Itum̃inya 8 - Bibili 1927 (Omyene)

¹ Gw’aṉunguṉi yè elingilyô z’ôrwageṉô, ôrôṽa w’avoṉi dodo pyèrè n’ereṉe z’igwèra.

² N’ayeṉi myè yenjèl ôrwageṉô si kum̃aṉa g’ôzô w’Anyambyè; avenyô waô irombo ôrwageṉô.

³ N’aṽyeṉi yenjèl mori agum̃aṉa gô mbôra yi jirô ntyagô, ni ntyèngè yi sika ya teṉateṉa yi fwelô yom̃a yi nkangô bem̃eṉe; n’avenyô yè yom̃a yi nkangô yenge inè, e ga yire yô ntyagô, gô kunda yô gw’ikambiṉa sôdu s’iyombwi, gô mbôra yi jirô intyagô yi sika ya teṉateṉa yi re swaswo n’eka.

⁴ Avandi ôtutu wi yom̃a yi nkangô, n’ikambiṉa s’iyombwi ta, avanda g’ôzô w’Aynambyè avila g’ôgo wi yenjèl.

⁵ N’awongi yenjèl awonge ntyèngè, ayônya yô n’ôgôṉi avila gô mbôra yi jirô intyagô, avunga yô gô ntye. N’arweṉ’anyôy, n’injalitôṽa, n’aṉômingwèmbôlô, n’isugyazugya si ntye.

⁶ N’agekizi yenjèl ôrwageṉô s’avegagi n’irombo ôrwageṉô agekiza gô tônga yô.

⁷ N’arôngi nônga ôrombo. N’arweṉi ningô y’adô na y’ôgôṉi, keziṉô pa ni ntyiṉa, n’avungyô yô gô ntye; n’avezô mori gô mbèy ntyarô yi ntye, ni mori gô mbèy ntyarô yi rere, n’am̃aṉi ambezô môdu m’avezô.

⁸ Arôngi yenjèl yi mbaṉi ôrombo. Ezom̃a ga nômba mpôlô mbam̃iṉaga n’ôgôṉi avungô gô mbeṉe; ni mori gô mbèy ntyarô yi mbeṉe y’arweṉi ntyiṉa,

⁹ n’ayuwi em̃ori gô rarô gô yom̃a y’avegagi gô mbeṉe na y’avegagi n’em̃èṉo, n’ayilizyô ôm̃ori gw’ararô gw’am̃atanga.

¹⁰ Arôngi yenjèl yi ntyarô ôrombo. N’avôswi avila g’ôrôṽa ôgègèṉi ômpôlô, mbam̃iṉaga g’ôjô; n’avôswi wô g’ôm̃ori gw’irarô gw’itèmbo na gw’igerômbeṉe y’aṉingô.

¹¹ Ina ny’ôgègèṉi mèwoṉo ne abisènte; ni mori gô mbèy ntyarô y’aṉingô y’agalwi abisènte, n’aṉag’awenge w’ayuwi n’aṉingô, konde m’arweṉi nôṉe.

¹² Arôngi yenjèl yi nay ôrombo. N’awôlyô mori gô mbèy ntyarô yi nkômbe, na y’ôgwèli, na y’igègèṉi; yeṉo mori gô mbèy ntyarô gô yô y’ayilangaṉi, n’ôm̃anda w’averiz’ôzange wè vo mbèy mori gô ntyarô, n’ôgwèra kè mbela mèmô.

¹³ N’ayeṉi myè ayogo ngwanyoṉi yi dôgwa gô gare y’ôrôṽa, awulya n’inyôy ivôlô inè: Azile, azile, azile gôr’alwaṉi wi ntye, g’ômwanja w’anyôy am̃ori m’ôrombo mi yenjèl ntyarô si p’are gô tônga!