Itum̃inya 6 - Bibili 1927 (Omyene)

¹ Ayeṉi myè, gw’aṉunguṉ’ômwidombè aṉunguṉ’em̃ori gô lingilyô ôrwageṉô, n’ayogyô myè mori avila gw’inyam̃a nay yi bulya n’inyôy ga nyi njalitôṽa inè: Yôgô.

² Na vôna, my’ayeṉi kaṽala ya pupu. N’ayè avegagi baru gô yô avegagi n’elendiṉa; avenyô yè kôrôṽa, n’agèndi yè g’ôgevisi na gô keṽa.

³ Gw’aṉunguṉi yè elingilyô zi ṽaṉi, my’ayogyô nyam̃a yi mbaṉi yi bulya nè: Yôgô.

⁴ N’agogwi kaṽala nyèṉè ya gelô; na gôre yè avegagi baru gô yô avenyô inyanga nyi tômb’am̃ènjè gô ntye, ko aṉaga jôṉaṉa; avenyô yè kè ôkwara n’iwora ômpôlô.

⁵ Gw’aṉunguṉi yè elingilyô zi rarô my’ayogyô nyam̃a yi ntyarô yi bulya nè: Yôgô. Na vôna, my’ayeṉi kaṽala ya bogubogu. N’ayè avegagi baru gô yô avegagi n’ôdôdô g’ôgo wè.

⁶ N’ayogyô myè egolaṉi g’inyôy gô gare yi nyam̃a nay nyi bulya nè: Egèṉizô zi bile gô fura, ni gèṉizô y’orze rarô gô fura; n’agali n’ivè azuga yô.

⁷ Gw’aṉunguṉi yè elingilyô zi nay, my’ayogyô inyôy nyi nyam̃a yi nay nyi bulya nè: Yôgô.

⁸ Na vôna, my’ayeṉi kaṽala ya gawa. N’ayè avegagi baru gô yô ini nyè ne ijuwa, n’ilômbô ny’azôngi yè. N’avenyô waô inyanga gô mori yi mbèy nay yi ntye, gô jôṉ’aṉaga n’ôkwara, ni njaṉa, n’evunga, n’inyam̃’imbendi si ntye.

⁹ Gw’aṉunguṉi yè elingilyô zi taṉè, my’ayeṉi g’ôdôlôngô wi mbôra yi jirô intyagô aṉiṉa ma waô w’ayônyô g’ômwanja w’igamba ny’Anyambyè, na g’ômwanja w’igamba ny’arakilyô waô.

¹⁰ N’arôngi waô n’inyôy ivôlô awulya nè: Rera, ôma w’ôrunda n’ômyèṉè, ôlingô sè ô be dwaṉo ayèkèlya waô wi dwaṉa gô ntye, awiṉiza waô ekôlè zi ntyiṉi yazô?

¹¹ N’avenyô ôm’edu gôre waô ngoy mpôlô ya pupu, n’igamba ny’awulinyô waô inè, wi ga rô jowe vo mw’ôlingô, kaô ntangô y’inyôngô na waô, n’awareri yaô wi be jôṉô ga waô, y’akeka.

¹² N’ayeṉi myè gw’aṉunguṉi yè elingilyô z’ôrôṽa; arweṉ’isugyazugya si ntye ipôlô; nkômbe y’arweṉi bogubogu ga pinde y’imya, n’ôgweli w’arweṉi ga ntyiṉa,

¹³ n’igègèṉi y’ôrôṽa y’avôswi gô ntye, ga nte pôsuny’erere z’ifigi avôsuny’ilôndi yè yi re yi pa bonda, ge sugô zô n’ômpung’ômpôlô.

¹⁴ N’ôrôṽa w’arômbyô g’ezom̃a zi purô rwè; n’inômba sôdu n’inenge sôdu s’arômbyô avila gw’imbôra sa sô.

¹⁵ N’aga wi ntye, n’ayôgô, n’igogi y’isozè, ni kiti, n’aṉaga wi ngulu, n’asaka waôdu n’awôntye, w’azombuṉi gw’ibulungu na gw’adô m’inômba.

¹⁶ N’awulinyi waô inômba n’adô inè: Vôswaṉi gôre zwè, ko jumbuṉaṉi zwè avila g’ôzô w’ôma are baru gw’eka, n’avila gw’eguṉu z’ômwidombè;

¹⁷ konde ntyugu mpôlô y’eguṉu zè y’abyeṉi, na mande ko jolye kum̃aṉa?