ni wônjô y’ikaṽala y’avegagi ga wônjô y’iliyoni; n’avila gw’agwaṉa ma sô agogw’ôgôṉi, n’ôtutu, ni sufur.

¹⁸ N’isam̃u yiṉo irarô ayônyô mori gô mbèy ntyarô y’aṉaga inè, n’ôgôṉi, n’ôtutu, ni sufur y’agogwi avila gw’agwaṉa ma sô.

¹⁹ Ni ngulu y’ikaṽala yi re gw’agwaṉi maô, na gw’ikwende yaô; konde ikwende yaô yi re g’im̃amba, alwaṉa ni wônjô; n’ikaṽala si jeṉize nkaza na yô.

²⁰ N’aṉag’am̃ori wi re wi pa jôṉô n’isam̃u yiṉo, wi pa nige nkôndi g’ômwanja w’ijanja s’ago maô, ko waô tig’isaviṉa s’aṉiṉ’ambe, n’ikaṉa si sika ya teṉateṉa, na si sika ya pupu, na si nyènyè, na s’adô, na si rere, si re s’ayolye jeṉe, ge jogo, ge kènda;

²¹ wi pa nige nkôndi kè g’ômwanja w’ijôṉaṉi saô, n’isèṉi saô, n’ibelaṉi saô, n’ijufi saô.