Itum̃inya 7 - Bibili 1927 (Omyene)

¹ Avila vovo, my’ayeṉ’iyenjèl nay wi kum̃aṉa gw’intyay nay si ntye, nsimbyag’impung’inay yi ntye, k’ômpunga w’avèviṉa gô ntye, ge gô mbeṉe, ge gw’erery’edu.

² N’ayeṉi myè yenjèl nyèṉè mori yi panda avila gô nkôṽa yi tongwa ni nkômbe, kôta p’elingilyô z’Anyambyè ya bo; n’arôngi yô n’inyôy ivôlô gôr’iyenjèl nay, s’avenyô ngulu yi jeṉize ntye ni mbeṉe nkaza, awulya nè:

³ Ayeṉizaṉi ntye nkaza, ge mbeṉe, ge rere, kaô azwè dingilya p’inyôngô s’Anyambyè yazô gw’imbam̃i saô.

⁴ N’ayogyô myè ntangô ya waô w’alingilyô inè, nkam̃a yi ntozèny n’agôm̃i m’intozèny anay ni ntozèny nay s’imbuṽe sôdu s’awaṉa w’Israèl:

⁵ gô mbuṽe yi Yuda alingilyô igôm̃i nyi ntozèny ni ntozèny mbaṉi; gô mbuṽe yi Rubèn alingilyô igôm̃i nyi ntozèny ni ntozèny mbaṉi; gô mbuṽe yi Gad alingilyô igôm̃i nyi ntozèny ni ntozèny mbaṉi;

⁶ gô mbuṽe y’Asèr alingilyô igôm̃i nyi ntozèny ni ntozèny mbaṉi; gô mbuṽe yi Nèftali alingilyô igôm̃i nyi ntozèny ni ntozèny mbaṉi; gô mbuṽe yi Manase alingilyô igôm̃i nyi ntozèny ni ntozèny mbaṉi;

⁷ gô mbuṽe yi Simeôn alingilyô igôm̃i nyi ntozèny ni ntozèny mbaṉi; gô mbuṽe yi Levi alingilyô igôm̃i nyi ntozèny ni ntozèny mbaṉi; gô mbuṽe yi Yisakar alingilyô igôm̃i nyi ntozèny ni ntozèny mbaṉi;

⁸ gô mbuṽe yi Zabulôn alingilyô igôm̃i nyi ntozèny ni ntozèny mbaṉi; gô mbuṽe yi Yôsèf alingilyô igôm̃i nyi ntozèny ni ntozèny mbaṉi; gô mbuṽe yi Benyamin alingilyô igôm̃i nyi ntozèny ni ntozèny mbaṉi.

⁹ Isam̃u yiṉo vya vôna, my’ayeṉi nkumba mpôlô, yi re y’ayolye tangô n’ôma, avila gw’iṉongw’edu, n’avila gô mbuṽy’edu, n’avila gôr’aṉaga waôdu, n’iṉèm̃è yodu, kum̃aṉa pa swaswo n’eka na g’ôzô w’Ômwidombè, bora p’ingoy sa pupu, n’ikôgô y’ambila gw’ago maô.

¹⁰ N’awôgiṉi waô n’inyôy ivôlô awulya nè: Isungiṉa si re gôr’Anyambyè yazô yi re baru gw’eka, na gôr’ômwidombè.

¹¹ N’iyenjèl sôdu s’avegagi kum̃aṉa pa gw’eka vingôvingô n’aṉèro ni nyam̃a nay; n’avôswi waô swaswo n’eka azô maô mbè gô ntye, azaviṉ’Anyambyè, awulya nè: Amèn!

¹² Isum̃inya, n’ivenda, n’imya, n’akeṽa, n’ôlubô, n’inyanga, ni ngulu, yi ga lwaṉe gôr’Anyambyè yazô gô koṉako!

¹³ N’ôm̃ori gôr’aṉèro awiṉizi, awulinya myè nè: Wiṉo wi re boryô pa n’ingoy sa pupu, mande? w’apila na gweṉi?

¹⁴ N’awulinyi myè yè inè: W’avôrô Rera. N’awulinyi yè myè inè: Wiṉo ne waô wi pila gw’azingô ampôlô, wi re jôvuṉa p’ingoy saô, avanga sô pupu gô ntyiṉa y’ômwidombè.

¹⁵ Yeṉo dwaṉa waô swaswo n’eka z’Anyambyè, ko waô janjiṉè ôm̃anda n’ôgwèra gô nagô yè y’ôrunda. Ayè yi re baru gw’eka e be diviṉa waô ni nagô yè y’ikuku gôre waô;

¹⁶ wi ze tô jogo njaṉa nyèṉè, ge kôtô n’esôve, ni nkômbe yi ze tô bambiṉe waô ômwèy wi nkaza nyèṉè.

¹⁷ Konde ômwidombè wi re gô garegare y’eka e be dwaṉ’ôvenjavenji waô, agèndya waô gw’igerômbeṉe y’aṉingô m’em̃èṉo, n’Anyambyè e be siz’antyoṉi môdu avila gw’antyo maô.